Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2015

Sin-o ang Anticristo?

Sin-o ang Anticristo?

Sining karon lang may kalahadlukan nga pelikula nga natig-uluhan Antichrist.

Ginngalanan sang isa ka bantog nga grupo sang musika ang isa nila ka album sing Antichrist Superstar.

Ginngalanan ni Friedrich Nietzsche, nga isa ka pilosopo sang ika-19 nga siglo, ang isa sang iya mga hinimuan nga The Antichrist.

Ang mga hari kag mga emperador sadtong mga 500-1500 C.E. masami nga nagatawag sa ila mga kaaway nga mga anticristo.

Ang lider sang German nga Repormador nga si Martin Luther, nagtawag sa mga papa sang Romano Katoliko subong mga anticristo.

BANGOD ang termino nga “anticristo” madugay na nga ginagamit sa pagtawag sa mga monarkiya kag sa tig-ulo sang mga pelikula, normal lang nga mamangkot kita: Sin-o ang anticristo? Dapat bala mangin interesado kita sa sini? Sa pag-usisa sa identidad sang anticristo, pinakamaayo nga gamiton naton ang Biblia, diin lima ka beses mabasa ini nga termino.

GINBUYAGYAG ANG ANTICRISTO

Ang lamang nga manunulat sang Biblia nga naggamit sing tinaga nga “anticristo” amo si apostol Juan. Paano niya ginlaragway ang anticristo? Talupangda ini nga mga pinamulong sa iya nahauna nga sulat: “Mga anak, ini na ang katapusan nga tion, kag subong sang nabatian ninyo nga magaabot ang anticristo, bisan karon pa lang madamo na ang anticristo, tungod sini nahibaluan naton nga amo na ini ang katapusan nga tion. Nagbiya sila sa aton, apang indi sila matuod nga katapo naton . . . Sin-o ang butigon? Indi bala ang isa nga nagapanghiwala nga si Jesus amo ang Cristo? Ang nagapanghiwala sa Amay kag sa Anak amo ang anticristo.”—1 Juan 2:18, 19, 22.

Ginpahangop ni apostol Juan nga ang anticristo amo ang tanan nga hungod nga nagpalapnag sing relihioso nga kabutigan parte kay Jesucristo kag sa iya mga panudlo

Ano ang aton matun-an sa sini nga pinamulong? Si Juan nagsambit sing ‘madamo nga anticristo,’ nga nagapakita nga ang anticristo indi isa ka indibiduwal, kundi isa ka grupo. Ang mga tawo ukon mga organisasyon nga nagahuman sang anticristo nagapalapnag sing mga kabutigan, nagapanghiwala nga si Jesus amo ang Cristo ukon Mesias, kag nagatinguha nga patikuon ang kaangtanan sang Dios sa Iya Anak nga si Jesucristo. Ang mga anticristo nagapangangkon nga amo ang Cristo ukon tiglawas sang Cristo, apang bangod “nagbiya sila sa aton,” naglisa sila sa matuod nga mga panudlo sang Biblia. Dugang pa, ini nga grupo nagaluntad na sang ginsulat ni Juan ang iya sulat, sa “katapusan nga tion,” nga mahimo amo ang katapusan sang panahon sang mga apostoles.

Ano pa ang ginsulat ni Juan parte sa anticristo? Nagahambal parte sa butig nga mga manalagna, nagpaandam sia: “Ang tagsa ka mensahe nga nagakilala nga si Jesucristo nagkari sa unod naghalin sa Dios. Apang ang tagsa ka mensahe nga wala nagakilala kay Jesus indi halin sa Dios. Dugang pa, amo ini ang mensahe sang anticristo nga nabatian ninyo nga isiling niya, kag karon ginapahayag na ini sa kalibutan.” (1 Juan 4:2, 3) Dayon sa iya ikaduha nga sulat, ginsulit ni Juan ini nga punto: “Naglapnag ang mga manugdaya sa kalibutan, mga tawo nga wala nagakilala nga si Jesucristo nagkari sa unod. Amo ini ang manugdaya kag ang anticristo.” (2 Juan 7) Maathag nga ginpahangop ni Juan nga ang anticristo amo ang tanan nga hungod nga nagpalapnag sing relihioso nga kabutigan parte kay Jesucristo kag sa iya mga panudlo.

