Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2015

 TOPIKO SA KOBER | MAKABENEPISYO KA BALA SA PAGPANGAMUYO?

Ngaa Nagapangamuyo ang mga Tawo?

Ngaa Nagapangamuyo ang mga Tawo?

“Adik ako sadto sa panahor. Nangamuyo ako nga magdaug sing daku nga kantidad. Wala gid ini natabo.”—Samuel, * Kenya.

“Sa eskwelahan, nagapangamuyo kami sang saulado nga mga pangamuyo nga gintudlo sa amon.” —Teresa, Pilipinas.

“Nagapangamuyo ako kon may mga problema ako. Ginapangamuyo ko nga patawaron ang akon mga sala kag mangin mas maayo ako nga Cristiano.” —Magdalene, Ghana.

Ginapakita sang mga komento nanday Samuel, Teresa, kag Magdalene nga madamo ang rason kon ngaa nagapangamuyo ang mga tawo, kag ang rason sang iban mas maayo. Ang pila ka tawo nagapangamuyo sing tinagipusuon samtang ang iban naman ginasaulo lang. Apang nagapangamuyo man sila agod makapasar sa mga eksaminasyon sa eskwelahan, ukon nagapangamuyo agod magdaug ang paborito nga team sa sports, agod tuytuyan sang Dios ang ila pamilya, ukon iban pa nga rason, minilyon ka tawo ang nagabatyag nga dapat gid mangamuyo. Suno sa isa ka surbe, bisan ang mga tawo nga wala sing relihion pirme nagapangamuyo.

Nagapangamuyo ka bala? Kon amo, ano ang ginapangamuyo mo? Nagapangamuyo ka man pirme ukon wala, mahimo maghunahuna ka: ‘May kaayuhan gid bala ang pagpangamuyo? May nagapamati bala?’ Ang isa ka manunulat nagsiling nga ang pangamuyo “isa [lang] ka paagi agod magnami ang imo pamatyag . . . pareho sang pag-istorya sa imo hinuptanan nga isda.” Amo man sini ang pagtamod sang pila ka doktor, kag ginatawag nila ang pangamuyo nga “alternatibo nga pagbulong.” Ang pangamuyo bala para sa iban isa lang ka rutina ukon ginahimo nila ini para magnami lang ang ila pamatyag?

Sa pihak nga bahin, ginapakita sang Biblia nga ang pangamuyo indi lang isa ka paagi agod magnami ang aton pamatyag. Ginasugid sini sa aton nga may nagapamati gid sa mga pangamuyo nga ginahimo sa husto nga paagi kag sa husto nga rason. Matuod bala ini? Lantawon naton ang pamatuod.

^ par. 3 Gin-islan ang pila ka ngalan.