Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2015

 SUGILANON SANG KABUHI

Nasapwan Ko ang Mas Maayo Pa sa Kabantugan

Nasapwan Ko ang Mas Maayo Pa sa Kabantugan

Isa ka gab-i sang 1984, nagbag-o ang akon kabuhi halin sa ordinaryo lang nga tin-edyer pakadto sa bantog nga tawo. Ginkoronahan ako subong Miss Hong Kong. Ang akon piktyur makita sa panghapin sang mga magasin kag mga pamantalaan. Nagkanta ako, nagsaot, nagpamulongpulong, nag-host sa mga programa sa TV, nagsuksok sing manami nga mga bayo, kag nag-atubang sa prominente nga mga tawo, pareho sang gobernador sang Hong Kong.

Pagkasunod nga tuig, nangin artista ako, kag pila ka beses nga ako ang bida. Gusto mahibaluan sang mga reporter ang akon kabuhi, gusto ako kodakan sang mga potograper, kag gusto ako makita sang mga tawo sa mga premiere, ribbon cutting, kag gusto nila ako makaupod sa pagkaon. Ako pirme ang sentro sang atension.

Sa isa ka aksion nga pelikula

Apang amat-amat ko nga narealisar nga ini tanan indi man gid gali manami subong sang ginahunahuna ko. Kalabanan sang akon pelikula mga aksion, kag delikado gid yadto. Ang mga artista sa Hong Kong wala nagagamit sing dobol pareho sang mga artista sa Hollywood, gani ako mismo ang nagahimo sang akon mga stunt, pareho sang pagpalumpat sang motor sa ibabaw sang awto. Madamo ako sing pelikula nga imoral kag bayolente. Ang pila nagapakita sing demonismo.

Sang 1995, nakapamana ako sang isa ka prodyuser sang pelikula. Bisan daw yara na ang tanan sa akon agod mangin malipayon—kabantugan, manggad, kag mahigugmaon nga bana—napung-awan ako kag nasubuan. Nagdesisyon ako nga mag-untat sa pag-artista.

NADUMDUMAN KO ANG AKON PAGTUO SANG BATA PA AKO

Nadumduman ko ang akon pagtuo sang bata pa ako. Kada Sabado sadto, nagakadto kami sang akon magulang nga babayi sa isa ka pamilya nga Saksi ni Jehova. Ang tatay, nga si Joe McGrath, nagtuon sa Biblia sa amon upod sa iya tatlo ka bata nga babayi. Malipayon kag mahigugmaon gid ang ila pamilya, kag palangga ni “Uncle Joe” ang iya asawa kag kabataan. Nanamian man ako mag-upod sa ila Cristianong mga pagtilipon. Kon kaisa nagatambong kami sa dalagku nga mga asembleya. Malipayon gid yadto nga tion. Wala ako nagakabalaka kon upod ko ang mga Saksi.

Sa kabaliskaran, malain gid ang nagakatabo sa akon sa amon panimalay. Nagakunsumisyon si Nanay sa batasan ni Tatay, kag napung-awan gid sia. Sang mga dies anyos ako, nag-untat si Nanay sa pagpakig-upod  sa mga Saksi ni Jehova. Nagpadayon lang ako bisan pakulahaw kag nabawtismuhan sa edad nga 17 anyos. Apang wala magdugay, nadalahig ako sa indi Cristiano nga paggawi kag indi na bahin sang kongregasyon.

NAGDESISYON AKO NGA MANUMBALIK

Wala magdugay sa tapos sang akon kasal, ginduaw ako sang duha ka manugtatap halin sa kongregasyon sang mga Saksi ni Jehova. Ginpaathag nila kon paano ako makapanumbalik kay Jehova nga Dios, kag naghimo sila sing kahimusan para buligan ako sang misyonera nga si Cindy. Sa sini nga tion, halos nadula na ang akon pagtuo, gani ginpangabay ko sia nga pamatud-an sa akon nga ang Biblia Pulong gid sang Dios. Ginpakita niya sa akon ang mga halimbawa sang mga tagna sa Biblia nga nagakatuman. Nangin suod kami nga mag-amiga, kag gin-agda niya ako nga tun-an namon ang panguna nga mga panudlo sang Biblia. Nagpasugot ako. Sa una nga tion, nahangpan ko nga si Jehova isa ka mahigugmaon nga Dios, kag gusto niya nga mangin malipayon ako.

