Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2015

Nagalain Bala ang Buot Mo sa Dios?

Nagalain Bala ang Buot Mo sa Dios?

“NGAA AKO PA? Ngaa gintugutan sang Dios nga matabo ini sa akon?” Mga pamangkot ini nga nagtublag sa 24 anyos nga si Sidnei nga taga-Brazil. Sa tapos sang aksidente sa padalus-usan sang tubig, naga-wheelchair na lang sia.

Nagalain ang buot sang mga tawo sa Dios bangod nagaantos sila sa aksidente, balatian, kamatayon sang hinigugma, kalamidad, ukon inaway. Nagakatabo na ini sang una pa. Ang patriarka nga si Job sang dumaan nga tion nangin biktima sang sunodsunod nga kalamidad. Sayop nga ginbasol niya ang Dios nga nagasiling: “Nangayo ako sing bulig, apang wala mo ako ginbuligan; nagtindog ako, apang gintulok mo lang ako. Nangin mapintas ka sa akon; bug-os kusog mo ako nga ginsalakay.”Job 30:20, 21.

Wala nahibaluan ni Job ang kabangdanan sang iya mga kabudlayan ukon kon ngaa natabo ini sa iya. Maayo kay ginapaathag sa aton sang Biblia ang rason kon ngaa nagakatabo ina kag kon ano ang dapat nga reaksion naton sa sini.

TUYO BALA SANG DIOS NGA MAG-ANTOS ANG MGA TAWO?

Parte sa Dios, ginasugiran kita sang Biblia: “Himpit ang iya hinimuan, matarong ang tanan niya nga ginahimo. Matutom sia nga Dios kag wala gid sing pagkadimatarong sa iya; matarong sia kag matadlong.” (Deuteronomio 32:4) Kon amo sina, nagakabagay bala ukon rasonable nga ang ‘matarong kag matadlong’ nga Dios magapaantos sa mga tawo ukon gamiton niya ang mga kalamidad agod silutan ukon putlion sila?

Sa kabaliskaran, ginasilingan kita sang Biblia: “Kon ang isa yara sa pagtilaw, indi sia magsiling: ‘Ginatilawan ako sang Dios.’ Kay ang Dios indi matilawan paagi sa malaut nga mga butang kag wala man sia nagatilaw sa kay bisan sin-o.” (Santiago 1:13) Ang matuod, natun-an naton sa Biblia nga himpit ang kahimtangan sang gintuga sang Dios ang tawo. Ginhatagan niya ang una nga mga tawo, sanday Adan kag Eva, sing matahom nga puluy-an, sing tanan nga kinahanglanon sa kabuhi, kag sing makalilipay nga mga buluhaton. Ginsilingan sila sang Dios: “Magpanganak kamo kag magdamo, pun-a ninyo ang duta kag dumalahan ini.” Wala gid sing rason nga maglain ang buot nanday Adan kag Eva sa Dios.Genesis 1:28.

Pero ang mga kahimtangan karon indi gid himpit. Ang matuod, sa bug-os nga kasaysayan, malain gid ang kahimtangan sang mga tawo. Matuod gid ini nga paglaragway: “Ang tanan nga tinuga padayon nga nagaugayong sing tingob kag ginasakitan tubtob karon.” (Roma 8:22) Ano ang natabo?

NGAA MAY PAG-ANTOS?

Agod mahangpan kon ngaa may pag-antos, balikan naton ang tion nga nagsugod ini. Bangod ginsulsulan sang nagrebelde nga anghel, nga gintawag sang ulihi nga Satanas nga Yawa, ginsikway nanday Adan kag Eva ang mga talaksan sang Dios parte sa husto kag sayop nga ginarepresentar sang sugo sa ila nga indi magkaon “sang bunga sang kahoy sang pagkilala sang maayo kag malain.” Ginsilingan sang Yawa si Eva nga indi sila mapatay kon supakon nila ang Dios, sa amo ginapagua niya nga butigon ang Dios. Ginsumbong man ni Satanas ang Dios nga ginadingot niya sa iya mga sakop ang kinamatarong sa paghibalo kon ano ang maayo kag malain. (Genesis 2:17; 3:1-6) Ginpahangop ni Satanas nga mas maayo ang kahimtangan sang katawhan kon wala ang paggahom sang Dios. Tanan ini nagpautwas sing importante nga hulusayon—Takus bala ang Dios sa paggahom?

