Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Hulyo 2015

Mapahamut-an Gid Bala Naton ang Dios?

Mapahamut-an Gid Bala Naton ang Dios?

May nabasa ka sa Biblia parte sa mga tawo nga ginadayaw gid kag nagsiling ka sa imo kaugalingon, ‘Indi ko gid sila mailog!’ Mahimo masiling ka, ‘Indi ako matarong ukon wala sing kasawayan, kag indi pirme husto ang akon ginahimo.’

Si Job ‘wala sing kasawayan kag matarong nga tawo.’Job 1:1, footnote

Ang patriarka nga si Job ginlaragway nga ‘wala sing kasawayan kag matarong.’ (Job 1:1, footnote) Si Lot gintawag nga “matarong nga tawo.” (2 Pedro 2:8) Kag si David ginsiling nga nagahimo sing “matarong” sa panulok sang Dios. (1 Hari 14:8) Apang usisaon naton sing maayo ang kabuhi sadtong mga karakter sa Biblia. Makita naton nga (1) nakahimo sila sing sala, (2) may matun-an gid kita sa ila halimbawa, kag (3) mapahamut-an gid sang indi himpit nga mga tawo ang Dios.

NAKAHIMO SILA SING SALA

“Ginluwas [sang Dios] ang matarong nga si Lot, nga natublag gid sa matampalason nga paggawi sang indi matinumanon sa kasuguan nga mga tawo.”2 Pedro 2:7

Si Job nag-antos sing sunodsunod nga mga kabudlayan nga daw indi makatarunganon. Nagsala sia sa paghinakop nga indi importante sa Dios kon bala mahuptan niya ang pagtuo sa Iya ukon indi. (Job 9:20-22) Kumbinsido gid si Job nga matarong sia nga para sa iban daw ginapakamatarong pa niya ang iya kaugalingon sangsa Dios.—Job 32:1, 2; 35:1, 2.

Si Lot nangalag-ag sa paghimo sing maathag kag simple lang nga desisyon. Natublag gid sia sa grabe  nga imoralidad sang mga tawo sa Sodoma kag Gomorra, kag ‘nagaantos pa gani ang iya matarong nga kalag’ bangod sang ila ginahimo. (2 Pedro 2:8) Ginpahibalo sang Dios nga laglagon niya yadtong malaut nga mga siudad kag ginhatagan si Lot sing kahigayunan nga maluwas upod sa iya pamilya. Ayhan mahunahuna mo nga ang natublag nga si Lot amo ang una gid nga magbiya. Apang sa sining ital-ital nga tion, nagpabuyanbuyan sia. Kinahanglan pa nga uyatan sang ginpadala nga mga anghel sa pagluwas sa iya kag sa iya pamilya ang ila mga kamot kag dal-on sila sa gua sang siudad.—Genesis 19:15, 16.

Si David “nagsunod sa [Dios] sa bug-os niya nga tagipusuon paagi sa paghimo sing matarong sa [panulok sang Dios].”1 Hari 14:8

DSi David wala nakapugong sa iya kaugalingon kag nagpanghilahi sia sa asawa sang iban. Grabe pa gid kay ginpapatay ni David ang bana agod matabunan lang ang iya sala. (2 Samuel, kapitulo 11) Ang Biblia nagsiling nga “malain gid sa panulok ni Jehova ang ginhimo ni David.”—2 Samuel 11:27.

Sanday Job, Lot, kag David nakahimo sing sala, ang pila mabug-at gid nga sala. Pero subong makita naton, bug-os tagipusuon gid ang ila handum nga alagaron kag tumanon ang Dios. Ginpakita gid nila ang ila paghinulsol kag ginbag-o ang ila paggawi. Gani ginkahamut-an sila sang Dios, kag sa kabilugan gintawag sila sang Biblia subong matutom nga mga lalaki.

ANO ANG ATON MATUN-AN?

