Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NOBIEMBRE 2014

 TOPIKO SA KOBER | MATUOD BALA SI SATANAS?

Dapat Bala Kita Mahadlok kay Satanas?

Dapat Bala Kita Mahadlok kay Satanas?

Ang “carbon monoxide” indi makita kag makahalalit ini—kaangay ni Satanas

Mabudlay ini masat-uman. Wala ini sing kolor kag baho, kag makahalit ini nga indi mahibaluan. Mahimo nga amo ini ang kabangdanan sang sobra katunga sang nagakapatay sa bilog nga kalibutan: ang carbon monoxide. Pero indi dapat magkabalaka. May pamaagi para mahibaluan ini kag maamligan ang aton kaugalingon. Madamo ang maalamon nga nagabutang sang mga kagamitan nga maka-detect sini para makalikaw sila.

Kaangay sang carbon monoxide, si Satanas indi man makita, mabudlay masat-uman, kag makahalalit gid. Pero ang Dios nagaaman sang bulig. Indi mo kinahanglan kahadlukan si Satanas kon ginapanginpuslan mo ang masunod nga mga aman sang Dios.

Ikasarang sa pagpili. Ang Santiago 4:7 nagasiling: “Pamatuki ang Yawa, kag magapalagyo sia sa inyo.” Bisan gamhanan si Satanas, indi ka niya mapilit nga himuon ang indi mo gusto. Puede ka magpili. Ang 1 Pedro 5:9 nagasiling: “Magtindog kamo batok sa iya [ang Yawa], nga malig-on sa pagtuo.” Dumduma, ginbiyaan ni Satanas si Jesus sang malig-on niya nga ginsikway ang tatlo ka pagsulay. (Mateo 4:11) Mahimo mo man pilion nga sikwayon si Satanas.

Pagpakig-abyan sa Dios. Ang Santiago 4:8 nagapalig-on sa aton nga ‘magpalapit sa Dios.’ Ginaagda ka mismo ni Jehova nga palambuon ang suod nga pagpakig-abyan sa iya. Paano mo ina himuon? Ang pinakamaayo nga paagi amo ang pagtuon sa Biblia tuhoy sa iya. (Juan 17:3) Ang imo natun-an parte sa iya amo ang magapahulag sa imo nga higugmaon sia, kag ina nga gugma ang magapahulag sa imo nga himuon ang iya kabubut-on. (1 Juan 5:3) Samtang nagasuod ka sa imo Amay sa langit, ano ang himuon niya? Si Santiago nagasiling: ‘Magapalapit ang Dios sa imo.’

Si Jehova nagaaman sing bulig para amligan kita

Promisa nga pangamlig. Ang Hulubaton 18:10 nagasiling: “Ang ngalan sang GINOO torre nga mabakud; ang matarung nagadalagan pasulud sini kag may kalig-onan.” Pero wala ini nagakahulugan nga ang personal nga ngalan sang Dios daw anting-anting. Kundi nagakahulugan ini nga ang tanan nga nagatahod sa ngalan sang Dios mahimo makapangabay sing pangamlig sa iya sa bisan ano nga tion.

Halimbawa sa Biblia. Ang Binuhatan 19:19 nagasugid sa aton nahanungod sa bag-o nakumbertir nga mga Cristiano sa Efeso: “Gintipon sang madamo nga nagahimo sang madyik ang ila mga libro kag ginsunog ini sa atubangan sang tanan. Kag gin-isip  nila sing tingob ang bili sini kag nasapwan nga nagabili ini sing kalim-an ka libo ka bilog nga pilak.” * Ginsunog nila ang tanan nga butang nga naangot sa espiritismo, bisan pila pa ang bili sini. Maayo gid ina nga halimbawa para sa aton. Lapnag ang espiritismo sa kalibutan. Bisan pa ang espiritistiko nga mga butang kag buhat daw indi makahalit, may impluwensia ini sang demonyo. Importante gid nga indi kita maghupot sini nga mga butang bisan ano ang matabo.Deuteronomio 18:10-12.

Si Rogelio nga ginsambit sa una nga artikulo, wala nagapati sa Yawa sa sulod sang 50 ka tuig. Pero nagbag-o ang iya pagtamod. Ngaa? “Sa una nga higayon may Biblia na ako,” siling ni Rogelio. “Ang ihibalo sa Kasulatan nagkumbinsi sa akon nga nagaluntad ang Yawa. Ina man nga ihibalo ang nag-amlig sa akon nga indi mangin biktima sang iya impluwensia.”

“Ang ihibalo sa Kasulatan nagkumbinsi sa akon nga nagaluntad ang Yawa. Ina man nga ihibalo ang nag-amlig sa akon nga indi mangin biktima sang iya impluwensia”

Luyag mo bala mag-abot ang tion nga wala na si Satanas? Matabo gid ina. Ang Kasulatan nagasugid sa aton nga sa palaabuton ang Yawa, nga nagapatalang sang madamo, ‘itagbong sa linaw nga kalayo kag asupre.’ (Bugna 20:10) Pero ang pisikal nga kalayo kag asupre indi makahalit sa espiritu nga tinuga. Gani, ang linaw nga kalayo nagarepresentar sang wala katapusan nga kalaglagan. Si Satanas madula na gid sing dayon. Daw ano ka makalilipay ina nga tion para sa mga nagahigugma sa Dios!

Sa karon, dapat padayon ka nga magtuon parte kay Jehova kag sa iya dalanon. * Imadyina kon mag-abot ang tion nga makasiling ka na, “Si Satanas wala na nagaluntad!”

^ par. 8 Kon ang pilak nga ginapatuhuyan amo ang Romano nga denario, mahimo ang balor sini katumbas sa kabug-usan nga sueldo sang 50,000 ka ordinaryo nga trabahador—daku gid nga kantidad!

^ par. 11 Para sa dugang nga impormasyon parte kay Satanas kag sa espiritismo, basaha ang kapitulo 10 sang libro nga Ano Gid ang Ginatudlo sang Biblia? Mangayo sa mga Saksi ni Jehova sang kopya, ukon basaha ini online sa www.jw.org/hil.

Magtuon sing Dugang Pa

Ano ang Katuyuan sang Dios Para sa Duta?

Ginapaathag sang Biblia kon ngaa gintuga sang Dios ang duta, kon san-o madula ang pag-antos, kag kon ano ang matabo sa duta sa palaabuton kag sa mga nagaistar sa sini.

Espiritu nga mga Tinuga—Paano Sila Nagaapektar sa Aton?

May ginhambal ang Biblia parte sa mga anghel kag mga demonyo. Matuod bala ining espiritu nga mga tinuga? Makaapektar bala sila sa imo kabuhi?