Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN HULYO 2015

 ANG BIBLIA NAGAPABAG-O SANG KABUHI

Labi nga Naglain ang Akon Kabuhi

Labi nga Naglain ang Akon Kabuhi
  • NATAWO: 1952

  • PUNGSOD: ESTADOS UNIDOS

  • KABUHI SANG UNA: MAAKIGON KAG MASINGKI

ANG AKON NAGLIGAD:

Nagdaku ako sa Los Angeles, California, U.S.A., sa mga lugar nga bantog ang gang kag droga. Ang akon mga ginikanan may anom ka kabataan, kag ako ang ikaduha.

Ginpadaku kami ni Nanay subong miembro sang evangelical nga simbahan. Apang sang tin-edyer ako, nangin doble ang akon pagkabuhi. Kon Domingo nagakanta ako upod sa koro sang simbahan. Sa iban nga adlaw, nagakadto ako sa party, nagadroga, kag nagahimo sing seksuwal nga imoralidad.

Madali ako maakig kag masingki. Ginagamit ko ang bisan ano para lang magdaug. Ang akon natun-an sa simbahan wala nakabulig sa akon. Pirme ko ginasiling: “Ang pagtimalos iya sang Ginuo—kag ako ang iya instrumento!” Sang ulihi nga bahin sang dekada 60, sang hayskul ako, naimpluwensiahan ako sang Black Panther, isa ka pulitikal nga grupo nga nakilala sa pagpakig-away para sa kinamatarong sang mga sibilyan. Nag-entra ako sa unyon sang mga estudyante nga nagapakigbato sa kinamatarong sang mga sibilyan. Pila ka beses nga nagprotesta kami kag ginapasira namon sing temporaryo ang eskwelahan.

Daw wala pa gid ako naayawan sa pagprotesta. Gani naghimo kami sing krimen batok sa ginadumtan namon nga grupo sang mga tawo. Halimbawa, isa ka bes nagtan-aw kami sang akon mga barkada sing pelikula tuhoy sa pag-antos sadto sang mga ulipon nga Aprikano sa Estados Unidos. Naakig gid kami sa sini nga inhustisya, gani ginsakit namon ang puti nga mga pamatan-on sa sulod mismo sang sinehan. Dayon nagkadto kami sa lugar sang mga puti, kag nagpangita pa sing mga tawo nga sakiton.

Sang manugbeinte anyos ako, kami sang akon mga utod nakilal-an nga mga hurong. Ginapangita kami sang awtoridad. Ang akon manghod miembro sang kilala nga gang, kag nag-upod ako sa ila. Labi nga naglain ang akon kabuhi.

KON PAANO GINBAG-O SANG BIBLIA ANG AKON KABUHI:

Ang mga ginikanan sang akon amigo mga Saksi ni Jehova. Gin-agda nila ako sa ila mga pagtilipon sa kongregasyon, kag nag-upod ako sa ila. Sa umpisa pa lang, nakita ko nga tuhay ang mga Saksi. Ang tanan may Biblia kag ginagamit ini sa tion sang pagtilipon. Bisan ang mga bata may mga bahin sa programa! Natun-an ko nga may ngalan ang Dios, si Jehova, kag nagdayaw ako nga ginagamit nila ini. (Salmo 83:18) Ang kongregasyon ginatapuan sang madamo nga nasyonalidad, pero wala sila sing pagbinahinbahin sa rasa.

 Sang primero, indi ko gusto magtuon sing Biblia sa mga Saksi, pero nanamian ako magtambong sa ila mga pagtilipon. Isa ka gab-i, sang nagtambong ako sa pagtilipon sang mga Saksi, ang akon mga barkada nagtan-aw sing konsierto. Ginkastigo nila didto ang isa ka tin-edyer asta mapatay bangod indi niya pag-ihatag ang iya panit nga dyaket. Pagkadason nga adlaw, ginpahambog pa nila ang ila pagpatay. Ginkadlawan lang nila ang ila krimen sang ginbista sila sa korte. Kalabanan sa ila ginsentensiahan nga mapriso tubtob buhi. Siempre nalipay ako nga wala ako makaupod sa ila sadto nga gab-i. Nagdesisyon ako nga magbag-o kag magtuon sing Biblia.