May ginpautwas pa nga hulusayon ang Yawa. Ginsumbong niya nga ang mga tawo nagaalagad lang sa Dios bangod sang makagod nga motibo. Tuhoy sa matutom nga si Job, ang Yawa nagsiling sa Dios: “Indi bala nga ginaamligan mo sia kag ang iya panimalay kag ang tanan nga yara sa iya? . . . Apang untaya ang imo kamot kag kuhaa ang tanan nga yara sa iya, kag pat-od gid nga sikwayon ka niya.” (Job 1:10, 11) Bisan pa ang ginsiling sang Yawa nagapatuhoy kay Job, ginapahangop niya nga ang tanan nga tawo may makagod nga motibo sa pag-alagad sa Dios.

KON PAANO GINASOLBAR SANG DIOS ANG MGA HULUSAYON

Ano ang pinakamaayo nga paagi para masolbar ining importante nga hulusayon? Ang Dios, nga pinakamaalam sa tanan, may pinakamaayo nga solusyon —ang paagi nga indi maglain ang aton buot. (Roma 11:33) Nagdesisyon sia nga tugutan ang mga tawo nga gamhan ang ila kaugalingon sa sulod sang pila ka tion kag pamatud-an sang mga resulta sini kon kay sin-o pagginahom ang pinakamaayo.

Ang miserable nga mga kahimtangan sa duta karon maathag nga nagapamatuod nga napaslawan ang paggahom sang tawo. Wala lang napaslawan ang gobierno sa kalibutan sa pagpaluntad sang paghidait, kalig-unan, kag kalipay kundi ginalaglag man nila ang duta. Nagapamatuod ini sang importante nga kamatuoran nga ginasiling sang Biblia: “Wala sing ikasarang ang tawo sa pagtuytoy sang iya tikang.” (Jeremias 10:23) Ang pagginahom lamang sang Dios ang makapaluntad sing dayon nga paghidait, kalipay, kag kahamungayaan sa katawhan, bangod amo ina ang katuyuan sang Dios.Isaias 45:18.

Kon amo, paano tumanon sang Dios ang iya katuyuan para sa katawhan? Dumduma nga gintudluan ni Jesus ang iya mga sumulunod nga mangamuyo: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Huo, sa gintalana nga tion, dulaon sang Dios, paagi sa iya Ginharian, ang tanan nga kabangdanan sang pag-antos. (Daniel 2:44) Wala na ang kaimulon, balatian, kag kamatayon. Tuhoy sa mga imol, ginapakita sang Biblia nga “luwason [sang Dios] ang imol nga nagapangayo sing bulig.” (Salmo 72:12-14) Parte naman sa nagabalatian, ang Biblia nagasaad: “Wala sing pumuluyo nga magasiling: ‘Nagamasakit ako.’” (Isaias 33:24) Tuhoy naman sa mga patay nga yara sa handumanan sang Dios, si Jesus nagsiling: “Magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Makalilipay gid ini nga mga saad!

Ang pagtuo sa mga saad sang Dios magabulig sa aton nga maatubang ang bisan ano nga kalain sang buot sa iya

PAG-ATUBANG SA KALAIN SANG BUOT

Pagligad sang mga 17 ka tuig sa tapos sang aksidente, si Sidnei, nga ginsambit sa umpisa sini nga artikulo, nagsiling: “Wala ko gid ginabasol si Jehova nga Dios sa aksidente, pero ginaako ko nga sang primero naglain ang buot ko sa iya. May mga tion nga naluyahan gid ako, kag nagahibi kon madumduman ko ang akon pisikal nga kasablagan. Apang, paagi sa Biblia nahangpan ko nga ang aksidente indi silot sang Dios. Subong sang ginasiling sang Biblia, ‘ang tion kag ang wala ginapaabot nga hitabo nagakatabo sa aton tanan.’ Ang pagpangamuyo kay Jehova kag ang pagbasa sing espesipiko nga mga kasulatan nagpabakod sa akon sa espirituwal kag nagbulig sa akon nga magpabilin nga positibo.”Manugwali 9:11; Salmo 145:18; 2 Corinto 4:8, 9, 16.

Ang pagdumdom sa mga rason kon ngaa gintugutan sang Dios ang pag-antos kag kon paano madula sa indi madugay ang mga epekto sini magabulig sa aton nga maatubang ang bisan ano nga kalain sang buot naton sa Dios. Makasalig kita nga ang Dios “nagapadya sa mga hanuot nga nagapangita sa iya.” Indi gid mapaslawan ang bisan sin-o nga nagatuo sa iya kag sa iya Anak.Hebreo 11:6; Roma 10:11.

Magtuon sing Dugang Pa

Ngaa Dapat Tun-an ang Biblia?

Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?