Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Oktubre 2015

 ANG BIBLIA NAGAPABAG-O SANG KABUHI

Nabatyagan Ko Na nga Makabulig Ako sa Iban

Nabatyagan Ko Na nga Makabulig Ako sa Iban
  • NATAWO: 1981

  • PUNGSOD: GUATEMALA

  • KABUHI SANG UNA: MASINULUB-ON NGA BATA

ANG AKON NAGLIGAD:

Natawo ako sa Acul, isa ka naligwin nga banwa sa nakatundan nga kabukiran sang Guatemala. Ang akon pamilya miembro sang Ixil nga tribo, nga kaliwatan sang Maya. Wala labot sa Espanyol, nagdaku ako nga nagahambal sang amon tumandok nga lenguahe. Nagdaku ako sa magamo nga tion sang 36 ka tuig nga inaway sibil sa Guatemala. Sa sini nga tion madamo nga Ixil ang napatay.

Sang kuatro anyos ako, aksidente nga naglupok ang granada nga ginahampangan sang akon magulang nga siete anyos. Nabulag ako bangod sini kag napatay gid ang akon magulang. Pagkatapos sadto, nag-istar ako sa isa ka institusyon para sa bulag nga mga bata sa Guatemala City, diin nakatuon ako sang Braille. Wala ko gid maintiendihan kon ngaa gindumilian ako sang mga nagadumala nga makig-istorya sa iban nga bata kag kon ngaa ginalikawan ako sang iban nga estudyante. Pirme ako nasubuan kag ginakahidlawan ko ang duha ka bulan kada tuig nga makapauli ako sa akon mabuot kag mapinalanggaon nga iloy. Makapasubo nga napatay sia sang dies anyos ako. Sang nadula ang nagaisahanon nga tawo nga nagapalangga sa akon, nasakitan gid ako.

Sa edad nga 11 anyos, nagpauli ako sa amon banwa kag nag-istar sa akon utod sa amay upod ang iya pamilya. Gin-atipan nila ako sa pisikal, pero wala sing nakabulig sa akon sa emosyonal. Kon kaisa, ginapamangkot ko ang Dios: “Ngaa napatay si Nanay? Ngaa nabulag ako?” Ginhambalan ako sang mga tawo nga pagbuot sang Dios ini nga mga trahedya. Naghinakop ako nga ang Dios wala sing balatyagon kag indi makatarunganon. Ang rason kon ngaa wala ako naghikog amo nga wala ako sing gamiton sa paghimo sini.

Bangod bulag ako, mahuyang ako kag madali mabiktima. Sang bata pa ako, pila ka beses ako nga ginmolestiya. Wala ko ini ginreport kay pamatyag ko wala sing may magsapak sa sini. Talagsa lang ako ginaistorya sang mga tawo, kag wala ako nagapakig-istorya sa iban. Gusto ko mag-isahanon kag nasubuan gid ako, kag wala ako sing salig kay bisan sin-o.

KON PAANO GINBAG-O SANG BIBLIA ANG AKON KABUHI:

Sang tin-edyer ako, ginkadtuan ako sang duha ka Saksi ni Jehova (mag-asawa) sa tion sang paglingawlingaw sa eskwelahan. Ang isa sa mga manunudlo sa eskwelahan, nga naluoy sa akon kahimtangan, nangabay sa ila nga kadtuan ako. Ginsugiran nila ako sang saad sang Biblia nga banhawon ang mga patay kag maabot ang tion  nga makakita liwat ang mga bulag. (Isaias 35:5; Juan 5:28, 29) Nanamian ako sang ila gintudlo sa akon, pero nabudlayan ako makighambal sa ila kay wala ako naanad nga makig-istorya. Bisan pa daw wala ako nagapakig-istorya sa ila, mainayuhon kag mapinasensiahon sila nga nagbisita sa akon agod tudluan ako sa Biblia. Ini nga mag-asawa nagalakat sing sobra 10 ka kilometro sa kabukiran agod makalab-ot sa amon banwa.

Ginsugid sa akon sang akon utod nga mahipid sila mamayo bisan pigado lang sila. Apang ginapakitaan nila ako pirme sing personal nga interes, kag ginahatagan nila ako sing gamay nga mga regalo. Nagapati ako nga matuod lamang nga mga Cristiano ang makapakita sina nga sakripisyo.