Sang nagtambong ako liwat sa Cristianong mga pagtilipon, nalipay gid ako makig-upod sa mga Saksi kon ipaanggid sa mga kaupod ko sa mga pelikula. Pero bangod sang akon naeksperiensiahan sang bata pa ako, wala ako sing salig sa kay bisan sin-o, kag akig ako sa akon kaugalingon. Nabuligan ako sang isa ka miembro sang kongregasyon sang ginpakita niya sa akon sa Biblia kon paano atubangon ina nga mga problema sa emosyon, kag nakakita man ako sing matuod nga mga abyan.

MAS MAAYO PA SANGSA KABANTUGAN

Sang 1997, nagsaylo kami sang akon bana sa Hollywood, California, U.S.A. Nangin masako gid ako diri sa pagbulig sa mga tawo nga makabenepisyo sa kaalam sang Pulong sang Dios. Ang pagtudlo sing Biblia nakahatag sa akon sing daku nga kalipay sangsa kabantugan sa pag-artista kag mangin bida sa mga pelikula. Halimbawa, sang 2002, nagkitaay kami ni Cheri, nga madugay ko na nga kilala sa Hong Kong. Halos pareho ang amon mga eksperiensia sa kabuhi. Nangin Miss Hong Kong sia isa ka tuig antes sa akon. Ang matuod, sang nagdaug ako, sia ang nagkorona sa akon. Nangin artista man sia kag sang ulihi nangin prodyuser, kag nakatrabaho upod ang bantog nga mga direktor. Nagsaylo man sia sa Hollywood.

Naluoy ako kay Cheri sang nahibaluan ko nga napatay ang iya nobyo sa atake sa korason. Wala sia nalugpayan sang iya relihion nga Budhismo. Pareho sa akon, natigayon man niya ang kabantugan nga ginakahisaan sang iban, pero nasubuan sia kag wala sing salig sa kay bisan sin-o. Ginsugid ko sa iya ang akon natun-an sa Biblia, pero bangod Budhista sia, nabudlayan sia sa paghangop sa sini.

Ang akon amiga nga si Cheri sa ginahimuan sang pelikula

Isa ka adlaw sang 2003, gintawgan ako ni Cheri halin sa Vancouver, Canada, diin nagahimo sia sing pelikula. Malipayon nga ginsugid niya sa akon nga samtang nagamaneho sia kag nawili sa mga talan-awon sa kaumhan, hinali lang nga nangamuyo sia sing mabaskog: “Sugiri ako, Sin-o ang matuod nga Dios? Ano ang imo ngalan?” Sa sina nga tion, nalabayan niya ang Kingdom Hall kag nakita ang ngalan nga Jehova. Pamatyag niya, sabat ini sang Dios, kag gusto niya nga makapakig-istorya gilayon sa mga Saksi ni Jehova. Naghimo ako sing kahimusan, kag pila lang ka adlaw, nakatambong na sia sa Chinese nga kongregasyon sa Vancouver.

“Interesado gid sa akon ini nga mga tawo,” siling ni Cheri sa akon sang ulihi. “Puede ko sila sugiran sang akon ginabatyag.” Nalipay gid ako nga mabatian ina,  kay sang nagahimo si Cheri sang mga pelikula wala gid sia sing mga abyan. Nagpadayon si Cheri sa pagtambong sa mga pagtilipon. Pero sang 2005, nagpirma sia sing kontrata nga mangin prodyuser sang duha ka dumaan nga pelikula sa China, amo nga kinahanglan niya magpauli sa Hong Kong. Makalilipay kay sang 2006, gindedikar ni Cheri ang iya kabuhi kay Jehova kag nabawtismuhan sa asembleya sang mga Saksi sa Hong Kong. Gusto niya dugangan ang iya pag-alagad kay Jehova, apang nabudlayan gid sia bangod sang iya trabaho sa paghimo sing mga pelikula, kag indi sia malipayon.

