Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2014

 PAG-ISTORYAHANAY PARTE SA BIBLIA

Nagapati Bala ang mga Saksi ni Jehova kay Jesus?

Nagapati Bala ang mga Saksi ni Jehova kay Jesus?

Ang masunod amo ang kinaandan nga pagpakig-istorya sang mga Saksi ni Jehova. Ibutang ta nga ang Saksi nga si Anthony nagkadto kanday Tim.

IMPORTANTE ANG PAGPATI KAY JESUS

Anthony: Hi, Tim. Maayo kay nagkitaay ’ta liwat.

Tim: Gani man.

Anthony: Gindal-an ta ka sang pinakaulihi nga isyu sang Ang Lalantawan kag Magmata! Manamian ka gid sang mga artikulo sini.

Tim: Salamat gid. Maayo gani kay nakakadto ka di subong kay may luyag ’ko tani ipamangkot sa imo.

Anthony: Ano ’na haw?

Tim: Sang nagligad nga adlaw, naistorya ko ang upod ko sa obra. Ginsugiran ko sia nga kanami gid sang mga balasahon nga ginahatag mo sa akon. Pero siling niya nga indi ko kuno ini dapat basahon kay ang mga Saksi ni Jehova wala nagapati kay Jesus. Tuod ’na? Ginsilingan ko sia nga mamangkot lang ’ko kon magbisita ka liwat.

Anthony: Baw, ti maayo kay ginpamangkot mo ’ko sangsa nagpamangkot ka pa sa iban. Kay ti, indi bala nga ang pinakamaayo nga paagi para mahibaluan ang ginapatihan sang isa amo ang pagpamangkot mismo sa iya?

Tim: Amo man ’na gani ang ginahunahuna ko.

Anthony: Ang matuod, nagapati gid ang mga Saksi ni Jehova kay Jesus. Kag kumbinsido kami nga ang pagtuo kay Jesus importante gid para maluwas.

Tim: Amo man ’na ang napensaran ko, pero sang ginsilingan ’ko sang akon kaupod sa obra nga wala kamo nagapati kay Jesus, daw nangduhaduha man ako. Siguro wala ta lang ’ni maistoryahan sang nagligad.

Anthony: OK lang kon ipakita ko sa imo ang pila ka teksto sa Biblia nga nagapadaku nga importante gid ang pagtuo kay Jesus? Amo ini ang mga teksto nga pirme ginagamit sang mga Saksi ni Jehova sa ila pagpakig-istorya sa iban.

Tim: OK a.

Anthony: Maayo ’guro kon sugdan ta sa ginsiling mismo ni Jesus sa Juan 14:6. Bahin ini sang pagpakig-istorya ni Jesus sa isa sang iya mga apostoles. Nagasiling ini: “Si Jesus nagsiling sa iya: ‘Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.’” Suno sa sina nga teksto, ano ang lamang nga paagi para makakadto sa Amay?

Tim: Paagi kay Jesus.

Anthony: Husto. Kag amo gid sina ang ginapatihan sang mga Saksi ni Jehova. May pamangkot ako sa imo: Suno sa imo nahibaluan nga ginapatuman sang Dios, kon ang tawo mangamuyo, kay sin-o ngalan dapat niya ipaagi ang iya pangamuyo?

Tim: Sa ngalan ni Jesus.

Anthony: Huo. Kag amo ’na ang rason kon ngaa ang tanan ko nga pangamuyo ginapaagi ko sa ngalan ni Jesus. Amo man ina sa pangamuyo sang tanan nga Saksi ni Jehova.

Tim: Baw ti maayo kay ginpahibalo mo ’na sa akon.

Anthony: Ang isa pa ka teksto nga puede naton binagbinagon amo ang Juan 3:16. Importante gid ini nga teksto amo nga ginatawag ini nga gamay nga Ebanghelyo. Buot silingon nga kon sumaryuhon ang kabuhi ni Jesus diri sa duta kag ibutang sa isa lang ka teksto, amo ini ang nagakadapat nga teksto. Luyag mo bala nga ikaw ang magbasa sini?

