Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN DISIEMBRE 2014

 PAMANGKOT SANG MGA BUMALASA . . .

Ano Gid Bala ang Krismas?

Ano Gid Bala ang Krismas?

Lainlain ang rason sang minilyon sa bilog nga kalibutan sa pagsaulog sang Krismas. Ang pila nasadyahan sa pagpakig-upod sa ila mga abyan kag pamilya. Ang iban naman nagadumdom sa Dios ukon nagahinguyang sang tion sa pagbulig sa mga imol kag nagakinahanglan. Para sa ila, mapuslanon ini nga mga buhat. Pero wala nila mahibaluan nga may malain nga ginhalinan ang Krismas.

Una, madamo ang nagapati nga ang Krismas kaadlawan ni Jesus. Pero ang mga istoryador nagasiling nga ang petsa sang iya pagkatawo wala napat-od. Ang The Christian Book of Why nagsiling nga “ang unang mga Cristiano wala nagpat-od sang petsa sang pagkatawo ni Jesus” bangod gusto nila “nga painon ang ila kaugalingon gikan sa tanan nga buhat sang pagano.” Talupangda nga ang Biblia wala gid nagsambit nga nagsaulog si Jesus sang iya kaadlawan ukon sang iban. Pero, ginsugo niya ang iya mga sumulunod nga saulugon ang iya kamatayon.Lucas 22:19.

Ikaduha, madamo nga iskolar ang nag-ugyon nga ang kalabanan nga tradisyon sa Krismas naghalin sa indi Cristiano kag sa pagano nga kustombre. Lakip sa sini si Santa Claus, ang paggamit sang mistletoe kag Christmas tree, pagbayluhanay sang regalo, pagsindi sang kandila kag mga Yule logs, pagsab-it sang mga purongpurong nga bulak kag pag-caroling. Parte sa sini nga mga kustombre, ang libro nga The Externals of the Catholic Church nagkomento: “Kon maghatag kita ukon magbaton sang regalo sa Krismas, kag magsab-it sang berde nga purongpurong sa aton balay kag mga simbahan, nakahibalo bala kita nga pagano ang ginhalinan sini?”

“Kon maghatag kita ukon magbaton sang regalo sa Krismas, kag magsab-it sang berde nga purongpurong sa aton balay kag mga simbahan, nakahibalo bala kita nga pagano ang ginhalinan sini?”—The Externals of the Catholic Church

Mahimo ka maghunahuna, ano ang malain sa pagsunod sining daw maayo man nga mga kustombre? Binagbinaga ining tatlo ka punto para masabat ina. Ang Dios wala nahamuot sa pagsimbog sang pagano nga kustombre sa putli nga pagsimba. Paagi kay manalagna Amos, si Jehova nga Dios nagsiling sa Iya mga batinggilan nga sumilimba sa Israel sadto: “Ginadumtan ko, ginatamay ko ang inyo mga piesta . . . Kuhaa ninyo sa akon ang kagahud sang inyo mga ambahanon.”Amos 5:21, 23.

Ngaa matigdas ang iya mga tinaga? Binagbinaga ang ginhimo sang katawhan sa naaminhan nga ginharian sang Israel sadto. Ang una nga hari nga si Jeroboam, nagbutang sang bulawan nga tinday sa siudad sang Dan kag Betel kag nag-impluwensia sa mga tawo nga simbahon ini sa baylo nga simbahon si Jehova nga Dios sing nagakaigo sa iya templo sa Jerusalem. Ginsugdan man sang hari ang mga kapiestahan kag nagtangdo sang mga saserdote sa pagpanguna sa mga tawo nga saulugon ini.1 Hari 12:26-33.

Ang mga ginahimo sang Israelinhon daw may maayo nga pasingadtuan. Kay man, ginahimo man nila ini nga mga butang para simbahon ang Dios kag pahamut-an sia. Ang matigdas nga tinaga sang Dios paagi kay Amos kag sa iban pa nga manalagna maathag nga nagpakita kon ano ang pagtamod sang Dios sa ila mga ginahimo. Paagi kay manalagna Malaquias, ang Dios nagsiling: “Ako nga GINOO wala nagabaylo.” (Malaquias 3:6) Wala bala sini ginapakita ang pagtamod sang Dios parte sa pagsaulog sang madamo sang Krismas subong?

Sa tapos mabinagbinag ang mga kamatuoran sa ibabaw, minilyon ang nagdesisyon nga indi na magsaulog sang Krismas. Kundi nakasapo sila sang kalipay kag matuod nga kaayawan sa paghinguyang sang tion upod sa ila mga abyan kag pamilya kag sa pagbulig sa mga imol kag nagakinahanglan bisan san-o nga gusto nila.

 

Magtuon sing Dugang Pa

Ngaa Wala Nagaselebrar sang Krismas ang mga Saksi ni Jehova?

Madamo ang nagaselebrar sang Krismas bisan pa nahibaluan nila ang ginhalinan sini. Hibalua kon ngaa wala ini ginaselebrar sang mga Saksi ni Jehova.

Ang Pagsimba nga Ginabaton sang Dios

Tun-i ang anom ka butang nga nagapakilala sa aktibo nga mga miembro sang matuod nga relihion.