Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Pagkabuhi kag Pagministeryo nga Workbook Para sa Miting  |  Septiembre 2016

 PAGKABUHI BILANG CRISTIANO

Ang Dapat Likawan Kon Nagadumala sing Pagtuon sa Biblia

Ang Dapat Likawan Kon Nagadumala sing Pagtuon sa Biblia
TAN-AWA
Text
Image

Ikaw Lang Pirme ang Nagahambal: Indi mo kinahanglan nga ipaathag ang tanan. Naggamit si Jesus sing mga pamangkot para buligan ang mga tawo nga maghunahuna kag maghimo sing husto nga konklusion. (Mat 17:24-27) Ang mga pamangkot nagabulig para mangin makawiwili ang pagtuon kag para mabal-an mo kon ano ang naintiendihan kag ginapatihan sang imo estudyante. (be 253 ¶3-4) Kon nagapamangkot, hulata ang imo estudyante nga makasabat. Kon sala ang iya sabat, likawi nga itudlo dayon ang husto nga sabat, kundi buligi sia nga makita ini paagi sa dugang nga mga pamangkot. (be 238 ¶1-2) Indi pagdasiga kon nagapaathag para maintiendihan sang imo estudyante ang bag-o nga mga ideya.—be 230 ¶4.

Himuon nga Komplikado: Likawi nga isugid ang tanan mo nga nabal-an sa topiko nga inyo ginaistoryahan. (Ju 16:12) Magpokus sa panguna nga mga punto sang parapo. (be 226 ¶4-5) Bisan pa may manami nga mga detalye, mahimo ini magpaburon sa panguna nga punto. (be 235 ¶3) Kon naintiendihan na sang estudyante ang panguna nga punto, magsaylo dayon sa masunod nga parapo.

Para Matapos Lang ang Tulun-an: Ang tuyo naton amo nga malab-ot ang tagipusuon, indi nga matapos lang ang tulun-an. (Lu 24:32) Gamita ang gahom sang Pulong sang Dios paagi sa pagpokus sa panguna nga mga teksto sa inyo ginatun-an. (2Co 10:4; Heb 4:12; be 144 ¶1-3) Maggamit sing simple nga mga ilustrasyon. (be 245 ¶2-4) Hunahunaa ang mga problema kag ginapatihan sang imo estudyante, kag kon paano makabulig sa iya ang inyo ginatun-an. Mahimo mo ipamangkot sa iya: “Ano ang imo masiling sa aton ginatun-an?” “Ano ang ginatudlo sini sa aton parte kay Jehova?” “Para sa imo, ano ang kaayuhan kon sundon mo ini nga laygay?”—be 238 ¶3-5; 259 ¶2.