 Tim: Sige a. “Kay ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”

Anthony: Salamat gid. Pamilyar sa imo ini nga teksto?

Tim: Huo, pirme ko ’ni mabatian, kag pirme ko man ’ni makita sa mga karatula kag billboard.

Anthony: Bantog gid ini nga teksto. Kon binagbinagon naton ini sang maayo, talupangda ang ginasiling ni Jesus. Nagsiling sia nga bangod sang gugma sang Dios nangin posible ang wala katapusan nga kabuhi para sa mga tawo—pero kon himuon naton ang ano gani?

Tim: Kon magtuo kita.

Anthony: Huo. Pagtuo sa bugtong nga Anak, si Jesucristo. Kag ini nga punto—ang pagtuo kay Jesus nga nagbukas sang dalan para sa kabuhi nga wala katapusan—amo ang ginapakita diri sa pahina 2 sini nga magasin nga gindala ko sa imo. Suno sa katuyuan sang Ang Lalantawan, nagasiling ini nga “ginapabakod sini ang aton pagtuo kay Jesucristo nga napatay para makatigayon kita sing kabuhi nga walay katapusan. Nagahari na sia karon sa Ginharian sang Dios.”

Tim: Ti, maathag gid man gali. Ara gid mismo ang pamatuod sa inyo magasin nga ang mga Saksi ni Jehova nagapati kay Jesus.

Anthony: Husto.

Tim: Ti, ngaa nagasiling ang mga tawo nga wala kamo nagapati kay Jesus?

Anthony: Mahimo nga may pila sila ka rason. Ginasiling ini sang iban bangod sang nabatian man nila sa iban. Ukon ginhambal ini sa ila sang ila ministro.

Tim: Pamatyag ko nagasiling ang iban nga wala kamo nagapati kay Jesus kay ginatawag ninyo ang inyo kaugalingon nga mga Saksi ni Jehova, kag indi mga Saksi ni Jesus.

Anthony: Mahimo nga amo man ’na ang isa ka rason.

Tim: Ngaa pirme lang kamo nagaistorya parte kay Jehova haw?

“GINPAKILALA KO ANG IMO NGALAN”

Anthony: Ang isa ka rason amo nga nagapati kami nga importante nga gamiton ang personal nga ngalan sang Dios, nga Jehova, pareho sang ginhimo sang iya Anak nga si Jesus. Binagbinaga ang ginsiling ni Jesus sa iya pangamuyo sa iya Amay. Ginsulat ini sa Juan 17:26. Puede mo bala basahon ini nga teksto?

Tim: Sige a. “Ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.”

Anthony: Salamat. Talupangda nga ginsiling ni Jesus nga ginpakilala niya ang ngalan sang Dios. Ano sa banta mo ang rason kon ngaa ginhimo niya ini?

Tim: Hmm. Ambot a.

Ang pagtuo kay Jesus importante para sa kaluwasan

Anthony: Mas maayo ’guro basahon naton ang isa pa ka teksto nga nagapaathag sa sini. Narekord ini sa Binuhatan 2:21. Mabasa naton: “Ang tagsatagsa nga nagatawag sa ngalan ni Jehova maluwas.” Siguro ugyon ka gid nga kon kinahanglanon ang pagtawag sa ngalan ni Jehova para maluwas, wala duhaduha nga nahibaluan gid ini ni Jesus.

Tim: Siempre e.

Anthony: Gani ang kaluwasan sang iya mga sumulunod amo ang isa ka rason kon ngaa importante kay Jesus nga mahibaluan kag gamiton nila ang ngalan sang Dios. Kag isa ini sa panguna nga mga rason kon ngaa pirme kami nagapakig-istorya parte kay Jehova. Nakahibalo kami nga importante gid nga ipakilala ang personal nga ngalan sang Dios, kag buligan ang iban nga magtawag man sa sina nga ngalan.

