Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN PEBRERO 2015

 TOPIKO SA KOBER | KON PAANO KA MALIPAY SA IMO OBRA

Kon Paano Ka Malipay sa Mabudlay nga Obra

Kon Paano Ka Malipay sa Mabudlay nga Obra

“Ang tagsa ka tawo magkaon man kag mag-inom kag magkalipay sa tanan nga ginpangabudlayan niya. Dulot ini sang Dios.” (Manugwali 3:13) Kon gusto sang Dios nga malipay kita sa aton obra, indi bala makatarunganon nga ipakita niya sa aton kon paano? (Isaias 48:17) Nagapasalamat kita nga ginapakita niya ini paagi sa mga pahina sang iya Pulong nga amo ang Biblia. Binagbinaga ang masunod nga pasad sa Biblia nga laygay kon paano ka malipay sa imo pag-obra.

PALAMBUA ANG POSITIBO NGA PAGTAMOD SA OBRA

Kon ang imo obra mental, pisikal, ukon pareho nga mental kag pisikal, dumduma nga “may kaayuhan sa tanan nga sahi sang pagpangabudlay.” (Hulubaton 14:23) Ano nga kaayuhan? Una, ang mabudlay nga obra makabulig sa aton agod may igasto kita para sa aton materyal nga mga kinahanglanon. Matuod, nagapromisa ang Dios nga ihatag niya ang mga kinahanglanon sang sinsero nga nagasimba sa iya. (Mateo 6:31, 32) Pero ginapaabot man niya nga himuon naton ang aton bahin paagi sa pagtinguha nga magkabuhi sing bunayag.—2 Tesalonica 3:10.

Gani, mahimo naton tamdon ang aton obra subong paagi agod matigayon ang aton katuyuan. Ang pag-obra isa ka dungganon nga paagi agod mahimo naton ang aton mga responsibilidad. “Daku gid ang imo hinimuan kon ikaw ang nagagasto para sa imo kaugalingon,” siling sang 25 anyos nga si Joshua. “Kon ikaw na ang nagabakal sang imo mga kinahanglanon, mapuslanon gid ang imo obra.”

Dugang pa, may respeto ka man sa imo kaugalingon kon nagapangabudlay ka sing lakas. Kay ang mabudlay nga obra—mabudlay matuod. Kon ginadisiplina naton ang aton kaugalingon nga himuon ang aton obra, bisan pa daw makatalaka ini ukon mabudlay, malipay kita bangod nangin talahuron kita. Nalandas naton ang huyog nga magpahapos lang. (Hulubaton 26:14) Gani, ang obra nagahatag sing daku nga kalipay. “Maayo gid ang akon pamatyag pagkatapos sang bug-os nga adlaw nga pag-obra,” siling ni Aaron nga ginsambit sa nagligad nga artikulo. “Mahimo kapoy gid ako, kag mahimo nga wala matalupangdan sang iban ang akon pag-obra, apang nahibaluan ko nga may hinimuan ako.”

 MAGPANGABUDLAY KA

Ginadayaw sang Biblia ang lalaki nga “sampaton sa iya obra” kag ang babayi nga ‘malipayon nga nagapangabudlay.’ (Hulubaton 22:29; 31:13) Pero indi awtomatiko nga ang isa ka tawo mangin lantip sa isa ka butang. Kag pila lang sa aton ang nalipay sa paghimo sing mga butang nga indi kita lantip. Amo siguro kon kaisa wala nalipay ang iban sa ila obra; wala sila nagatinguha nga mangin lantip sa sini.

Ang matuod, mahimo malipay ang isa ka tawo sa bisan ano nga sahi sang obra kon may husto sia nga pagtamod sa sini, kon magtinguha gid sia sa pagtuon kon paano himuon sing maayo ang isa ka obra. “Malipay ka gid kon himuon mo ang imo bug-os nga masarangan sa pag-obra kag makita mo ang resulta sini,” siling sang 24 anyos nga si William. “Indi mo gid mabatyagan ini kon manglaktod ka ukon diutay lang ang imo pagpanikasog.”

DUMDUMA KON PAANO MAKABENEPISYO ANG IBAN SA IMO OBRA

Likawi ang siod nga ang imo lang hunahunaon amo ang imo matigayon nga kuarta. Sa baylo, pamangkuta ang imo kaugalingon sini nga mga pamangkot: ‘Ngaa kinahanglan ko gid ini nga obra? Ano ang matabo kon indi ko ini paghimuon, ukon indi ko ini paghimuon sing nagakaigo? Paano makabenepisyo sa sini ang iban?’

Ang pinakaulihi nga pamangkot amo ang ilabi na nga dapat binagbinagon kay makalilipay gid nga makita ang benepisyo sini sa iban nga tawo. Nagsiling mismo si Jesus: “Mas malipayon ang nagahatag sangsa nagabaton.” (Binuhatan 20:35) Luwas sa direkta nga nagabenepisyo sa aton obra, subong sang mga kostumer kag mga amo, may iban pa nga nagabenepisyo sa aton mabudlay nga obra. Nagalakip ini sa mga miembro sang aton panimalay kag sa mga nagakinahanglan sini.

