Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Abril 2014

 TOPIKO SA KOBER

Dapat Ka Bala Mangamuyo?

Dapat Ka Bala Mangamuyo?

‘Kon nahibaluan na sang Dios ang tanan, lakip ang akon ginahunahuna kag kinahanglanon, ngaa mangamuyo pa gid ako?’ mahimo mo ipamangkot. Nagakaigo ina nga pamangkot. Indi bala nagsiling si Jesus nga nahibaluan sang Dios “kon ano nga mga butang ang kinahanglan ninyo antes pa kamo mangayo sa iya”? (Mateo 6:8) Si Hari David sang Israel sadto nakahibalo man sini, kag nagsulat sia: “Wala sing polong sa akon dila, kondi, yari karon, O GINOO, ikaw nakahibalo sini sing bug-os.” (Salmo 139:4) Ti, ngaa dapat pa kita mangamuyo sa Dios? Para masabat ina, binagbinagon naton ang ginasiling sang Biblia parte sa mga pangamuyo. *

“Magpalapit kamo sa Dios, kag magapalapit sia sa inyo.”—Santiago 4:8

 ANG PANGAMUYO NAGAPASUOD SA ATON SA DIOS

Bisan pa ginasiling sang Biblia nga nahibaluan ni Jehova * nga Dios ang tanan, ginapakita man sini nga indi lang sia interesado sa pagtipon sang mga impormasyon parte sa iya mga sumilimba. (Salmo 139:6; Roma 11:33) Ang iya wala sing limitasyon nga memorya indi pareho sang kompyuter nga nagapasulod lang sang mga impormasyon sang kada indibiduwal. Sa pagkamatuod, interesado gid ang Dios sa aton nasulod nga mga panghunahuna bangod luyag niya nga mangin suod kita sa iya. (Salmo 139:23, 24; Santiago 4:8) Amo nga ginpalig-on ni Jesus ang iya mga sumulunod nga mangamuyo, bisan pa nahibaluan na sang iya Amay ang aton panguna nga mga kinahanglanon. (Mateo 6:6-8) Kon ginasugid naton sa aton Manunuga ang aton ginahunahuna, mangin suod pa gid kita sa iya.

Kon kaisa, mahimo nabudlayan kita kon ano gid ang aton ipangamuyo. Sa sina nga kahimtangan, mahimo hibaluon sang Dios ang indi naton mahambal kag gamiton ang iya perpekto nga kaalam para ihatag ang aton mga kinahanglanon. (Roma 8:26, 27; Efeso 3:20) Kon marealisar naton nga ginabuligan kita sang Dios, bisan pa indi ini hilmunon, magasuod pa gid kita sa iya.

GINASABAT BALA SANG DIOS ANG TANAN NGA PANGAMUYO?

Ginapasalig kita sang Biblia nga ginasabat sang Labing Gamhanan nga Dios ang mga pangamuyo sang matutom nga nagasimba sa iya, pero nagahatag man ini sing mga rason kon ngaa wala niya ginapamatian ang iban nga pangamuyo. Halimbawa, sang lapnag ang kasingki sa Israel sadto, ginsugo sang Dios ang propeta nga si Isaias nga silingon ang mga tawo: “Bisan kon maghimo kamo sing madamu nga pangamuyo, indi ako magpamati; ang inyo mga kamut puno sang dugo.” (Isaias 1:15) Maathag nga ang mga wala nagatahod sa kasuguan sang Dios ukon nagapangamuyo nga may malain nga motibo indi makapaabot nga pamatian sang Dios.—Hulubaton 28:9; Santiago 4:3.

Pero ang Biblia nagasiling: “Bisan ano ang pangayuon naton suno sa iya kabubut-on, nagapamati sia sa aton.” (1 Juan 5:14) Buot bala silingon nga sabton dayon sang Dios ang tanan nga pangabay sang iya mga sumilimba? Indi gid man. Binagbinaga ang kahimtangan ni apostol Pablo, nga nangabay sa Dios sing tatlo ka beses nga gabuton ang iya “tunok sa unod.” (2 Corinto 12:7, 8) Mahimo nga may balatian si Pablo sa mata kag naglalain gid sia sa sini! Ginhatagan sia sang dulot sang pagpamulong kag nakabanhaw pa gani, pero dapat niya antuson ang iya balatian. (Binuhatan 19:11, 12; 20:9, 10) Bisan pa nga wala ginsabat ang iya pangamuyo suno sa luyag niya, nagpasalamat si Pablo sa sabat sang Dios.—2 Corinto 12:9, 10.

