Yehauvas Cov Tim Khawv yeej ntseeg tias tej hauv paus ntsiab lus thiab tej kev cai hauv phau Vajlugkub pab tau lawv kom txiav txim siab raws li Vajtswv lub siab nyiam thiab pab tau lawv lub neej. (Yaxayas 48:17, 18) Txawm lawv tsis yog cov rhawv tej hauv paus ntsiab lus thiab tej kev cai ntawd los, lawv yeej coj raws nraim li tej ntawd. Cia peb mus saib seb phau Vajlugkub hais li cas txog txoj kev sib tham. a

•   Txoj kev sib yuav muaj nuj nqis txhob muab rhuav. (Mathais 19:6) Yehauvas Cov Tim Khawv suav tias thaum ib tug twg sib tham ces twb yog lawv muaj lub siab xav sib yuav lawm. Lawv tsis lam tau lam nrog ib tug twg sib tham ua si.

•   Ib tug twg uas xav sib tham yuav tsum muaj hnub nyoog tso. Zoo dua rau nws tos kom dhau qhov uas “tswj tsis tau nws tus kheej” los sis qhov uas ntshaw pw ua niam txiv.​—1 Kauleethaus 7:36.

•   Cov uas sib tham yuav tsum muaj cai sib yuav. Txawm ib txhia twb ua ntaub ntawv sib nrauj lawm los yog tias tsis raws li Vajtswv txoj cai ces nws tsis muaj cai yuav dua ib tug tshiab. Rau qhov Vajtswv txoj cai tsuas pub sib nrauj thaum ib tug tau ua kev nkauj kev nraug lawm xwb.​—Mathais 19:9.

•   Cov Tim Khawv yuav tsum yuav cov ntseeg Yehauvas xwb. (1 Kauleethaus 7:39) Qhov no txhais tias Yehauvas Cov Tim Khawv yuav tsum yuav ib tug uas twb ua kev cai raus dej lawm thiab coj nws lub neej raws li tej nws kawm hauv phau Vajlugkub. Tsis yog ib tug uas tsuas saib taus lawv txoj kev ntseeg xwb. (2 Kauleethaus 6:14) Vajtswv yeej ib txwm sam hwm kom nws cov tib neeg yuav cov uas ntseeg nws xwb. (Chiv Keeb 24:3; Malakis 2:11) Yeej zoo rau peb coj raws li Vajtswv cov lus sam hwm ntawd, rau qhov txawm cov neeg tshawb fawb los lawv yeej tshawb pom li ntawd thiab. b

•   Cov me nyuam yuav tsum mloog niam txiv lus. (Pajlug 1:8; Kaulauxis 3:20) Cov me nyuam uas tseem nrog lawv niam lawv txiv nyob, yuav tsum mloog lawv niam lawv txiv hais thaum yuav nrog ib tug twg sib tham. Lawv niam lawv txiv muaj cai hais kom lawv sib tham tau thaum muaj hnub nyoog li cas thiab tsuas pub ua tau li cas rau li cas xwb.

•   Thaum hais txog puas yuav tham leej twg los tsis tham thiab yuav xaiv leej twg, cov Tim Khawv coj raws li Kalatias 6:5 uas hais tias “nyias yuav tau ua nyias tes hauj lwm.” Txawm li ntawd los, lawv coob leej kuj mus thov kev pab ntawm cov Tim Khawv uas paub tab ntawm sab kev ntseeg tsav tswv yim rau lawv thiab tus ntawd yuav tsum muaj lub siab xav pab tiag.​—Pajlug 1:5.

•   Muaj tej yam uas yog kev txhaum loj uas yuav tau ceev faj thaum sib tham. Xws li, nyob rau hauv phau Vajlugkub hais tias peb yuav tsum zam kev plees kev yis. Kev plees kev yis yog pw ua niam txiv, rhoob lwm tus neeg qhov chaw mos, thiab sib deev uas siv qhov ncauj los sis qhov quav. (1 Kauleethaus 6:9-11) Txawm qhov uas sib kov sib xuas los kuj tsis huv thiab tsis haum Vajtswv siab. (Kalatias 5:19-21) Nyob rau hauv phau Vajlugkub kuj hais kom peb tsis txhob hais lus dev lus npua los sis “hais lus phem lus qias.”​—Kaulauxis 3:8.

•   Tib neeg lub siab dag ntxias heev. (Yelemis 17:9) Yus lub siab yeej coj tau yus mus ua tej yam phem. Yuav kom peb lub siab txhob rov ntxias tau peb, peb yuav tsum tsis txhob tso siab tias yog ob leeg nyob ua ke xwb yeej tsis ua li cas. Zoo rau ob tug uas sib tham coj ib tug nrog nkawd ua ke los sis nkawd mus rau ntawm qhov chaw uas muaj neeg coob coob. (Pajlug 28:26) Cov Tim Khawv uas tsis tau muaj txij nkawm yuav tau ceev faj txog qhov uas mus nrhiav txij nkawm saum huab saum cua. Vim tsis paub tus neeg uas koj nrog tham ntawd coj li cas tiag.​—Ntawv Nkauj 26:4.