Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2014

 TOPIKO SA KOBER | GINHARIAN SANG DIOS—NGAA IMPORTANTE INI SA IMO?

Ngaa Dapat Ka Mangin Interesado sa Ginharian sang Dios?

Ngaa Dapat Ka Mangin Interesado sa Ginharian sang Dios?

Minilyon sa bug-os nga kalibutan ang nagapati kag nagalaum sa Ginharian sang Dios. Ginasunod nila si Jesus, nga nagtudlo sa iya mga sumulunod nga mangamuyo: “Magkari ang imo ginharian, paghimoon ang imo kabubut-on, sa duta.”Mateo 6:10, Ang Biblia sang Philippine Bible Society.

Bisan pa madamo nga tawo ang interesado sa Ginharian sang Dios, ang kalabanan nga relihion wala nagasapak sa sini. Amo nga ang historian nga si H. G. Wells nagsiling nga talalupangdon gid nga ‘tuman ka importante kay Jesus ang iya panudlo parte sa ginatawag niya nga Ginharian sang Langit’ pero, siling ni Wells, ini nga panudlo “indi importante sa . . . panudlo sang kalabanan nga Cristianong relihion.”

Indi pareho sini nga mga relihion, ginapadaku gid sang mga Saksi ni Jehova ang Ginharian sang Dios. Binagbinaga: Ang amon panguna nga balasahon nga ginabasa mo subong, ginabalhag sa 220 ka lenguahe. Halos 46 milyones ka kopya ang ginaimprinta kada isyu, gani amo ini ang pinakalapnag nga magasin sa bilog nga kalibutan. Ano ang panguna nga mensahe sini? Talupangda ang kompleto nga tig-ulo sini: Ang Lalantawan Nagabantala sang Ginharian ni Jehova.  *

Ngaa nagapanikasog gid ang mga Saksi ni Jehova nga ipahibalo, ukon ibantala, ang Ginharian sang Dios? Bangod nagapati kami nga amo ini ang panguna nga mensahe sang pinakaimportante nga libro sa kalibutan—ang Biblia. Kag kumbinsido kami nga amo lang ini ang makasolbar sang mga problema subong.

Ginailog sang mga Saksi ni Jehova si Jesus sa pagpadaku sang Ginharian sang Dios. Sang diri sia sa duta, amo ini ang pinakaimportante sa iya kabuhi kag sa iya ministeryo. (Lucas 4:43) Ngaa importante gid kay Jesus ang Ginharian? Ngaa importante man ini sa imo? Ginaagda ka namon nga usisaon ang sabat sang Biblia, nga binagbinagon sa masunod nga mga artikulo.

^ par. 5 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”