Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN HULYO 2015

 TOPIKO SA KOBER | KON PAANO ATUBANGON ANG KABALAKA

Kabalaka sa Pamilya

Kabalaka sa Pamilya

“Sang bag-o lang napatay ang akon amay, ginsilingan ako sang akon bana nga may babayi sia,” siling ni Janet. “Wala madugay, ginhimos niya ang iya mga bayo kag ginbiyaan niya kami sang amon duha ka bata nga wala man lang nagpahibalo.” Nakakita sing obra si Janet, pero indi gani makaigo ang iya sueldo sa bayad para sa ila balay. Kag indi lang kuarta ang iya ginaproblema. “Nabalaka gid ako nga basi indi ko masarangan ang pag-abaga sing isahanon sa tanan nga responsibilidad,” siling niya. “Ginakonsiensia ako nga indi ko mahatag sa akon kabataan ang pareho sang ginahatag sang iban nga ginikanan. Kag asta subong, nabalaka ako kon ano ang pagtamod sang iban sa akon kag sa akon kabataan. Nagahunahuna bala sila kon ginhimo ko ang tanan ko nga masarangan para indi maguba ang amon pag-asawahay?”

Si Janet

Ang pangamuyo nakabulig kay Janet para makontrol ang iya balatyagon kag mapalambo ang iya pagpakig-abyan sa Dios. “Mabudlay gid kon gab-i, kon malinong na ang tanan kag indi ko mapunggan nga magkabalaka. Ang pagpangamuyo kag pagbasa sing Biblia nakabulig sa akon nga makatulog. Ang akon paborito nga teksto amo ang Filipos 4:6, 7: ‘Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna.’ Nagapangamuyo ako kada gab-i kag nabatyagan ko nga ginalugpayan ako sang paghidait ni Jehova.”

Ang nagapasalig nga ginsiling ni Jesus tuhoy sa pangamuyo sa iya Sermon sa Bukid maaplikar sa tanan nga sahi sang kabalaka: “Nahibaluan sang inyo Amay ang inyo ginakinahanglan bisan wala pa kamo makapangayo sa iya.” (Mateo 6:8) Kag dapat gid kita mangabay sa iya. Ang pangamuyo amo ang panguna nga paagi nga ‘makapalapit kita sa Dios.’ Ano ang resulta sini? “Magapalapit sia sa inyo.”—Santiago 4:8.

Ang pangamuyo wala lamang nagapaayo sang aton pamatyag bangod napautwas naton ang aton kabalaka. Si Jehova, ang “Manugpamati sang pangamuyo,” nagapanghikot  man para sa tanan nga nagadangop sa iya nga may pagtuo. (Salmo 65:2) Amo kon ngaa gintudluan ni Jesus ang iya mga sumulunod nga “magpangamuyo sila pirme kag indi magpangampo.” (Lucas 18:1) Dapat naton padayon nga pangayuon ang panuytoy kag bulig sang Dios, nga nagasalig nga padyaan niya ang aton pagtuo. Indi gid naton pagduhaduhaan ang iya handum ukon ikasarang sa pagbulig. Ang ‘padayon nga pagpangamuyo’ nagapakita sang aton matuod nga pagtuo.—1 Tesalonica 5:17.

KON ANO GID ANG BUOT SILINGON SANG PAGTUO

Apang ano gid ang pagtuo? Ang pagtuo nagadalahig sa “pagkilala” sa Dios subong persona. (Juan 17:3) Ang una naton nga ginahimo amo ang pagtuon sang mga panghunahuna sang Dios paagi sa Biblia. Natun-an naton nga makita niya kita tanan kag gusto niya kita buligan. Apang ang matuod nga pagtuo indi lamang pagtuon tuhoy sa Dios. Nagakahulugan man ini sang pagtahod kag pagpakig-abyan sa iya. Pareho sa pag-abyanay sang tawo, nagakinahanglan sing tion para mapalambo ang mabakod nga kaangtanan. Ang aton pagtuo ‘magabakod pa gid’ sa pagligad sang tion samtang nagatuon kita sing dugang pa parte sa iya, samtang “ginahimo [naton] ang kalahamut-an sa iya,” kag samtang ginabaton naton ang iya bulig. (2 Corinto 10:15; Juan 8:29) Amo ina nga pagtuo ang nagabulig kay Janet nga maatubang ang mga kabalaka.

“Nabatyagan ko ang panuytoy ni Jehova sa akon kag nakabulig gid ini agod magbakod ang akon pagtuo,” siling ni Janet. Madamong beses nga nakaeksperiensia kami sing inhustisya nga daw indi namon masarangan. Pirme kami nagapangamuyo, kag ginahatagan man kami pirme ni Jehova sing malutsan nga kon ako lang indi ko gid mapensaran. Kon ginapasalamatan ko sia, nagapahanumdom ini sa akon nga madamo gid ang iya nabulig sa akon. Ginabuligan niya kami pirme sa tion nga kinahanglan gid namon ini. Kag ginahatagan niya ako sing matuod nga Cristianong mga abyan nga lalaki kag babayi. Handa sila pirme sa pagbulig sa akon kag maayo sila nga halimbawa sa akon mga bata.” *

“Nahibaluan ko kon ngaa nagsiling si Jehova sa Malaquias 2:16: ‘Ginadumtan ko ang diborsio.’ Para sa inosente nga tiayon, amo ini ang pinakamasakit nga pagluib. Tinuig na ang nagligad sang ginbiyaan kami sang akon bana, pero nasubuan gihapon ako kon kaisa. Kon mabatyagan ko ini, nagapangita ako sing paagi nga makabulig sa iban, kag nakabulig man ini sa akon.” Gani paagi sa pag-aplikar sang prinsipio sa Biblia nga likawan ang pagpain sang kaugalingon, naghaganhagan ang kabalaka ni Janet. *Hulubaton 18:1.

Ang Dios “amay sang mga wala sing amay kag manugpangapin sang mga balo nga babayi.”—Salmo 68:5

“Ang nakalugpay gid sa akon,” siling ni Janet, “amo ang paghibalo nga ang Dios ‘amay sang mga wala sing amay kag manugpangapin sang mga balo nga babayi.’ Indi gid niya kami pagbayaan pareho sang ginhimo sang akon bana.” (Salmo 68:5) Nahibaluan ni Janet nga ang Dios wala nagatilaw sa aton sa “malaut nga mga butang.” Kundi “maalwan Sia nga nagahatag sa tanan” sing kaalam kag “gahom nga labaw sa kinaandan” sa pagbulig sa aton nga maatubang ang mga kabalaka.—Santiago 1:5, 13; 2 Corinto 4:7.

Apang ano abi kon nabalaka kita bangod yara sa katalagman ang aton kabuhi?

^ par. 10 Para sa dugang nga praktikal nga mga paagi sa pag-atubang sang kabalaka, tan-awa ang artikulo nga “Kontrolado Mo Bala ang Imo Kabuhi?” sa Hulyo 2015 nga isyu sang Magmata! nga mabasa man sa www.jw.org/hil.

Magtuon sing Dugang Pa

ANG LALANTAWAN

Saligan Mo Bala ang Dios?

Mangin malipayon ka kon makilala mo ang Dios bilang masaligan nga Abyan.