ANG KALIPAY SA PAGBULIG SA IBAN

Sang 2009, nagbag-o gid ang kahimtangan ni Cheri. Nagdesisyon sia nga mag-untat sa paghimo sing mga pelikula agod madugangan ang iya pag-alagad kay Jehova. Madamo sia sing bag-o nga mga abyan sa Cristianong kongregasyon. Nangin bug-os tion sia nga manugbantala sang maayong balita sang Ginharian kag nalipay gid sia sa pagbulig sa mga tawo nga masapwan ang mas maayo nga kabuhi.—Mateo 24:14.

Nagtuon man si Cheri sing Nepalese agod suportahan ang nagadaku nga grupo sang mga Nepalese nga mga Saksi sa Hong Kong. Masiling ko nga ang kalabanan nga mga Nepalese sa Hong Kong ginahikayan kag wala ginasapak bangod haluson sila makahambal sing Ingles ukon Chinese kag bangod lain ang ila mga kustombre. Ginsugiran ako ni Cheri kon daw ano kadaku ang iya kalipay sa pagbulig nga mahangpan sini nga mga tawo ang Biblia. Halimbawa, isa ka adlaw sang nagapamalaybalay sia, naistorya niya ang isa ka Nepalese nga babayi nga diutay lang ang nahibaluan parte kay Jesus pero wala gid sing hinalung-ong parte sa matuod nga Dios, si Jehova. Gingamit ni Cheri ang Biblia agod ipakita sa iya nga si Jesus nangamuyo sa iya Amay sa langit. Sang nahangpan sang babayi nga puede sia makapangamuyo sa matuod nga Dios, nga ang ngalan si Jehova, ginbaton niya ang maayong balita. Sang ulihi ang iya bana kag bata nga babayi nagtuon man sa Biblia.—Salmo 83:18; Lucas 22:41, 42.

Si Cheri subong

Sang nakita ko kon daw ano ka malipayon si Cheri sa pagbantala sing bug-os tion, ginpamangkot ko ang akon kaugalingon, ‘Ano ang nagapugong sa akon nga himuon ang iya ginahimo?’ Sa sini nga tion, nakapauli na ako sa Hong Kong. Gin-organisar ko ang akon mga buluhaton agod makapakigbahin sing bug-os sa pagtudlo sing kamatuoran sa Biblia. Nasapwan ko nga ang pagpamati sa mga tawo kag pagbulig sa ila nga mahangpan ang Pulong sang Dios nagahatag sa akon sing matuod nga kalipay.

Nasapwan ko nga ang pagbulig sa mga tawo nga mahangpan ang Pulong sang Dios nagahatag sa akon sing matuod nga kalipay

Halimbawa, gintun-an ko sa Biblia ang isa ka Vietnamese nga babayi nga pirme nagakasubo kag nagahibi. Karon may malipayon na sia nga pagtamod sa kabuhi kag nalipay gid sia sa pagpakig-upod sa kongregasyon.

Nasapwan namon ni Cheri ang mas maayo pa sangsa kabantugan. Bisan pa nakunyag kami kag nangin bantog sa paghimo sing mga pelikula, ang pagtudlo sa mga tawo parte kay Jehova nga Dios mas makalilipay bangod nagahimaya ini sa iya. Naeksperiensiahan gid namon ang ginsiling ni Jesus: “Mas malipayon ang nagahatag sangsa nagabaton.”—Binuhatan 20:35.

Magtuon sing Dugang Pa

Ngaa Indi Dapat Magsunodsunod sa Makita sa Media?—Bahin 1: Para sa mga Babayi

Abi sang madamo nga tin-edyer may kaugalingon sila nga personalidad, pero ang matuod nagasunodsunod lang sila sa iban.