Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NOBIEMBRE 2015

 TOPIKO SA KOBER | ANO ANG PAGTAMOD SANG DIOS SA INAWAY?

Ang Pagtamod sang Dios sa Inaway Karon

Ang Pagtamod sang Dios sa Inaway Karon

Sa karon, ang mga tawo ginapigos. Madamo ang sulitsulit nga nagapangayo sing bulig sa Dios kag nagapalibog kon bala buligan sila. Ginapamatian bala sang Dios ang ila pagpangayo sing bulig? Kag kamusta naman ang mga nagapakig-away agod mauntat ang pagpigos sa ila? Ginabuligan bala sila sang Dios, kag ginatamod nga makatarunganon ang ila pagpakig-away?

Ang Armageddon amo ang inaway nga magapauntat sa tanan nga inaway

Una, makapaumpaw gid ini nga kamatuoran: Nakita sang Dios ang pag-antos karon sa kalibutan, kag may himuon sia sa sini. (Salmo 72:13, 14) Sa iya Pulong, ang Biblia, nagsaad ang Dios nga ang mga “nagaantos sang kapipit-an hatagan sang kapahuwayan.” San-o? “Kon ipahayag na si Ginuong Jesus halin sa langit kaupod ang iya gamhanan nga mga anghel . . . samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.” (2 Tesalonica 1:7, 8) Ining pagpahayag kay Jesus matabo sa palaabuton sa ginatawag sang Biblia nga “inaway nga mahanabo sa daku nga adlaw sang Dios nga Labing Gamhanan,” nga ginatawag man nga Armageddon.—Bugna 16:14, 16.

Sa sinang palaabuton nga inaway, gamiton sang Dios, indi ang mga tawo, kundi ang iya Anak nga si Jesucristo, upod ang iban nga gamhanan nga mga espiritu agod makig-away sa mga malauton. Tapuson sang puersa sa langit ang tanan nga pagpigos.—Isaias 11:4; Bugna 19:11-16.

Asta subong, wala nagbag-o ang pagtamod sang Dios sa inaway. Ginatamod niya gihapon ang inaway nga makatarunganon nga paagi agod tapuson ang pagpigos kag kalautan. Apang ginapakita sang kasaysayan nga ang Dios lamang ang may kinamatarong nga magdesisyon kon san-o mahanabo ang inaway kag kon sin-o ang magapakig-away. Subong sang nakita naton,  nagdesisyon na ang Dios nga ang inaway nga magatapos sa kalautan kag magatimalos para sa mga imol mahanabo sa palaabuton kag ang magapakig-away sini amo ang iya Anak nga si Jesucristo. Buot silingon, ang mga inaway karon sa duta wala ginakahamut-an sang Dios, bisan pa daw maayo ang katuyuan sini.

Sa pag-ilustrar: Halimbawa may duha ka mag-utod nga nagaaway samtang wala ang ila amay. Nag-untat anay sila sa pag-away kag gintawgan ang ila amay sa telepono. Ang isa nagsiling nga ang iya utod amo ang nagsugod sang inaway, samtang ang utod naman nagsiling nga ginasimusimo sia. Ang kada isa nagapanugid sa ila amay, kag nagalaum nga apinan niya. Apang sa tapos sila mabatian, ginsilingan sila sang ila amay nga untatan na ang pag-away kag hulaton sia nga husayon sila pagpauli niya. Sang primero naghulat sila. Apang wala madugay nag-away na naman sila. Pagpauli sang amay, wala gid sia nalipay sa ginhimo nila kag ginsilutan sila nga duha bangod wala sila nagtuman.

