Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MARSO 2015

 TOPIKO SA KOBER | GINALUWAS KITA NI JESUS—SA ANO?

Kon Ngaa Kinahanglan nga Luwason Kita

Kon Ngaa Kinahanglan nga Luwason Kita

“Ang tawo nga ginbun-ag sang babayi, malip-ot ang kabuhi kag puno sing kagamo. Kaangay sia sang bulak nga nagbuskad kag nalaya; kaangay sia sang landong nga naglabay kag nadula.”—Job 14:1, 2.

Halin pa sang una, ginadamgo na sang mga tawo nga mabuhi sila nga wala nagatigulang, mapagros, kag indi mapatay. Pero, amo sini ang makapasubo nga kamatuoran: Nagakapatay kita tanan. Ang ginhambal ni Job sang nagligad nga kapin sa tatlo ka libo ka tuig, matuod gihapon asta subong.

Handum gid sang tanan nga tawo nga mabuhi sing wala katapusan. Ginasugiran kita sang Biblia nga ginbutang sang Dios sa aton tagipusuon ang handum nga mabuhi sing wala katapusan subong man ang handum nga mahangpan ini. (Manugwali 3:11) Bangod sini, makatarunganon bala nga pahandumon kita sang mahigugmaon nga Dios sing isa ka butang nga imposible sa aton? Kon indi ang sabat mo, husto ka. Ginatawag sang Pulong sang Dios ang kamatayon nga isa ka kaaway kag nagasaad nga “iya [ini] dulaon.”—1 Corinto 15:26.

Indi maduhaduhaan nga ang kamatayon isa ka kaaway. Wala sing tawo nga maayo sing pamensaron ang maluyag sini. Kon may katalagman gani, nagalikaw kita, nagapanago, ukon nagapalagyo. Kon magmasakit kita, nagapangita kita sing paagi nga mag-ayo. Ginahimo naton ang aton masarangan agod likawan ang mga butang nga mahimo bangdan sang aton kamatayon.

May rason bala kita sa pagpati nga ining madugay na gid nga kaaway pagadulaon? Huo. Wala gintuga ni Jehova nga Dios ang tawo agod mabuhi sing pila lang ka tuig kag dayon mapatay na. Ang pagkapatay sang tawo indi bahin sang iya orihinal nga katuyuan. Gintuyo niya nga mabuhi ang tawo sing wala katapusan sa duta, kag tumanon gid niya ang iya katuyuan.—Isaias 55:11.

Paano dulaon ang kamatayon? Halin pa sang una, ginatinguhaan sang mga tawo nga dulaon ang kamatayon, pero wala sila magmadinalag-on. Padayon gihapon sila asta subong. Nakatukib ang mga sientipiko sing mga bakuna kag mga bulong nga nagtapna sang pila ka balatian. Nausisa nila kon ano ang sa sulod sang buhi nga mga butang. Sa madamo nga lugar, mas malawig ang kabuhi sang mga tawo karon sangsa nagligad nga siglo. Pero, indi gihapon malikawan ang kamatayon. Subong sang ginasiling sang Biblia, ang “tanan nagabalik sa yab-ok.”—Manugwali 3:20.

Ang maayong balita amo nga indi na kinahanglan nga maghulat pa kita sa ikasarang sang tawo sa paglubad sining madugay na gid nga problema. May ginhimo na si Jehova nga Dios nga kahimusan agod luwason kita sa kamatayon, kag ang may panguna nga papel sa sini nga kahimusan amo si Jesucristo.