Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Pebrero 2015

 TOPIKO SA KOBER | KON PAANO KA MALIPAY SA IMO OBRA

Mabudlay nga Obra—Praktikal Pa Bala?

Mabudlay nga Obra—Praktikal Pa Bala?

Nagapanghayhay si Alex samtang ginahakwat niya ang kahon agod ikarga sa trak sang kompanya nga iya ginaobrahan. ‘Ngaa amo sini ang obra ko?’ pamangkot niya. ‘San-o pa ayhan ako makatibawas? Mas maayo kuntani ang akon kabuhi kon indi amo sini ang akon obra!’

Kaangay ni Alex sa sini nga kahimtangan, madamo sa karon ang wala nalipay nga magpangabudlay sing lakas. “Madamo nga tawo ang nagahunahuna nga indi bagay sa ila ang ila obra,” siling sang mekaniko nga si Aaron. “Ang ila panimuot amo: ‘Ginahimo ko lang ini samtang wala pa ako sing makita nga mas maayo nga obra.’”

Ngaa ginabatyag sang madamo nga indi bagay sa ila ang mabudlay nga obra? Ayhan naimpluwensiahan sila sang media, nga pirme nagalaragway sang “maayo gid” nga kabuhi nga maluho kag masulhay. “Ginahunahuna sang mga tawo nga indi ka madinalag-on kon kinahanglan ka mag-obra sing lakas para mabuhi ka,” siling ni Matthew, nga isa ka maintenance worker. Amo man sini ang natalupangdan sang dyanitor nga si Shane. Nagsiling sia: “Luyag sang mga tawo nga suelduhan sila, pero indi nila luyag nga mag-obra sila sa bug-os gid nga adlaw.”

Sa pihak nga bahin, madamo nga madinalag-on nga tawo ang nagakalipay sa mabudlay nga obra. “Para sa akon, makabulig gid ang mabudlay nga obra, ilabi na kon may mapuslanon ka nga mga tulumuron,” siling sang 25 anyos nga si Daniel nga nagaobra sa konstruksion. Nagaugyon sa sini ang 23 anyos nga si Andre. “Nagapati ako nga agod mangin malipayon ka kag masadya kinahanglan ka mag-obra,” siling niya. “Indi ka mangin malipayon kon diutay lang ang imo obra kag hilikuton, kundi matak-an ka lang sa ulihi!”

Ngaa positibo ang pagtamod sang mga tawo kaangay ni Daniel kag ni Andre sa mabudlay nga obra? Bangod gin-aplikar nila sa ila kabuhi ang mga prinsipio sang Biblia. Ginalaygay sang Biblia ang kapisan, pagkamabinatason, kag ang pagpangabudlay sing lakas. Pero wala lamang kita ginalaygayan sang Biblia nga mag-obra. Kundi, ginapakita man sini sa aton kon paano kita malipay sa aton pag-obra.

Ano nga mga prinsipio sa Biblia ang makabulig sa imo agod mangin malipayon ka sa imo obra? Ginaagda ka namon nga binagbinagon ang pila sini, nga amo ang ipaathag sang masunod nga artikulo.