Ang mga miembro sang aton panimalay. Kon ang ulo sang pamilya nagapangabudlay sing lakas agod maamanan niya ang mga miembro sang iya panimalay, makabenepisyo sila sa di-magkubos duha ka paagi. Una, ginapat-od niya nga maamanan sila sang ila kinahanglanon—pagkaon, bayo, kag pasilungan. Gani ginatuman niya ang responsibilidad nga ginhatag sa iya sang Dios sa ‘pag-aman sa mga natungod sa iya.’ (1 Timoteo 5:8) Ikaduha, ang mapisan nga manug-aman nagatudlo paagi sa halimbawa sang importansia sang pagpangabudlay sing lakas. “Maayo gid nga halimbawa si Tatay sa pagpakita sing maayo nga panimuot sa obra,” siling ni Shane nga nasambit na sa nahauna nga artikulo. “Bunayag sia kag madugay sia nga nag-obra sing lakas subong panday sa bug-os niya nga kabuhi. Natun-an ko sa iya halimbawa ang kapuslanan sang pag-obra nga ginagamit ang imo mga kamot, ang pagpatindog sing mga butang nga magamit sang iban.”

Ang mga nagakinahanglan sini. Ginalaygayan ni apostol Pablo ang mga Cristiano nga “magpangabudlay [sila] . . . agod may ipaambit [sila] sa nagakinahanglan.” (Efeso 4:28) Kon magpangabudlay kita sing lakas agod maamanan ang aton kaugalingon kag ang aton pamilya, mahimo nga makabulig man kita sa mga imol. (Hulubaton 3:27) Paagi sa mabudlay nga obra maeksperiensiahan naton ang kapin nga kalipay sa paghatag.

 HIMUA ANG IMO LABI NGA MASARANGAN

Sa iya bantog nga Sermon sa Bukid, si Jesus nagsiling: “Kon may magpilit sa imo nga maglakat sing isa ka milya, updi sia bisan sing duha ka milya.” (Mateo 5:41) Paano mo iaplikar ini nga prinsipio sa imo obra? Imbes nga magpahapos lang, himua ang imo labi nga masarangan. Magpahamtang sing mga tulumuron; hangkata ang imo kaugalingon nga mag-obra ka sing mas maayo kag sing mas madasig sangsa kon ano ang ginapaabot sa imo. Tinguhai nga mapabugal mo bisan ang pinakadiutay nga mga detalye sang imo obra.

Kon himuon mo ang imo labi nga masarangan, mangin malipayon ka gid sa imo obra. Ngaa? Bangod ikaw ang nagakontrol sang imo ginahimo. Ginahimo mo ang imo labi nga masarangan bangod luyag mo ini himuon, indi bangod napilitan ka lang. (Filemon 14) Mahimo naton dumdumon ang prinsipio sa Hulubaton 12:24: “Ang mapisan nga tawo amo ang magagahom, apang ang matamad nga tawo mangin ulipon.” Matuod, ang pila sa aton mahimo ulipunon ukon piliton nga mag-obra. Pero, ang isa ka tawo nga nagahimo sing diutay lang mahimo magbatyag nga ginaulipon sia, nga pirme lang sia ginasugo sang iban. Pero ang tawo nga nagahimo sang iya labi nga masarangan—bangod amo ini ang luyag niya himuon—nagabatyag nga sia ang nagakontrol sang iya kabuhi. Sia ang agalon sang iya ginahimo.

MANGIN BALANSE SA IMO OBRA

Dalayawon ang mabudlay nga obra, pero dapat naton dumdumon nga ang kabuhi indi puro lang obra. Matuod, ginalaygayan kita sang Biblia nga dapat kita mangin mapisan. (Hulubaton 13:4) Pero wala ini nagasiling nga puro na lang kita obra. “Mas maayo pa ang diutay nga pahuway sangsa tuman nga pagpangabudlay kag paglagas sa hangin,” siling sang Manugwali 4:6. Ano ang punto? Ang puro lang obra nga tawo indi malipay sa iya inobrahan kon maubos sa sini ang tanan niya nga tion kag kusog. Gani, ang iya obra mangin wala pulos subong sang “paglagas sa hangin.”

Makabulig sa aton ang Biblia sa pagpalambo sing balanse nga pagtamod sa obra. Bisan pa nagasiling ini nga dapat kita magmaukod sa aton obra, nagalaygay man ini nga ‘pat-uron naton ang mas importante nga mga butang.’ (Filipos 1:10.) Ano ang mas importante nga mga butang? Nagalakip ini sang paghugod sing tion upod sa pamilya kag mga abyan. Mas importante pa gani ang espirituwal nga mga hilikuton, subong sang pagbasa sing Pulong sang Dios kag pagpamalandong sa sini.

Mahimo gid nga labi nga malipay sa ila obra ang mga tawo nga balanse sa ila kabuhi. “Maayo gid nga halimbawa ang isa sa akon mga amo anay sa pagpakita sing balanse nga pagtamod sa obra,” siling ni William nga ginsambit kaina. “Nagapangabudlay sia sing lakas, kag maayo ang iya relasyon sa iya mga kliyente bangod sang kalidad sang iya obra. Pero pagkatapos sang obra sa bug-os nga adlaw, makahibalo sia nga biyaan anay ang iya obra kag dayon atipanon ang iya pamilya kag ang iya pagsimba. Kag abi mo? Sia ang pinakamalipayon nga tawo nga nakilala ko!”

Magtuon sing Dugang Pa

Paano Matigayon ang Matuod nga Kadalag-an?

Lima ka praktikal nga panugda agod mangin matuod nga madinalag-on.

Ginbag-o sang mga Boluntaryo ang Site sa Tuxedo

Ang mga Saksi ni Jehova sa United States kag iban pa nga lugar nagaboluntaryo sa konstruksion sa Tuxedo, New York. Ngaa?