“BUTIG NGA MGA MANALAGNA” KAG “ANG TAWO SANG PAGKAMALINAPASON”

Si Jesus nagpaandam nga ang butig nga mga manalagna magaabot subong ‘mabangis nga lobo nga nagapakunokuno nga mga karnero’

Madugay pa antes nagsulat si Juan parte sa relihioso nga mga manugdaya, ginpaandaman ni Jesucristo ang iya mga sumulunod: “Mag-andam kamo sa butig nga mga manalagna nga nagapalapit sa inyo kag nagapakunokuno nga mga karnero, apang ang matuod mabangis gali sila nga mga lobo.” (Mateo 7:15)  Si apostol Pablo nagpaandam man sa mga Cristiano sa Tesalonica: “Indi kamo magpadaya sa kay bisan sin-o sa bisan ano nga paagi, bangod antes [sang adlaw ni Jehova] magaabot anay ang apostasya kag mapahayag ang tawo sang pagkamalinapason, ang anak sang kalaglagan.”—2 Tesalonica 2:3.

Gani sang unang siglo, ang butig nga mga manalagna kag mga apostata nagapanghikot na, nga nagatinguha nga paluyahon ang Cristianong kongregasyon. Ang tanan nga nadalahig sa pagpalapnag sing mga kabutigan kag relihioso nga pagpanglimbong parte kay Jesucristo kag sa iya mga panudlo nalakip sa ginsiling ni Juan nga “anticristo.” Ang pagtamod sa ila ni Jehova ginpahayag sang ginlaragway sila ni Pablo subong “anak sang kalaglagan.”

MAG-ANDAM SA MGA HILIKUTON SANG ANTICRISTO SUBONG

Kamusta subong? Ang mga tawo kag mga organisasyon nga nagahuman sang anticristo nagapamatok gihapon sa Cristo kag sa iya mga panudlo. Hungod sila nga nagapalapta sing mga kabutigan kag nagapanglimbong agod gumunon ang identidad sang Amay nga si Jehova nga Dios, kag sang Iya Anak nga si Jesucristo. May rason gid kita nga mag-andam batok sa sinang relihioso nga mga pagpanglimbong. Tan-awon naton ang duha ka halimbawa.

Sa sulod sang mga siglo, ang simbahan nagapalapnag sang doktrina sang Trinidad, nga nagatudlo nga ang Amay kag ang Anak mga persona nga bahin sang isa ka dios. Gani ginahimo nga misteryo sang anticristo ang identidad ni Jehova nga Dios kag ni Jesucristo. Ini nga misteryo nagapugong sa sinsero nga mga tawo sa pag-ilog kay Jesucristo kag pagpalapit sa Dios, subong sang ginapalig-on sang Biblia sa ila.—1 Corinto 11:1; Santiago 4:8.

Gindugangan pa gid sang mga simbahan ang kagumon paagi sa paggamit sing mga badbad sang Biblia nga nagdula sang personal nga ngalan sang Dios nga Jehova sa teksto. Ginhimo nila ini bisan pa ang ngalan ni Jehova mabasa sing mga 7,000 ka beses sa orihinal nga teksto sang Biblia. Ano ang resulta sini? Ang identidad sang matuod nga Dios labi nga nangin misteryo.

Sa pihak nga bahin, ang paghibalo sang ngalan sang Dios nga Jehova nagbulig sa madamo nga sinsero nga sumilimba nga mangin malapit sa Dios. Amo ini ang naeksperiensiahan ni Richard, nga nakadumdom sang iya pagpakig-istorya sa duha ka Saksi ni Jehova. “Ginpakita nila sa akon sa Biblia nga ang ngalan sang matuod nga Dios amo si Jehova,” paathag ni Richard. “Nanamian gid ako sa paghibalo nga may personal nga ngalan ang Dios, butang nga wala ko nabatian halin sang una.” Sugod sadto, naghimo sia sing mga pagbag-o agod ipahisuno ang iya kabuhi sa mga talaksan sang Biblia kag pahamut-an si Jehova. “Ang paghibalo sa ngalan sang Dios nagbulig sa akon nga mapalambo ang suod nga kaangtanan sa iya.”

Sa sulod sang mga siglo, minilyon ang ginbilanggo sang anticristo sa espirituwal nga kadudulman. Apang paagi sa pagtuon sa Pulong sang Dios, ang Biblia, mahibaluan naton ang matuod nga identidad sang anticristo kag mahilway gikan sa relihioso nga mga kabutigan kag pagpanglimbong sang anticristo.—Juan 17:17.

Magtuon sing Dugang Pa

Sin-o Gid ang Nagagahom sa Kalibutan?

Mahimo makibot ka sa sabat sang Biblia. Hibalua kon ngaa importante ini kag kon ano ang ginapahangop sini parte sa palaabuton.

Ara Bala sa Biblia ang Doktrina nga Trinidad?

Madamo nga relihion ang nagatudlo nga ang Dios Trinidad. Ginatudlo bala ini sang Biblia?

May Ngalan Bala ang Dios?

Ang Dios may madamo nga titulo, lakip ang Labing Gamhanan, Manunuga, kag Ginuo. Pero ang personal nga ngalan sang Dios gingamit sing mga 7,000 ka beses sa Biblia.