Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN DISIEMBRE 2014

 TOPIKO SA KOBER | PUEDE KA BALA MANGIN SUOD SA DIOS?

Nagapakig-istorya Ka Bala sa Dios?

Nagapakig-istorya Ka Bala sa Dios?

Pirme nga nagapakig-istorya sa isa kag isa ang mag-abyanay sing personal ukon paagi sa telepono, e-mail, video, ukon sulat tubtob posible. Gani, para mangin suod kita sa Dios kinahanglan man makig-istorya kita sa iya sing regular. Paano naton ini himuon?

Makaistorya kita kay Jehova paagi sa pangamuyo. Pero ang pagpangamuyo sa Dios indi pareho sa pagpakig-istorya naton sa aton abyan. Dapat naton dumdumon nga kon nagapangamuyo kita, nagapakig-istorya kita sa aton Manunuga, ang Labing Mataas sa uniberso. Gani mangamuyo kita nga may tudok nga pagtahod. Para pamatian sang Dios ang aton mga pangamuyo, dapat naton sundon ang pila ka ginapatuman niya. Ari ang tatlo sa sini.

Una, ang aton mga pangamuyo dapat kay Jehova nga Dios lamang, indi kay Jesus, sa “santos,” ukon sa imahen. (Exodo 20:4, 5) Maathag ang ginasiling sang Biblia: “Sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” (Filipos 4:6) Ikaduha, kon nagapangamuyo kita dapat paagi sa ngalan sang Anak sang Dios nga si Jesucristo. Si Jesus mismo nagpaathag: “Wala sing makakadto sa Amay kon indi paagi sa akon.” (Juan 14:6) Ikatlo, dapat ang aton mga pangamuyo nahisuno sa kabubut-on sang Dios. Ang Biblia nagasiling: “Bisan ano ang pangayuon naton suno sa iya kabubut-on, nagapamati sia sa aton.” *1 Juan 5:14.

Pirme nga nagapakig-istorya sa isa kag isa ang mag-abyanay tubtob posible

Siempre, indi magdugay ang pag-abyanay kon isa lang pirme ang nagahambal. Pareho sang mag-abyan nga duha ang nagaistoryahanay, dapat tugutan man naton nga makighambal ang Dios sa aton kag dapat mamati kita sa iya. Nahibaluan mo bala kon paano nagapakighambal ang Dios sa aton?

Sa karon, “nagapakighambal” si Jehova nga Dios sa aton paagi sa iya Pulong, ang Biblia. (2 Timoteo 3:16, 17) Paano naton ini nahibaluan? Sa pag-ilustrar: May nabaton ka nga sulat halin sa imo suod nga abyan. Sang mabasa ini, malipayon mo nga ginsugid sa iban nga, “Bag-o lang ’ko ’kabati sang balita sa amigo ko ba!” Pero wala sia nakighambal sa imo sing personal, kundi paagi lang sa sulat. Sing kaanggid, paagi sa pagbasa sa Biblia, ginatugutan naton si Jehova nga makighambal sa aton. Pero nagsiling si Gina nga ginsambit sa una nga artikulo, “Sa pensar ko, kon gusto ko gid nga kabigon ako sang Dios nga abyan niya, dapat usisaon ko ang iya ‘sulat’ sa aton—ang Biblia.” Nagsiling pa sia, “Nangin suod pa gid ako sa Dios kay ginabasa ko ang Biblia adlaw-adlaw.” Ginatugutan mo bala nga makighambal si Jehova sa imo paagi sa pagbasa sang iya Pulong, ang Biblia? Kon himuon mo ini, mangin suod ka pa gid sa iya.

^ par. 5 Para sa dugang nga impormasyon kon paano makigsuod sa Dios paagi sa pangamuyo, basaha ang kapitulo 17 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova.

Magtuon sing Dugang Pa

SABAT SA MGA PAMANGKOT SA BIBLIA

Buligan Bala Ako sang Dios Kon Magpangamuyo Ako?

Nagaulikid gid bala ang Dios sa aton mga problema?