Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NUM. 1 2017

 TOPIKO SA KOBER | PAANO KA PA GID MAKABENEPISYO SA PAGBASA SING BIBLIA

Paano Ko Ini Sugdan?

Paano Ko Ini Sugdan?

Ano nga mga paagi ang makabulig sa imo para manamian ka kag makabenepisyo sa pagbasa sing Biblia? Talupangda ang lima ka panugda nga nakabulig sa madamo.

Mangita sing nagakaigo nga lugar. Tinguhai nga makakita ka sing lugar nga malinong. Likawi ang mga makaisturbo sa imo para makapokus ka sa imo pagbasa. Ang masanag nga lugar kag preska nga hangin makabulig para makabenepisyo ka sa imo ginabasa.

Dapat husto ang imo panimuot. Ang Biblia halin sa aton Amay sa langit, gani makabenepisyo ka gid kon ang imo panimuot pareho sa bata nga handa magtuon sa iya mahigugmaon nga ginikanan. Kon may negatibo, ukon may mga opinyon ka na nga daan parte sa Biblia, kalimti anay ini para matudluan ka sang Dios.—Salmo 25:4.

Mangamuyo antes magbasa. Ang Biblia nagaunod sing mga panghunahuna sang Dios, gani indi katingalahan nga kinahanglan naton ang iya bulig para maintiendihan ini. Ang Dios nagpromisa nga magahatag sia sang “balaan nga espiritu sa mga nagapangayo sa iya.” (Lucas 11:13) Ang balaan nga espiritu makabulig sa imo nga maintiendihan ang panghunahuna sang Dios. Sa ulihi, pagabuksan sini ang imo hunahuna para maintiendihan “bisan pa ang madalom nga mga butang sang Dios.”—1 Corinto 2:10.

Hangpa ang imo ginabasa. Kon magbasa ka, indi lang kay para matapos mo ini. Pamensari sing maayo ang imo ginabasa. Pamangkuta ang imo kaugalingon pareho sang: ‘Ano nga mga kinaiya ang makita ko parte sa karakter nga ginabasa ko? Paano ko ini maaplikar sa akon kabuhi?’

Maghimo sing espesipiko nga mga tulumuron. Para makabenepisyo ka sa imo pagbasa sing Biblia, himua nga tulumuron nga may matun-an ka nga makabulig sa imo kabuhi. Puede mo mangin tulumuron ang pareho sini: ‘Gusto ko matun-an pa gid ang parte sa Dios.’ ‘Gusto ko mangin mas maayo nga tawo, mas maayo nga bana ukon asawa.’ Dayon magpili sing mga bahin sang Biblia nga makabulig sa imo nga malab-ot ini. *

Ining lima ka panugda makabulig sa imo nga masugdan ang pagbasa sing Biblia. Pero paano ka pa gid manamian sa imo pagbasa? May mga panugda ang masunod nga artikulo.

^ par. 8 Kon wala ka makahibalo kon diin nga mga bahin sang Biblia ang makabulig sa imo, nalipay gid ang mga Saksi ni Jehova nga buligan ka.