Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN DISIEMBRE 2015

Nahibaluan Mo Bala?

Nahibaluan Mo Bala?

Ang mga Judiyo bala nga nagkadto sa Jerusalem sang Pentecostes 33 C.E. halin gid “sa tanan nga pungsod”?

Ang kalye sa Jerusalem nga madamo sing tawo sang Pentecostes 33 C.E.

Bilang suporta sa rekord sang Biblia sa Binuhatan 2:5-11, ang Judiyo nga manunulat sadto nga si Philo naglaragway sa iya sinulatan parte sa madamo nga tawo nga nagkadto sa Jerusalem sang Pentecostes 33 C.E.

Tuhoy sa mga nagakadto sa Jerusalem, si Philo nagsulat: “Nag-abot ang indi maisip nga mga tawo halin sa indi maisip nga mga siudad, ang pila naglakbay, ang iban nagpanakayon, halin sa sidlangan kag katundan kag aminhan kag bagatnan, sa kada kapiestahan.” Ginkutlo man niya ang sulat nga ginpadala ni Agripa I, ang apo ni Herodes nga Daku, sa emperador sang Roma nga si Caligula. Sa sini, nagsiling si Agripa parte sa Jerusalem: “Ang Balaan nga Siudad . . . amo ang kapital indi lang sang isa ka pungsod sang Judaea kundi sang kalabanan man nga pungsod, bangod sang grupo sang mga tawo nga ginapadala sini sa kaingod nga mga pungsod.”

Ginlista ni Agripa ang mga lugar nga may komunidad sang mga Judiyo, lakip ang malayo nga mga lugar sa Mesopotamia, North Africa, Asia Minor, Gresya, kag mga isla sa Mediteraneo. “Bisan pa ini nga sulat wala nagsambit sing espesipiko parte sa paglakbay pakadto sa Jerusalem,” siling sang iskolar nga si Joachim Jeremias, “mahangpan na ini, bangod ginapatuman sa tanan nga adulto nga Judiyo nga magkadto didto.”—Deuteronomio 16:16.

Diin nagdayon ang linibo nga nagkadto sa Jerusalem para sa Judiyo nga mga kapiestahan?

Kagulub-an sang palaliguan sa Jerusalem

Tatlo ka kapiestahan ang ginahiwat kada tuig sa Jerusalem—Paskua, Pentecostes, kag Kapiestahan sang mga Payagpayag. Sang unang siglo, linibo ang nagkadto sa Jerusalem para sa sina nga mga kapiestahan halin sa bilog nga Israel kag halin sa tanan nga pungsod diin may mga Judiyo nga nagaistar. (Lucas 2:41, 42; Binuhatan 2:1, 5-11) Ini nga mga tawo dapat may dalayunan.

Ang pila nagadayon sa ila mga abyan; ang iban sa may bayad nga mga dalayunan. Madamo ang nagahimo sing tolda sa sulod kag sa palibot sang mga pader sang siudad. Sa katapusan nga pagtener ni Jesus sa Jerusalem, nagdayon sia sa malapit nga siudad sang Betania.Mateo 21:17.

Nasapwan malapit sa templo ang pila ka tinukod nga may madamo nga palaliguan. Ini nga mga tinukod ginapatihan nga mga dalayunan sang mga nagalakbay kag diri sila nagapaninlo antes magsulod sa templo. Ang isa ka inskripsion nga nakita sa isa sa sini nga mga tinukod nagapakita nga si Theodotus, isa ka saserdote kag lider sang sinagoga diri, “nagtukod sang sinagoga agod basahan sang Torah kag . . . dugang pa, sang dalayunan, kag mga kuarto, kag instalasyon sang tubig para sa nagadayon nga mga estranghero.”