Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Nobiembre 2014

 PAG-ISTORYAHANAY PARTE SA BIBLIA

San-o Nagsugod sa Paggahom ang Ginharian sang Dios?—Bahin 2

San-o Nagsugod sa Paggahom ang Ginharian sang Dios?—Bahin 2

Ang masunod amo ang kinaandan nga pagpakig-istorya sang mga Saksi ni Jehova. Ibutang ta nga ang Saksi nga si Cameron nagbalik kanday Jon.

ANG DAMGO NI NABOCODONOSOR—MALIP-OT NGA REPASO

Cameron: Hello Jon. Nanamian gid ako sa aton Bible study kada semana. * Kamusta ka na?

Jon: Maayo man.

Cameron: Sang nagligad, gin-istoryahan ta kon ngaa nagapati ang mga Saksi ni Jehova nga nagsugod na sa paggahom ang Ginharian sang Dios sang 1914. * Dayon napamatud-an ini sang tagna sa kapitulo 4 sang Daniel nga libro sang Biblia. Nadumduman mo ang ginsiling didto?

Jon: Amo ’to ang damgo ni Hari Nabocodonosor parte sa daku nga kahoy?

Cameron: Eksakto ka. Sa iya damgo, nakita niya ang tuman ka daku nga kahoy nga naglambot sa langit. Nabatian niya ang mensahero sang Dios nga nagsugo nga pudlon ini, pero ibilin ang tuod kag gamot sini. Pagkatapos sang pito ka tion, ang kahoy matubo liwat. * Gin-istoryahan man naton nga ang tagna may duha ka katumanan. Nadumduman mo pa ang una nga katumanan sini?

Jon: Huo, natabo ini kay Nabocodonosor mismo kay nagbuang sia sing pito ka tuig.

Cameron: Temporaryo nga nagbuang si Nabocodonosor, amo nga nag-untat sia sa paggahom. Pero sa mas daku nga katumanan sang tagna, ang paggahom sang Dios mauntat man sa sulod sang pito ka tion. Suno sa natun-an naton, ang pito ka tion nagsugod sang ginlaglag ang Jerusalem sang 607 B.C.E. Sugod sadto, wala na sing mga hari sa duta nga nagarepresentar kay Jehova nga Dios sa paggahom sa iya katawhan. Pero, pagkatapos sang pito ka tion, magatangdo ang Dios sang bag-o nga Manuggahom nga halin sa langit para sa iya katawhan. Kon sa aton pa, pagkatapos sang pito ka tion masugod na sa paggahom ang Ginharian sang Dios sa langit. Naistoryahan na naton kon san-o nagsugod ang pito ka tion. Gani kon mahibaluan naton kon asta san-o ini, mahibaluan man naton kon san-o magsugod ang paggahom sang Ginharian sang Dios. Nahangpan mo pa ako?

Jon: Huo. Maayo kay ginrebyu ta ini.

Cameron: Sige, istoryahan naman naton kon daw ano kadugay ang pito ka tion. Ginbasa ko man ang parte sini para madumduman ko ang importante nga mga punto. Tinguhaan ko gid nga mapaathag ini sa imo sing maayo.

Jon: OK.

NATAPOS ANG PITO KA TION—NAGSUGOD ANG KATAPUSAN NGA MGA ADLAW

Cameron: Sa una nga katumanan sang tagna parte kay Nabocodonosor, ang pito ka tion literal  gid nga pito ka tuig. Pero sa mas daku nga katumanan sini tuhoy sa Ginharian sang Dios, ang pito ka tion mas malawig sangsa pito ka literal nga tuig.

Jon: Paano ’bi?

Cameron: Nadumduman mo nga ang pito ka tion nagsugod sang nalaglag ang Jerusalem sang 607 B.C.E.? Gani kon magsugod kita isip sa sina nga tuig, matapos ang pito ka literal nga tuig sa 600 B.C.E. Pero wala man sing talalupangdon nga natabo parte sa paggahom sang Dios sina nga tuig. Isa pa, subong sang naistoryahan na naton, mga ginatos ka tuig sang ulihi sang ari si Jesus sa duta, nagsiling sia nga ang pito ka tion wala pa natapos.

Jon: A, huo!

Cameron: Gani, imbes nga literal nga mga tuig, ang pito ka tion nagapatuhoy sa mas malawig nga tion.

Jon: Daw ano kalawig?

Cameron: Ang libro sang Bugna sa Biblia nga naangot sa libro sang Daniel, makabulig sa aton nga mahibaluan ang kadugayon sang pito ka tion. Ginsambit sini ang tatlo ka tion kag tunga nga katumbas sang 1,260 ka adlaw. * Gani ang pito ka tion—doble sang tatlo ka tion kag tunga—katumbas sang 2,520 ka adlaw. Nahangpan mo pa bala ako?

Jon: Huo. Pero indi ko gihapon mahangpan kon paano sini ginapakita nga ang Ginharian sang Dios nagsugod sa paggahom sang 1914.

