Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Hulyo 2015

 TOPIKO SA KOBER | KON PAANO ATUBANGON ANG KABALAKA

Kabalaka sa Katalagman

Kabalaka sa Katalagman

“Sang nabatian ko ang sirena, nagkubakuba ang akon dughan kag nagdalagan ako sa bomb shelter,” siling ni Alona. “Apang bisan didto na ako nabalaka gihapon ako. Mas grabe pa gid kon yara ako sa gua nga wala sing mapanaguan. Isa ka bes, sang nagalakat ako sa dalan, naghibi ako kag indi makaginhawa. Inoras pa antes ako maumpawan. Dayon nag-uwang liwat ang sirena.”

Si Alona

Ang inaway isa lang sa madamo nga ginatunaan sang katalagman. Halimbawa, kon madiskobrehan mo nga may malubha ka nga balatian ukon ang imo pinalangga, daw linukpan ka lang sang bomba. Ang iban naman nagakabalaka tuhoy sa palaabuton. Nabalaka sila, ‘Ang amon bala kabataan, ukon ang ila kabataan, magakabuhi sa kalibutan nga puno sing inaway, krimen, polusyon, indi kinaandan nga pagbag-o sa klima, kag mga epidemia?’ Paano naton maatubang ina nga mga kabalaka?

Nahibaluan naton nga nagakatabo ang malain nga mga butang, gani kon “makita sang tawo nga maalamon ang katalagman . . . nagapanago sia.” (Hulubaton 27:12) Subong nga ginapanikasugan naton nga amligan ang aton lawas, makahimo man kita sing mga tikang agod amligan ang aton mental kag emosyonal nga kapagros. Ang masingki nga kalingawan kag ang mga balita nga puno sing makakulugmat nga mga talan-awon nagadugang sang aton kabalaka pati na sang aton kabataan. Ang paglikaw sa sini nga mga talan-awon wala nagakahulugan nga ginabalewala mo kon ano ang matuod nga nagakatabo. Wala gindesinyo sang Dios ang aton utok nga maghunahuna  pirme sing malaut. Sa baylo, hunahunaon naton pirme ang mga “butang nga matuod, . . . matarong, matinlo, hiligugmaon.” Kon himuon naton ini, “ang Dios sang paghidait” magahatag sa aton sing malinong nga hunahuna.—Filipos 4:8, 9.

IMPORTANTE ANG PANGAMUYO

Ang matuod nga pagtuo nagabulig sa aton nga maatubang ang kabalaka. Ginapalig-on kita sang Biblia nga “mangin handa pirme sa pagpangamuyo.” (1 Pedro 4:7) Makapangayo kita sing bulig sa Dios kag sing kaalam kag kaisog nga batunon ang aton kahimtangan kag himuon ang aton tanan nga masarangan agod maatubang ini, kag nagasalig nga “nagapamati sia sa aton nahanungod sa bisan ano nga ginapangamuyo naton.”—1 Juan 5:15.

Upod sa iya bana nga si Avi

Ginapaathag sang Biblia nga si Satanas, indi ang Dios, “ang manuggahom sini nga kalibutan” kag “ang bug-os nga kalibutan yara sa gahom sang isa nga malauton.” (Juan 12:31; 1 Juan 5:19) Gani si Jesus wala naggamit sing malaragwayon nga mga tinaga sang gintudluan niya kita nga mangamuyo: “Luwasa kami sa isa nga malauton.” (Mateo 6:13) “Kon mag-uwang gani ang sirena, nagapangamuyo ako kay Jehova nga buligan ako nga makontrol ang akon balatyagon,” siling ni Alona. “Ginatawag man ako sang akon pinalangga nga bana kag nagapangamuyo upod sa akon. Nabuligan gid ako sang pangamuyo.” Pareho gid ini sa ginasiling sang Biblia: “Si Jehova malapit sa tanan nga nagapanawag sa iya, sa tanan nga nagapanawag sa iya sa pagkasinsero.”—Salmo 145:18, footnote.

ANG ATON PAGLAUM SA PALAABUTON

Sa iya Sermon sa Bukid, gintudluan ni Jesus ang iya mga sumulunod nga mangamuyo: “Magkari ang imo Ginharian.” (Mateo 6:10) Dulaon sing dayon sang Ginharian sang Dios ang tanan nga makahalalit nga kabalaka. Paagi kay Jesus, ang “Prinsipe sang Paghidait,” ‘pauntaton sang Dios ang mga inaway sa bug-os nga duta.’ (Isaias 9:6; Salmo 46:9) “Hukman niya [sang Dios] ang madamo nga tawo . . . Ang pungsod indi na makig-away sa iban nga pungsod, kag indi na sila magtuon sa pagpakig-away. . . . Wala sing magapahadlok sa ila.” (Miqueas 4:3, 4) Ang malipayon nga mga pamilya ‘magapatindog sing balay kag magapuyo sa sini, kag magatanom sila sing mga ulubasan kag magakaon sang bunga sini.’ (Isaias 65:21) “Kag wala sing pumuluyo nga magasiling: ‘Nagamasakit ako.’”—Isaias 33:24.

Sa karon, walay sapayan sang tanan nga paghalong, imposible nga malikawan pirme ang “wala ginapaabot nga hitabo” ukon malikawan nga matabuan nga yara kita sa isa ka lugar nga may natabo. (Manugwali 9:11) Sa sulod sang mga siglo, ang inaway, kasingki, kag balatian padayon nga nagapatay sa maayo nga mga tawo. Ano ang paglaum sining inosente nga mga biktima?

Mabuhi liwat ang indi maisip nga mga tawo, kag Dios lang ang nakahibalo sang ila kadamuon. Sa karon, nagakatulog sila, kag yara sila sa perpekto nga memorya sang Dios, asta sa adlaw nga “ang tanan nga yara sa handumanan nga mga lulubngan . . . magagua.” (Juan 5:28, 29) Tuhoy sa pagkabanhaw, ang Biblia nagapasalig sa aton: “Ini nga paglaum nga yara sa aton daw kaangay sang angkla para sa kalag, pat-od kag malig-on.” (Hebreo 6:19) Kag ang Dios “naghatag . . . sing garantiya sa tanan nga tawo paagi sa pagbanhaw niya [kay Jesus].”—Binuhatan 17:31.

Sa karon, bisan ang mga nagapanikasog sa pagpahamuot sa Dios makaatubang sing mga kabalaka. Paagi sa paghimo sing praktikal nga mga tikang, pagpalapit sa Dios paagi sa pangamuyo, kag pagpabakod sang ila paglaum sa palaabuton nga ginasiling sang Biblia, madinalag-on nga naatubang nanday Paul, Janet, kag Alona ang kabalaka. Pareho sang ginhimo sang Dios sa ila, “kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya.”—Roma 15:13.

Magtuon sing Dugang Pa

ANG LALANTAWAN

Ang Matuod nga Balasulon sa Inaway kag Pag-antos

Paano gin-angot sang Biblia ang inaway sa langit sa bug-os kalibutan nga inaway kag pag-antos sa duta?

SABAT SA MGA PAMANGKOT SA BIBLIA

Paghidait sa Duta—Paano?

Hibalua ang promisa sang Dios nga paghidait sa kalibutan paagi sa iya Ginharian.