“Amo ini ang pagsalig naton sa iya, nga bisan ano ang pangayuon naton suno sa iya kabubut-on, nagapamati sia sa aton.”—1 Juan 5:14

Ang matuod, ang pila ka karakter sa Biblia nakabaton sing milagruso nga sabat sa ila mga pangamuyo. (2 Hari 20:1-7) Pero ini nga mga sabat wala pirme nagakatabo bisan pa sang panahon sang Biblia. Naglalain ang pila ka tumuluo kay daw wala ginsabat sang Dios ang ila mga pangamuyo. Si Hari David namangkot: “Tubtub bala san-o, O GINOO? Kalimtan mo bala ako sa gihapon?” (Salmo 13:1) Pero sang narealisar sang matutom nga si David nga pirme sia ginaluwas ni Jehova, ginpabakod niya ang iya pagsalig sa Dios. Sa amo gihapon nga pangamuyo, nagsiling sia: “Nagsalig ako sa imo malig-on nga paghigugma.” (Salmo 13:5) Kaangay ni David, ang  mga sumilimba sang Dios subong mahimo magapadayon sa pagpangamuyo asta nga mabaton nila ang sabat sang Dios.—Roma 12:12.

PAANO GINASABAT SANG DIOS ANG MGA PANGAMUYO?

Ginahatag sang Dios ang aton mga kinahanglanon.

May maayo nga rason ang mahigugmaon nga mga ginikanan kon ngaa wala dayon nila pirme ginahatag ang ginapangayo sang ila kabataan. Sing kaanggid, wala dayon ginasabat sang Dios ang aton mga pangabay suno sa aton ginahunahuna ukon sa tion nga ginapaabot naton. Pero makasalig kita nga ang aton Manunuga, kaangay sang mahigugmaon nga amay, magahatag sang aton kinahanglanon sa husto nga tion kag husto nga paagi.—Lucas 11:11-13.

Ang sabat sang Dios sa aton pangabay mahimo maghalin sa Biblia

Ginasabat ini sang Dios sing indi hilmunon.

Ano abi kon mangamuyo kita agod maumpawan sa aton mga problema? Kay wala nagasabat ang Dios sa milagruso nga paagi, masiling bala kita dayon nga wala gid ini ginasabat ni Jehova? Mas maayo kon binagbinagon anay naton kon bala ginabuligan kita sang Dios sing indi hilmunon. Halimbawa, mahimo himuon sang aton mahigugmaon nga abyan ang iya masarangan para buligan kita sa nagakaigo gid nga tion. (Hulubaton 17:17) Posible bala nga ginpahulag ni Jehova ining mahigugmaon nga abyan para buligan kita? Dugang pa, ang sabat sang Dios sa aton pangabay mahimo maghalin sa Biblia. Mahimo makita naton diri ang kaalam para masolbar ang aton mga problema.—2 Timoteo 3:16, 17.

Mahimo man gamiton sang Dios ang aton suod nga abyan para buligan kita sa nagakaigo gid nga tion

Sa baylo nga kuhaon sang Dios ang aton problema, masami nga ginahatagan niya ang iya mga alagad sing kusog agod malampuwasan ini. (2 Corinto 4:7) Halimbawa, sang nangabay si Jesus sa iya Amay nga dulaon ang iya pag-antos, kay nahadlok sia nga mahuy-an ang ngalan sang Dios, nagpadala si Jehova sang anghel para palig-unon ang iya Anak. (Lucas 22:42, 43) Mahimo man gamiton sang Dios ang suod nga abyan agod palig-unon kita kon kinahanglan naton ini. (Hulubaton 12:25) Bangod ini nga sabat indi hilmunon, mahimo mangin mas alisto kita sa paagi sang Dios sa pagsabat sa aton mga pangamuyo.

Ang iban nga sabat dapat maghulat sa gintalana nga tion sang Dios.