Tim: Pero bisan pa nga wala makilal-an sang mga tawo ang ngalan sang Dios ukon wala nila ginagamit ini, nahibaluan nila kon sin-o ang ila natumod kon nagaistorya sila sa Dios.

Anthony: Mahimo nga husto ’na. Pero, paagi sa pagpakilala sang Dios sang iya ngalan, ginapahapos niya ang aton pagpakigsuod sa iya.

Tim: Ano ang buot mo silingon?

 Anthony: Hunahunaa ini: Indi man naton kinahanglan mahibaluan ang personal nga ngalan ni Moises. Puede man lang nga makilala sia naton nga tawo nga nagtunga sang Pula nga Dagat ukon ang nagbaton sang Napulo ka Sugo. Amo man si Noe, ngaa kinahanglan gid hibaluon naton ang iya ngalan? Puede ta man lang sia tawgon nga tawo nga naghimo sang arka kag nagluwas sang iya pamilya kag mga sapat. Bisan gani si Jesucristo, puede man lang naton tawgon nga ang isa nga naghalin sa langit kag napatay para sa aton mga sala, indi bala?

Tim: Gani man no.

Anthony: Pero ginsigurado sang Dios nga makilala naton ang ila ngalan. Kay kon kilala naton ang ila ngalan, mangin mas matuod ang ila kasaysayan para sa aton. Bisan pa wala naton nakita sanday Moises, Noe, ukon Jesus, nangin matuod sila sa aton kay nahibaluan naton ang ila ngalan.

Tim: Daw wala ko gid na mapensaran anay, pero daw may punto ka!

Anthony: Kag amo ina ang isa pa ka rason kon ngaa pirme ginapakig-istorya sang mga Saksi ni Jehova ang personal nga ngalan sang Dios. Luyag namon buligan ang mga tawo nga magtuo kay Jehova nga Dios bilang matuod nga Persona nga mapalapitan nila. Pero, ginahatagan man namon sang daku nga importansia ang papel ni Jesus sa aton kaluwasan. Basahon bala naton ang isa pa ka teksto nga nagapadaku pa gid sa sini nga punto.

Tim: Sige a.

Anthony: Ginbasa naton kaina ang Juan 14:6. Dumduma nga nagsiling si Jesus nga sia “ang dalan kag ang kamatuoran kag ang kabuhi.” Maisol kita sang pila ka bersikulo kag talupangdon ang iya ginsiling sa Juan 14:1. Puede mo mabasa ang ginsiling ni Jesus sa ulihi nga bahin sina nga teksto?

Tim: OK a. Ini nagasiling: “Magtuo kamo sa Dios, magtuo man kamo sa akon.”

Anthony: Salamat. Ti, masiling mo bala nga ang matuod nga pagtuo amo ang pagpili kon sin-o ang aton tuuhan? Ayhan kay Jehova ukon kay Jesus?

Tim: Indi. Nagsiling si Jesus nga kinahanglan naton magtuo sa ila nga duha.

Anthony: Husto. Kag nakahibalo ’ko nga magaugyon ka nga indi lang bastante ang pagsiling nga nagatuo kita sa Dios kag kay Jesus. Ang matuod, kinahanglan naton pamatud-an sa aton pagkabuhi nga nagatuo kita sa ila.

Tim: Amo gid e.

Anthony: Pero paano mapakita sang isa nga nagatuo gid sia sa Dios kag kay Jesus? Amo na ang istoryahan naton sa masunod. *

Tim: A ti sige a.

May mga pamangkot ka man bala parte sa Biblia? Gusto mo bala mabal-an ang mga pagpati sang mga Saksi ni Jehova kag kon paano sila nagasimba? Kon amo, indi ka mahuya nga ipamangkot ini sa ila. Nalipay gid sila nga ipaathag ini sa imo.

^ par. 60 Para sa dugang nga impormasyon, basaha ang kapitulo 12 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova.

Magtuon sing Dugang Pa

Pagkabuhi nga Nagapalipay sa Dios

Posible gid ang pagkabuhi nga nagapalipay kay Jehova. Ang matuod, mahimo ka mangin abyan niya.