Phau Vajlugkub qhia li no

 Cov uas sawv tawm tsam Yexus tsis yog muaj ib tug los sis ib pab xwb, tiam sis phau Vajlugkub hais tias “coob tus sawv tawm tsam Khetos.” (1 Yauhas 2:18) Lo lus Kilis “tawm tsam Khetos” yog hais txog cov uas coj li nram no:

•   Tsis lees tias Yexus yog tus Khetos (Mexiyas) los sis tsis lees tias Yexus yog Vajtswv Tus Tub.​—1 Yauhas 2:22.

•   Tawm tsam Yexus tus uas Vajtswv xaiv tseg.​—Phau Ntawv Nkauj 2:1, 2; Lukas 11:23.

•   Dag tias lawv yog Yexus Khetos.​—Mathais 24:24.

•   Muab cov uas raws Yexus qab tsim txom. Yexus hais tias cov uas raws nws qab yuav raug tsim txom ib yam li nws.​—Tes Hauj Lwm 9:5.

•   Lam hais tias yog ib tug Khixatias tiam sis ho ua lim hiam thiab dag ntxias lwm tus.​—Mathais 7:22, 23; 2 Kauleethaus 11:13.

 Phau Vajlugkub muab cov uas coj li no hu ua cov uas “sawv tawm tsam Khetos,” tab txawm lawv sawv tawm tsam lawv ib leeg los sis nrog lwm tus tawm tsam ua tsheej pab. (2 Yauhas 7) Thawj tus uas sawv tawm tsam Yexus yog ib tug ntawm thawj pab tub txib uas Yexus xaiv tseg. Txij thaum ntawd los pib muaj coob zuj zus tuaj raws li phau Vajlugkub tau hais tseg lawm.​—1 Yauhas 4:3.

Yuav ua li cas peb thiaj paub tias leej twg yog cov uas sawv tawm tsam Yexus?

•   Cov uas txhawb tej lus qhia cuav txog Yexus. (Mathais 24:9, 11) Xws li, tej lus qhia txog Vaj Peb Leeg los sis qhia tias Yexus yog Vajtswv tus loj dua ntais. Tej lus qhia no cov nyom tej uas Yexus qhia, rau qhov Yexus qhia tias “Leej Txiv muaj hwj chim loj dua kuv.”​—Yauhas 14:28.

•   Cov uas tawm tsam Yexus tsis lees yuav Vajtswv lub Nceeg Vaj los sis Vajtswv txoj kev kav. Xws li, cov thawj coj ib txhia hais tias Yexus yuav siv tib neeg tej tseem fwv los kav lub ntiaj teb no. Tiam sis twb tsis muaj li ntawd, Yexus qhia tias “Kuv txoj kev kav tsis txuam nrog qab ntuj neeg.”​—Yauhas 18:36.

•   Lawv hais tias Yexus yog lawv tus Vajtswv, tiam sis lawv ho tsis mloog nws lus thiab tsis ua raws li nws tej lus sam hwm kom mus tshaj tawm txoj xov zoo txog Vajtswv lub Nceeg Vaj.​—Mathais 28:19, 20; Lukas 6:46; Tes Hauj Lwm 10:42.