Nagtuon ako sa Biblia paagi sa Braille nga mga publikasyon. Bisan pa naintiendihan ko ang akon natun-an, may pila ka butang nga daw indi ko mabaton. Halimbawa, nabudlayan ako magpati nga nagaulikid gid ang Dios sa akon kag pareho man sa Dios ang pagtamod sang iban sa akon. Nahangpan ko kon ngaa temporaryo nga ginatugutan ni Jehova ang kalautan, pero nabudlayan ako nga kabigon sia nga isa ka mahigugmaon gid nga Amay. *

Amat-amat nga nagbag-o ang akon pagtamod bangod sang akon natun-an sa Kasulatan. Halimbawa, natun-an ko nga naluoy gid ang Dios sa mga nagaantos. Tuhoy sa iya mga sumilimba nga ginapigos, ang Dios nagsiling: “Nakita ko gid ang pag-antos sang akon katawhan . . . nahibaluan ko gid ang ila pag-antos.” (Exodo 3:7) Sang naapresyar ko ang maayo nga mga kinaiya ni Jehova, napahulag ako nga idedikar sa iya ang akon kabuhi. Sang 1998, nabawtismuhan ako subong Saksi ni Jehova.

Upod sa utod nga nagpaistar sa akon sa ila balay

Mga isa ka tuig sa tapos ako nabawtismuhan, nagtambong ako sa klase para sa mga bulag malapit sa siudad sang Escuintla. Nahibaluan sang isa ka gulang sa sina nga kongregasyon nga mabudlayan gid ako sa pagtambong sa mga pagtilipon kon sa amon banwa pa ako maistar. Kay man, ang pinakamalapit nga kongregasyon halos pareho kalayo sa ginalakbay nga kabukiran sang mag-asawa nga Saksi nga nagtuon sa akon, kag mabudlay gid sa akon ang pagbiyahe. Para mabuligan ako, nangita ang gulang sing pamilya nga Saksi sa Escuintla nga handa magpaistar sa akon sa ila balay kag magbulig sa akon nga makatambong sa mga pagtilipon sang kongregasyon. Asta subong, ginaatipan nila ako nga daw miembro sang ila pamilya.

Madamo pa ako sing masugid nga halimbawa sang matuod nga gugma nga ginapakita sa akon sang mga miembro sang kongregasyon. Sa kabilugan, nakumbinsi ako sini nga mga eksperiensia nga subong isa sa mga Saksi ni Jehova, lakip ako sa matuod nga mga Cristiano.—Juan 13:34, 35.

MGA BENEPISYO:

Wala na ako nagabatyag subong nga wala sing pulos kag wala sing paglaum. May katuyuan na karon ang akon kabuhi. Subong bug-os tion nga ministro sang mga Saksi ni Jehova nga nagatudlo sing Biblia, masako ako sa pagtudlo sa iban tuhoy sa hamili nga mga kamatuoran sa Biblia sa baylo nga mamensar pirme sang akon kasablagan. Subong man, may pribilehiyo ako nga mangin gulang sang kongregasyon kag nagapamulongpulong sa mga kongregasyon sa amon lugar. Nakapribilehiyo pa gani ako sa paghatag sing pamulongpulong base sa Biblia sa rehiyonal nga mga kombension diin linibo ang nagtambong.

Nagapamulongpulong nga nagagamit sang akon Braille nga Biblia

Sang 2010, naggradweyt ako sa Ministerial Training School (ginatawag karon nga School for Kingdom Evangelizers) nga ginhiwat sa El Salvador. Nahanas ako sa sini nga eskwelahan agod mahimo sing mas maayo ang akon mga responsibilidad sa kongregasyon. Ini nga paghanas nagpabatyag sa akon nga ginapabaloran kag ginahigugma ako ni Jehova nga Dios, nga nagahimo kay bisan sin-o nga mangin kalipikado sa iya hilikuton.

Nagsiling si Jesus: “Mas malipayon ang nagahatag sangsa nagabaton.” (Binuhatan 20:35) Sa karon, masiling ko gid nga malipayon ako, kag bisan pa sadto wala ko ginhunahuna nga posible ini, sa karon nabatyagan ko na nga makabulig ako sa iban.

^ par. 13 Para sa dugang nga impormasyon kon ngaa ginatugutan sang Dios ang kalautan, basaha ang kapitulo 11 sang libro nga Ano Gid ang Ginatudlo sang Biblia? nga ginabalhag sang mga Saksi ni Jehova.