Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2015

 TOPIKO SA KOBER | KABUHI PAGKATAPOS SANG KAMATAYON—POSIBLE BALA?

Ano ang Nagakatabo Pagkatapos sang Kamatayon?

Ano ang Nagakatabo Pagkatapos sang Kamatayon?

“Abi ko may tatlo ka duog nga ginakadtuan kon mapatay ang tawo: langit, impierno, ukon purgatoryo. Kabalo ko nga indi ako maayo gid para magpalangit ukon malain gid para magpaimpierno. Indi maathag sa akon kon ano gid ang purgatoryo. Wala ko mabasa sa Biblia ang bisan diin sini. Siling lang ini sang mga tawo.”—Lionel.

“Gintudluan ako nga mapalangit ang tanan nga tawo kon mapatay, pero indi ako kumbinsido. Para sa akon ang kamatayon amo ang katapusan sang tanan—nga wala na sing palaabuton ang mga patay.”—Fernando.

Nagapalibog ka bala: ‘Ano gid ang nagakatabo sa kamatayon? Ang aton bala mga hinigugma nagaantos sa iban nga duog? Makita pa bala naton sila liwat? Paano kita makasiguro?’ Palihug binagbinaga kon ano gid ang ginatudlo sang Kasulatan. Una, usisaon naton kon ano ang ginasiling sang Biblia parte sa kamatayon. Dayon binagbinagon naton ang paglaum nga ginasiling sang Pulong sang Dios, ang Biblia.

 Ano ang kahimtangan sang mga patay?

ANG SABAT SANG BIBLIA: “Ang mga buhi nakahibalo nga mapatay sila, apang ang mga patay wala gid sing nahibaluan, kag wala na sila sing padya bangod nalipatan na sila. Himua ang tanan nga luyag mo himuon sa bug-os mo nga ikasarang, kay wala na sing hilikuton ukon plano ukon ihibalo sa Lulubngan nga imo kadtuan.” *Manugwali 9:5, 10.

Ang Lulubngan, amo ang ginakadtuan sang mga tawo kon mapatay sila; isa ini ka simbuliko nga duog ukon kahimtangan diin nagauntat ang panghunahuna ukon buluhaton. Ano ang pagtamod sang matutom nga si Job sa Lulubngan? Nadula ang iya tanan nga pagkabutang kag kabataan sa isa lang ka adlaw, dayon natubuan sia sing masakit nga mga hubag sa bilog nga lawas. Nangamuyo sia sa Dios: “Taguon mo ako sa Lulubngan [“sa impierno,” Catholic Douay Version].” (Job 1:13-19; 2:7; 14:13) Maathag nga wala nagapati si Job nga ang Lulubngan isa ka kalayuhon nga impierno, diin magadugang pa ang iya pag-antos. Sa baylo, nagahunahuna sia nga isa ini ka duog sang kapahuwayan.

May isa pa ka paagi agod mahibaluan ang kahimtangan sang mga patay. Mahimo naton usisaon ang mga rekord sa Kasulatan parte sa walo ka tawo nga nabanhaw.—Tan-awa ang kahon “ Walo ka Pagkabanhaw nga Ginalaragway sang Biblia.”

Wala sing isa sa sining walo ang nagsugid nga nagkadto sila sa duog sang kalipay ukon pag-antos. Kon ang mga nabanhaw nga tawo naghalin sa sina nga duog sang napatay sila, indi bala nga sugiran nila parte sa sini ang mga tawo? Kag indi bala nga ilakip ini sa rekord sang Biblia para mahibaluan sang tanan. Wala gid sing amo sini nga rekord sa Kasulatan. Maathag nga ining walo ka tawo wala gid sing masugid parte sa natabo sa ila sa tapos sang kamatayon. Ngaa? Bangod wala gid sila sing hinalung-ong, daw nagatulog lang sila sing mahamuok. Ang matuod, ginagamit kon kaisa sang Biblia ang pagtulog subong ilustrasyon sa pagpaathag sa kamatayon. Halimbawa, ang matutom nga si David kag si Esteban pareho nga ‘nagtulog sa kamatayon.’Binuhatan 7:60; 13:36.

Gani, ano ang paglaum sang mga patay? Makabugtaw pa bala sila sa sini nga katulugon?

^ par. 7 Sa Bag-ong Kalibutan nga Badbad sang Balaan nga Kasulatan, ang tinaga nga “Lulubngan” gingamit sa pagbadbad sang Hebreo nga tinaga nga “Sheol” kag Griego nga tinaga nga “Hades.” Ang pila ka bersion sang Biblia naggamit sang tinaga nga “impierno,” apang ang ideya sang kalayuhon nga duog diin ginapaantos ang mga patay wala nabase sa Kasulatan.

Magtuon sing Dugang Pa

May Ginbanhaw Gid Man Bala si Jesus?

Ano ang napamatud-an sang pagbanhaw ni Jesus parte sa mga saad niya sa palaabuton?