Ang Biblia nagasiling nga ginasabat sang Labing Gamhanan nga Dios ang mga mapainubuson “sa ginatalana nga tion.” (1 Pedro 5:6) Amo nga kon daw wala pa ginsabat ni Jehova ang aton ginapangabay, wala ini nagakahulugan nga indi sia interesado sa aton. Kundi bangod mas nakahibalo sia, ginasabat niya ini suno sa kon ano ang pinakamaayo para sa aton.

“Magpaubos kamo sang inyo kaugalingon sa idalom sang gamhanan nga kamot sang Dios, agod nga bayawon niya kamo sa nagakaigo nga tion.”—1 Pedro 5:6

Sa pag-ilustrar: Imadyina nga may bata ka nga lalaki nga nagapangayo sang bike. Ihatag mo bala dayon sa iya ang iya ginapangayo? Kon pamatyag mo nga indi pa sia responsable nga magpanag-iya sang bike, mahimo nga indi ka anay magbakal. Pero, mahimo mo ihatag sa iya sa ulihi ang iya ginapangayo kon nahibaluan mo nga amo ini ang pinakamaayo sa iya. Mahimo man ihatag sang Dios ang nagakaigo nga “handum sang [aton] tagipusuon” sa husto nga tion kon padayon kita nga mangamuyo.—Salmo 37:4.

SALIGI NGA NAGAPAMATI SI JEHOVA

Ginapalig-on sang Biblia ang mga Cristiano nga indi madulaan sang pagsalig sa balor sang pangamuyo. ‘Hapos lang na ’ya ihambal,’ mahimo isiling sang iban. Indi gid man mahapos maghulat sang sabat sang Dios kon wala sing untat ang aton ginaatubang nga problema ukon pila ka sahi sang inhustisya. Pero maayo kon dumdumon naton ang gintudlo ni Jesus parte sa padayon nga pagpangamuyo.

 Nagsambit si Jesus sang ilustrasyon parte sa imol nga balo nga pirme nagakadto sa indi matarong nga hukom para makatigayon sing hustisya. (Lucas 18:1-3) Sa una nga tion nangindi ang hukom sa pagbulig sa iya, pero sang ulihi nagsiling ini: “Pat-uron ko nga makatigayon sia sang katarungan, agod indi na sia magbalikbalik kag lapyuon gid ako.” (Lucas 18:4, 5) Suno sa orihinal nga lenguahe sang tinaga, ginbuligan sia sang hukom agod indi sia “pagsumbagon sa idalom sang mata,” ukon sing malaragwayon, “paggub-on ang [iya] reputasyon.” * Kon ang indi matarong nga hukom, bangod sa pag-amlig sa iya reputasyon, magabulig sa imol nga balo, labaw pa gid ang aton mahigugmaon nga Dios nga magahatag sing hustisya sa mga “nagatuaw sa iya sa adlaw kag gab-i”! Subong sang ginsiling ni Jesus, “pahanabuon sang [Dios] sing madasig nga mahatagan sila sing katarungan.”—Lucas 18:6-8.

“Padayon sa pagpangayo, kag hatagan kamo.”—Lucas 11:9

Bisan pa kon kaisa natak-an na kita magpangayo sing bulig, indi kita dapat mag-untat. Paagi sa padayon nga pagpangamuyo, mapakita naton nga luyag gid naton magpabulig kay Jehova. Matun-an man naton nga hibaluon ang mga sabat sang Dios sa aton mga pangabay kag subong resulta, magasuod pa gid kita sa iya. Makasalig gid kita nga sabton ni Jehova ang aton mga pangamuyo kon padayon naton nga himuon ini nga may pagtuo.—Lucas 11:9.

^ par. 3 Kon gusto naton nga pamatian sang Dios ang aton mga pangamuyo, dapat tinguhaan gid naton nga tumanon ang iya mga ginapatuman. Kon himuon naton ini, mapamatud-an naton ang gahom sang pangamuyo, subong sang ginabinagbinag sini nga artikulo. Para sa dugang nga impormasyon, basaha ang kapitulo 17 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova, ukon kadtui ang www.jw.org/hil.

^ par. 5 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”

^ par. 22 Sa panahon sang Biblia, ginapaabot sang Dios nga ang mga hukom sa Israel magapakita sing pinasahi nga igtalupangod sa mga balo kag ilo.—Deuteronomio 1:16, 17; 24:17; Salmo 68:5.