Subong indi himpit nga mga tawo, makahimo kita sing sala. (Roma 3:23) Apang kon makasala kita, kinahanglan naton ipakita nga nagahinulsol kita, dayon ginahimo ang aton masarangan sa pagtadlong sini.

 Paano gintadlong nanday Job, Lot, kag David ang ila mga sala? Si Job, isa gid ka tawo nga may integridad. Sang nangatarungan ang Dios sa iya, gintadlong ni Job ang iya sayop nga panghunahuna kag ginbawi niya ang iya ginsiling. (Job 42:6) Ang pagtamod ni Lot sa imoral nga mga buhat sang mga tawo sa Sodoma kag Gomorra nahisanto gid sa mga talaksan sang Dios. Ang problema, temporaryo nga nadula ang pagbatyag niya sing pagkahilingagawon. Nakapalagyo gid man sia sa ginpakamalaut nga mga siudad kag naluwas sa paghukom sang Dios. Matinumanon sia kag wala gid nagbalikid. Bisan pa nakahimo sing mabug-at nga sala si David sa paglapas sa kasuguan sang Dios, ginpakita niya kon ano gid ang yara sa iya tagipusuon paagi sa sinsero nga paghinulsol kag pagpakiluoy sa Dios.—Salmo 51.

Ang kahamuot sang Dios sa sini nga mga lalaki nahisanto sa iya makatarunganon nga mga ginapaabot sa indi himpit nga mga tawo. ‘Nahibaluan gid sang Dios kon paano kita ginhimo, ginadumdom niya nga kita yab-ok lamang.’ (Salmo 103:14) Gani kon nahibaluan sang Dios nga makahimo kita sing sala, ano ang ginapaabot niya sa aton?

‘Nahibaluan gid sang Dios kon paano kita ginhimo, ginadumdom niya nga kita yab-ok lamang.’—Salmo 103:14

PAANO MAPAHAMUT-AN SANG INDI HIMPIT NGA MGA TAWO ANG DIOS?

Ang laygay ni David sa iya anak nga si Solomon nagatudlo sa aton kon paano mapahamut-an ang Dios. “Ikaw, Solomon anak ko, kilalaha ang Dios sang imo amay kag alagara sia sing bug-os tagipusuon.” (1 Cronica 28:9) Ano ang bug-os nga tagipusuon? Amo ini ang tagipusuon nga nagahigugma sa Dios kag determinado nga hibaluon kag himuon ang iya kabubut-on kag mga ginapatuman. Indi ini himpit nga tagipusuon, kundi nagahandum nga alagaron kag tumanon ang Dios kag handa magpatadlong. Ang gugma sa Dios kag ang handum nga mangin matinumanon amo ang rason nga sa pagtamod sang Dios si Job “wala sing kasawayan,” si Lot “matarong,” kag si David ‘nagahimo sing matarong’ sa panulok sang Dios. Bisan pa nakahimo sila sing sala, napahamut-an nila ang Dios.

Ang bug-os nga tagipusuon determinado nga hibaluon kag himuon ang kabubut-on kag mga ginapatuman sang Dios

Gani kon nagahunahuna kita sang malain nga butang nga indi kuntani naton gusto hunahunaon ukon makahambal sing butang nga ginakahuya naton ukon makahimo sing butang nga sa ulihi marealisar naton nga sala, ilugon naton ang ginhimo sang mga tawo nga aton ginbinagbinag. Nahibaluan sang Dios nga indi pa kita himpit karon. Apang, ginapaabot niya nga higugmaon naton sia kag tinguhaan nga mangin matinumanon. Kon bug-os ang aton tagipusuon sa sini nga bahin, makasalig kita nga mapahamut-an man naton ang Dios.

Magtuon sing Dugang Pa

Ano Gid ang Ginatudlo sang Biblia?

Pagkabuhi nga Nagapalipay sa Dios

Posible gid ang pagkabuhi nga nagapalipay kay Jehova. Ang matuod, mahimo ka mangin abyan niya.