Sa karon, ang nagainaway nga mga pungsod nagapangayo sing bulig sa Dios. Apang ang Dios wala nagadampig sa mga inaway karon. Sa iya Pulong, ang Biblia, maathag sia nga nagsiling: “Indi magbalos sing malaut sa malaut kay bisan sin-o,” kag, “Indi kamo magtimalos.” (Roma 12:17, 19) Isa pa, nagsiling sia nga ang katawhan dapat ‘maghulat sing mapinasensiahon’ sa iya pagpanghikot, nga himuon niya sa Armageddon. (Salmo 37:7, footnote) Kon ang mga pungsod indi makahulat sa Dios kag makig-away sila, ginatamod niya ini nga makahas nga pagpakig-away kag wala gid sia nahamuot sa sini. Gani sa Armageddon, ipakita sang Dios ang iya kaakig kag husayon ang mga pag-ilinaway sang mga pungsod paagi sa ‘pagpauntat sa mga inaway sa bug-os nga duta.’ (Salmo 46:9; Isaias 34:2) Ang matuod, ang Armageddon amo ang inaway nga magapauntat sa tanan nga inaway.

Ang katapusan sang inaway isa sa madamo nga pagpakamaayo sang Ginharian sang Dios. Ginhinambitan ni Jesus ina nga gobierno sa iya bantog nga pangamuyo: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Indi lamang pagpauntaton sang Dios ang tanan nga inaway kundi dulaon man niya ang tanan nga kabangdanan sang inaway, ang kalautan. * (Salmo 37:9, 10, 14, 15) Amo gani nga ang mga sumulunod ni Jesus nalangkag gid sa mga pagpakamaayo sang Ginharian sang Dios.—2 Pedro 3:13.

Apang daw ano kalawig kita magahulat para tapuson sang Ginharian sang Dios ang tanan nga pag-antos, pagpigos, kag kalautan? Ang katumanan sang mga tagna sang Biblia nagapakita nga nagakabuhi na kita sa “katapusan nga mga adlaw” sining sistema sang mga butang. (2 Timoteo 3:1-5) * Sa indi madugay tapuson sang Ginharian sang Dios ining katapusan nga mga adlaw sa inaway sa Armageddon.

Subong sang ginsambit kaina, ang mga malaglag sa katapusan nga inaway amo ang mga wala “nagatuman sa maayong balita tuhoy sa aton Ginuong Jesus.” (2 Tesalonica 1:8) Apang dumduma nga wala nalipay ang Dios sa kamatayon sang bisan sin-o, lakip na sang malauton. (Ezequiel 33:11) Bangod “indi niya luyag nga ang bisan sin-o malaglag,” sa sining katapusan nga inaway, ginasiguro niya karon nga ining maayong balita tuhoy sa aton Ginuong Jesus ‘mabantala sa bug-os nga duta subong panaksi sa tanan nga pungsod’ antes mag-abot ang katapusan. (2 Pedro 3:8, 9; Mateo 24:14; 1 Timoteo 2:3, 4) Paagi sa bug-os kalibutan nga pagbantala sang mga Saksi ni Jehova, ang mga tawo karon may kahigayunan nga makilala ang Dios, magtuman sa maayong balita tuhoy kay Jesus, kag magkabuhi sa tion nga wala na sing inaway.

^ par. 9 Dulaon man sang Ginharian sang Dios ang kaaway sang katawhan nga kamatayon. Subong sang ginapakita sang artikulo nga “Sabat sa mga Pamangkot sa Biblia” banhawon sang Dios ang indi maisip nga tawo, lakip na ang madamo nga nangin biktima halin sang una sang inaway.

^ par. 10 Para sa dugang nga impormasyon parte sa katapusan nga mga adlaw, tan-awa ang kapitulo 9 sang libro nga Ano Gid ang Ginatudlo sang Biblia? nga ginbalhag sang mga Saksi ni Jehova.

Magtuon sing Dugang Pa

Ang Matuod nga Balasulon sa Inaway kag Pag-antos

Paano gin-angot sang Biblia ang inaway sa langit sa bug-os kalibutan nga inaway kag pag-antos sa duta?

Ngaa Wala Nagaentra sa Inaway ang mga Saksi ni Jehova?

Kilala ang mga Saksi ni Jehova sa bilog nga kalibutan nga wala nagaentra sa inaway. Hibalua kon ngaa amo sini ang ila panindugan.