Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2015

 TOPIKO SA KOBER | KABUHI PAGKATAPOS SANG KAMATAYON—POSIBLE BALA?

May Paglaum Bala ang mga Patay?

May Paglaum Bala ang mga Patay?

Mabuhi pa bala ang mga patay?

ANG SABAT SANG BIBLIA: “Magaabot ang tion nga ang tanan nga yara sa handumanan nga mga lulubngan makabati sang . . . tingog [ni Jesus] kag magagua.”Juan 5:28, 29.

Gintagna ni Jesus nga sa palaabuton, sa tion sang iya paggahom sa Ginharian, wala na sing mga patay sa Lulubngan. “Nakibot gid ako sang una ko nga nabasa ang Juan 5:28, 29,” siling ni Fernando, nga ginsambit sa una nga artikulo. “Naghatag ini sa akon sang matuod nga paglaum, kag ginapanan-aw ko ang masanag nga palaabuton.”

Sang una, ang matutom nga si Job nagalaum nga kon mapatay sia banhawon sia sa ulihi sang Dios. Si Job namangkot: “Kon ang tawo mapatay, mabuhi pa bala sia liwat?” Dayon nagsabat sia nga may pagsalig: “Magahulat ako sa gintalana nga tion [sa Lulubngan] para sa akon, tubtob mag-abot ang akon kahilwayan. Magapanawag ka, kag magasabat ako.”Job 14:14, 15.

Ang pagbanhaw kay Lazaro nagahatag sa aton sing paglaum sa palaabuton

Ang utod ni Lazaro nga si Marta may ideya na parte sa pagkabanhaw. Sang napatay si Lazaro, si Jesus nagsiling sa iya: “Ang imo utod mabanhaw.” Si Marta nagsabat: “Nakahibalo ako nga mabanhaw sia sa tion sang pagkabanhaw sa katapusan nga adlaw.” Dayon nagsiling si Jesus sa iya: “Ako ang pagkabanhaw kag ang kabuhi. Ang isa nga nagatuo sa akon bisan pa mapatay, mabuhi liwat.” (Juan 11:23-25) Ginbanhaw gilayon ni Jesus si Lazaro! Inang makalilipay nga kasaysayan nagahatag sa aton sing ideya sa mas dalayawon nga hitabo sa palaabuton. Hunahunaa kon matabo ina nga pagkabanhaw sa bilog nga kalibutan!

May pila bala nga banhawon pakadto sa langit?

ANG SABAT SANG BIBLIA: Ginapakita sang Pulong sang Dios nga ang pagkabanhaw ni Jesus lain gid sa walo ka pagkabanhaw nga narekord sa Biblia. Yadtong walo ka tawo nagkabuhi liwat diri sa duta. Pero tuhoy sa pagkabanhaw ni Jesus, aton mabasa: ‘Si Jesucristo yara sa tuo sang Dios, kay nagkadto sia sa langit.’ (1 Pedro 3:21, 22) Nagaisahanon lang bala si Jesus nga ginbanhaw pakadto sa langit? Antes sini, ginsilingan ni Jesus ang iya mga apostoles: “Kon maglakat ako kag maghanda sang lugar para sa inyo, mabalik ako kag updon kamo, agod kon diin ako didto man kamo.”—Juan 14:3.

Ang Cristo nagkadto sa langit kag naghanda para sa pag-abot sang pila niya ka disipulo. Ang mga nabanhaw pakadto sa langit magadamo sa ulihi sing 144,000. (Bugna 14:1, 3) Apang ano ang himuon didto sang suod nga mga sumulunod ni Jesus?

Mangin masako gid sila! Ang Kasulatan nagasugid sa aton: “Malipayon kag balaan ang bisan sin-o nga  may bahin sa nahauna nga pagkabanhaw; wala sing awtoridad sa ila ang ikaduha nga kamatayon, kundi mangin mga saserdote sila sang Dios kag sang Cristo, kag magagahom sila subong mga hari upod sa iya sa sulod sang 1,000 ka tuig.” (Bugna 20:6) Gani ang mga nabanhaw pakadto sa langit magagahom subong mga hari kag mga saserdote sa duta upod sa Cristo.

Sin-o sa ulihi ang banhawon?

ANG SABAT SANG BIBLIA Ginrekord sang Kasulatan ang pamulongpulong ni apostol Pablo: “May paglaum ako sa Dios, nga amo man ang paglaum sini nga mga tawo, nga may pagkabanhaw sang mga matarong kag mga indi matarong.”Binuhatan 24:15.

Ginapasalig kita sang Pulong sang Dios nga binilyon nga napatay ang mabanhaw

Sin-o ang nalakip sa grupo nga ginsiling ni Pablo nga “mga matarong”? Binagbinaga ang isa ka halimbawa. Ang matutom nga si Daniel ginsilingan sang malapit na lang sia mapatay: “Magapahuway ka, apang magatindog ka para sa imo bahin sa katapusan sang mga adlaw.” (Daniel 12:13) Sa diin mabugtaw si Daniel gikan sa kamatayon? “Ang mga matarong magapanubli sang duta, kag magapuyo sila sa sini sa wala sing katubtuban.” (Salmo 37:29) Kag si Jesus nagtagna: “Malipayon ang mga malulo, kay magapanubli sila sang duta.” (Mateo 5:5) Si Daniel kag ang iban pa nga matutom nga mga lalaki kag babayi banhawon agod magkabuhi liwat sa duta sing dayon.

Sin-o ang nalakip sa grupo nga ginsiling ni Pablo nga “mga indi matarong”? Sila ang binilyon ka tawo nga nagkabuhi kag napatay, kag madamo sa ila ang wala nahatagan sing kahigayunan nga mahangpan kag maaplikar ang kamatuoran sa Biblia. Sa tapos sang ila pagkabanhaw, may kahigayunan sila nga mahibaluan kag makilala si Jehova * kag si Jesus. (Juan 17:3) Ang mga nagdesisyon nga mag-alagad sa Dios may paglaum nga mabuhi tubtob buhi si Jehova—wala sing katapusan.

Ang mga nagdesisyon nga mag-alagad sa Dios may paglaum nga mabuhi sing wala katapusan nga may himpit nga panglawas kag kalipay

Ano ang mangin kahimtangan sang duta?

ANG SABAT SANG BIBLIA: “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” (Bugna 21:4) “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini.”Isaias 65:21.

Hunahunaa ang pagkabuhi sa sina nga kahimtangan upod sa imo pinalangga nga ginbanhaw! Pero ang pamangkot amo, Paano mo masiguro nga matabo ang pagkabanhaw?

^ par. 15 Jehova ang ngalan sang Dios suno sa Biblia.

Magtuon sing Dugang Pa

Ano ang Katuyuan sang Dios Para sa Duta?

Ginapaathag sang Biblia kon ngaa gintuga sang Dios ang duta, kon san-o madula ang pag-antos, kag kon ano ang matabo sa duta sa palaabuton kag sa mga nagaistar sa sini.

Kabuhi sa Ginpasag-uli nga Paraiso

Paano mapasag-uli ang paraiso kag ano ang mangin kahimtangan sang kabuhi didto?