Cameron: OK, lantawon naton kon paano ini naangot. Kon kaisa sa mga tagna sang Biblia, ang isa ka adlaw katumbas sing isa ka tuig. * Kag kon gamiton naton ang isa ka adlaw nga katumbas sang isa ka tuig, ang pito ka tion katumbas sang 2,520 ka tuig. Gani kon mag-isip kita sing 2,520 ka tuig halin sa 607 B.C.E., madangat ini sa 1914. * Amo ina kon ngaa nagapati kami nga natapos ang pito ka tion sang 1914—ang tuig nga nag-umpisa si Jesus sa paggahom subong Hari sang Ginharian sang Dios. Kag sugod sang 1914, may talalupangdon nga mga hitabo sa bug-os nga kalibutan—nga gintagna na nga daan sang Biblia nga matabo sa katapusan nga mga adlaw.

Jon: Ano ina nga mga hitabo?

Cameron: Usisaon ta bala ang ginsiling ni Jesus nga makita diri sa Mateo 24:7. Parte ini sa tion nga magasugod na sia sa paggahom sa langit. Nagsiling sia: “Kay ang pungsod magatindog batok sa pungsod kag ang ginharian batok sa ginharian, kag may kakulang sa kalan-on kag mga linog sa nagkalainlain nga duog.” Talupangda nga gintagna ni Jesus ang kakulang sa pagkaon kag mga linog sa sina nga tion. Madamo gid nga problema ang natabo sa kalibutan sang nagligad nga siglo, indi bala?

Jon: Huo.

Cameron: Sa sining bersikulo, gintagna man ni Jesus nga may mga inaway sa tion nga magahari na sia sa Ginharian sang Dios. Kag ang libro sang Bugna sa Biblia nagtagna indi lang sang lokal nga inaway kundi inaway nga magaapektar sa bug-os nga kalibutan sa tion sang katapusan. * Nadumduman mo bala kon san-o natabo ang una nga bug-os kalibutan nga inaway?

 Jon: Sang 1914, sang tuig nga siling mo nagsugod na si Jesus sa paggahom. Daw wala ko gid ’na napensaran haw?

Cameron: Kon analisahon naton ini tanan—ang tagna tuhoy sa pito ka tion subong man ang iban pa nga tagna sa Biblia parte sa katapusan nga mga adlaw—eksakto gid ini. Amo nga ang mga Saksi ni Jehova kumbinsido gid nga sang 1914 nagsugod na sa paggahom si Jesus subong Hari sang Ginharian sang Dios, kag nagsugod man ang katapusan nga mga adlaw. *

Jon: Daw indi ko pa gid ini mahangpan tanan.

Cameron: OK lang ina. Ako gani sang una, indi man sina makaintiende. Pero tani nabuligan ka sang aton naistoryahan nga bisan wala ginsambit sa Biblia ang 1914, ginabase diri sang mga Saksi ni Jehova ang ila pagpati parte sa sina nga tuig.

Jon: Huo, nanamian gid ako sa inyo kay bisan ano ang inyo ginahambal halin gid sa Biblia. Indi lang inyoinyo. Pero ngaa wala na lang ginbutang sang Dios sa Biblia nga sang 1914 magasugod ang paggahom ni Jesus sa langit?

Cameron: Kanami sang imo pamangkot, Jon. Ang matuod, madamo nga butang nga indi detalyado nga ginapaathag sa Biblia. Gani ngaa ginpasulat sang Dios ang Biblia nga kinahanglan mo pa manikasog para mahangpan ini? Kon gusto mo hambalan ta ini sa masunod ko nga pagbalik.

Jon: Sige a.

May mga pamangkot ka man bala parte sa Biblia? Gusto mo bala mabal-an ang mga pagpati sang mga Saksi ni Jehova kag kon paano sila nagasimba? Kon amo, indi ka mahuya nga ipamangkot ini sa ila. Nalipay gid sila nga ipaathag ini sa imo.

^ par. 5 Paagi sa ila programa nga libre nga pagtuon sa Biblia, pirme may organisado nga paghambalanay ang mga Saksi ni Jehova parte sa Biblia sa mga tawo.

^ par. 7 Basaha ang “San-o Nagsugod sa Paggahom ang Ginharian sang Dios?—Bahin 1” sa Oktubre 1, 2014 nga isyu sini nga magasin.

^ par. 24 Tan-awa ang tsart nga “Ang Kahoy sa Damgo ni Nabocodonosor.”

^ par. 28 Basaha ang Bugna 6:4.

^ par. 30 Basaha ang kapitulo 9 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova. Mabasa man ini sa www.jw.org/hil.

Magtuon sing Dugang Pa

SABAT SA MGA PAMANGKOT SA BIBLIA

Ano ang Ginapakita sang Kronolohiya sang Biblia Parte sa 1914?

Ang tagna nga “pito ka tion” sa Daniel kapitulo 4 nagatudlo sa kritikal nga panahon sang paggahom sang tawo.

Ano Gid ang Ginatudlo sang Biblia?

Nagakabuhi Bala Kita sa “Katapusan nga mga Adlaw”?

Binagbinaga kon paano ang ginahimo kag batasan sang mga tawo sa palibot naton nangin ebidensia nga nagakabuhi kita subong sa “katapusan nga mga adlaw” nga gintagna sang Biblia.