Bangod nakita ko ang grabe nga pag-ihig-ihig sa rasa, may nakita ako sa mga Saksi nga nagdayaw gid ako. Halimbawa, sang nagbiyahe sa iban nga pungsod ang isa ka puti nga Saksi, ginbilin niya ang iya kabataan sa isa ka itom nga pamilya. Isa pa, ginpaistar sang puti nga pamilya sa ila balay ang isa ka itom nga pamatan-on. Kumbinsido gid ako nga bagay gid sa mga Saksi ni Jehova ang ginsiling ni Jesus sa Juan 13:35: “Paagi sini mahibaluan sang tanan nga mga disipulo ko kamo, kon nagahigugmaanay kamo.” Kumbinsido ako nga amo ini ang matuod nga paghiliutod.

Sa pagtuon ko sa Biblia, narealisar ko nga kinahanglan ko bag-uhon ang akon panghunahuna. Dapat magdesisyon ako indi lamang agod mangin mahidaiton kundi bangod kumbinsido man ako nga amo ini ang pinakamaayo nga pagkabuhi. (Roma 12:2) Amat-amat ako nga nagbag-o. Sang Enero 1974, nabawtismuhan ako subong isa sa mga Saksi ni Jehova.

Dapat magdesisyon ako indi lamang agod mangin mahidaiton kundi bangod kumbinsido man ako nga amo ini ang pinakamaayo nga pagkabuhi

Apang, bisan bawtismado na ako, kinahanglan ko gihapon panikasugan nga makontrol ang akon pagkamaakigon. Halimbawa, isa ka bes sang nagapamalaybalay kami sa pagbantala, ginlagas ko ang kawatan nga nagkuha sang radyo sa akon salakyan. Sang malapit ko na lang sia maabtan, ginbuy-an niya ang radyo kag nagdalagan. Sang ginsugid ko sa mga kaupod ko kon paano ko nabawi ang akon radyo, ginpamangkot ako sang gulang sa amon grupo, “Stephen, ano ang himuon mo kon naabtan mo sia?” Ginpamensar ko ina nga pamangkot kag nagpahulag ini sa akon nga manikasog nga mangin mahidaiton.

Sang Oktubre 1974, nag-alagad ako subong bug-os tion nga ministro, nga nagahinguyang sing 100 ka oras kada bulan sa pagtudlo sing Biblia sa iban. Sang ulihi, nakapribilehiyo ako nga magboluntaryo sa ulong talatapan sang mga Saksi ni Jehova sa Brooklyn, New York. Sang 1978, nagpauli ako sa Los Angeles agod atipanon ang akon nagamasakit nga iloy. Pagligad sang duha ka tuig, nagpakasal kami sang akon pinalangga nga asawa nga si Aarhonda. Ginbuligan niya ako sa pag-atipan sa akon iloy tubtob napatay si Nanay. Sang ulihi, nag-eskwela kami ni Aarhonda sa Watchtower Bible School of Gilead kag gin-asayn sa Panama, diin padayon kami nga nagaalagad subong mga misyonero.

Sugod sang nabawtismuhan ako, pila ka beses ako nga nakaatubang sing mga kahimtangan nga mahimo magpaakig sa akon. Natun-an ko nga talikdan ang mga tawo nga nagapaakig sa akon ukon pakalmahon ang sitwasyon sa iban nga paagi. Madamo nga tawo, lakip ang akon asawa, ang nagahatag sa akon sing komendasyon kon paano ko naatubang ini nga mga sitwasyon. Bisan ako, nakibot sa sini! Nagbag-o ang akon personalidad indi bangod sa akon kaugalingon lang nga panikasog. Sa baylo, nagapati ako nga pamatuod ini sang nagapabag-o nga gahom sang Biblia.—Hebreo 4:12.

MGA BENEPISYO:

Bangod sang Biblia, may katuyuan na ang akon kabuhi kag gintudluan ako sini nga mangin matuod nga mahidaiton. Wala na ako nagapanakit sang mga tawo; kundi ginabuligan ko sila nga mag-ayo sa espirituwal. Gintun-an ko pa gani sa Biblia ang akon kontra sang hayskul pa ako! Sang nabawtismuhan sia, nangin roommate kami sa pila ka tion. Tubtob karon, suod gihapon kami nga mag-abyan. Sa karon, nabuligan namon nga mag-asawa ang sobra sa 80 ka tawo nga mangin mga Saksi ni Jehova paagi sa pagtuon sa Biblia sa ila.

Nagapasalamat gid ako kay Jehova nga may katuyuan na ang akon kabuhi kag malipayon gid ako sa tunga sang matuod nga paghiliutod.

 

Magtuon sing Dugang Pa

Ano ang Kahulugan sang Kabuhi?

Napamangkot mo na bala, ‘Ano ang katuyuan sang kabuhi?’ Hibalua kon paano ginasabat sang Biblia ini nga pamangkot.