Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN PEBRERO 2014

 ANG BIBLIA NAGAPABAG-O SANG KABUHI

Ang Saad nga Paraiso nga Duta Nagpabag-o sang Akon Kabuhi!

 

Ang Saad nga Paraiso nga Duta Nagpabag-o sang Akon Kabuhi!

  • NATAWO: 1974

  • PUNGSOD: LATVIA

  • KABUHI SANG UNA: MANUGPALUMBA SANG MOTOR

ANG AKON NAGLIGAD:

Natawo ako sa Riga, ang kapital sang Latvia. Ang amon iloy ang nagpadaku sa amon ni Manang. Bisan pa Katoliko si Nanay, nagakadto lang kami sa simbahan kon may piesta. Nagapati ako sa mas gamhanan nga puersa, pero subong pamatan-on, nawili ako sa iban nga butang.

Sang nagdaku ako, natalupangdan sang akon iloy nga mahilig ako mangbungkag kag mangay-o sang mga butang. Bangod madamo sing butang sa balay nga puede bungkagon, nabalaka sia kon ako lang isa sa balay. Gani ginhatagan niya ako sing hampanganan nga puede bungkagon kag ibalik liwat kag nanamian gid ako sini. Sibu gid ini nga interes sa isa ko pa nga nanamian, ang pagmotor. Ginpalista ako ni Nanay sa palumba sing motor nga ginatawag Zelta Mopēds (Ang Bulawan nga Moped). Nagsugod ako sing palumba sa moped, kag sang ulihi sa mga motor.

Madasig lang ako makatuon kag sang ulihi nangin madinalag-on gid sa sining madasig kag delikado nga sport. Tatlo ka beses ako nga nagkampeon sa palumba sang superbike sa Latvia, kag kaduha sa Baltic States Superbike Championship.

KON PAANO GINBAG-O SANG BIBLIA ANG AKON KABUHI:

Sa tion nga bantog gid ako sa palumba, nahibal-an sang akon nobya nga si Evija (nga sang ulihi nangin asawa ko) ang parte sa mga Saksi ni Jehova. Nakita niya ang pila sang ila mga literatura nga may kupon sa pagpangabay sang pagtuon sa Biblia. Ginsulatan niya ini kag ginpadala sa ila. Wala madugay, duha ka Saksi ang nagbisita sa iya kag nagtuon sila sa Biblia. Wala ini sing problema sa akon, pero sadto nga tion wala gid ako sing interes sa espirituwal nga mga butang.

Sang ulihi, gin-agda ako sang mga Saksi nga mag-upod sa ila pagtuon sa Biblia. Nagpasugot ako, kag nanamian ako sa akon nabatian. Ang isa gid nga nanamian ko amo ang ginsaad sang Biblia nga paraiso nga duta. Halimbawa, ginpabasa  nila sa akon ang Salmo 37:10, 11, nga nagasiling: “Sa diotay pa nga tion, kag ang malauton wala na; bisan talupangdon mo sing makugihon ang iya duug, wala na sia didto. Apang ang mapainubuson magapanubli sang duta, kag magakalipay sila sa kabuganaan sang paghidait.” Nangin interesado gid ako sa sini nga saad.

Naglambo ang akon interes sa espirituwal. Dayon narealisar ko nga kadamo gid sang kabutigan sa madamo nga relihion. Pero nagdayaw gid ako sa mga panudlo sang Biblia kay rasonable ini kag maathag.

Sang nagpadayon ako sa pagtuon sa Biblia, natun-an ko nga ginapabaloran gid ni Jehova ang kabuhi kag importante gid ini sa iya. (Salmo 36:9) Daku gid ang epekto sini sa akon pagpalumba kay indi ko na luyag nga ibutang sa katalagman ang akon kabuhi. Kundi, luyag ko ini gamiton sa paghimaya kay Jehova. Gani, ang kabantugan, dungog, kag ang kalipay sang pagpalumba sang motor indi na importante sa akon.

Natun-an ko nga may obligasyon ako sa Manughatag sang kabuhi

Sang 1996, nagtambong ako sa internasyonal nga kombension sang mga Saksi ni Jehova sa Tallinn, Estonia, nga malapit lang sa istadyum nga ginapalumbaan ko anay. Sa kombension, nakita ko nga may paghiusa kag paghidait ang mga tawo nga halin sa nagkalainlain nga pungsod. Halimbawa, sang nadula sang isa ka Saksi ang iya bag, naghunahuna ako nga indi na niya ini makita liwat. Pero wala madugay, nakita sini nga Saksi ang iya bag kag wala gid sing may nadula. Nakibot gid ako! Nahangpan ko na subong nga ang mga Saksi nagakabuhi gid sa mataas nga mga talaksan sang Biblia. Padayon kami nga nag-uswag ni Evija sa amon pagtuon, kag sang 1997 nabawtismuhan kami bilang mga Saksi ni Jehova.

MGA BENEPISYO:

Ang pila sang akon abyan napatay bangod sang palumba sa motor. Pero natun-an ko sa Biblia nga may obligasyon ako sa Manughatag sang kabuhi nga si Jehova. Mahimo amo ini ang nagluwas sang akon kabuhi.

Sa sulod sang apat ka tuig, nakapribilehiyo kami ni Evija nga mangin bug-os tion nga mga ministro sa sanga talatapan sang mga Saksi ni Jehova sa Riga. Subong, malipayon kami sa pagpadaku sang amon bata nga babayi nga si Alise, kag sa pagbulig sa iya nga higugmaon si Jehova. Nakapribilehiyo man ako nga makaboluntaryo sing isa ka adlaw kada semana sa opisina sang translation, nga nagakay-o sang salakyan kag iban pa nga mga butang nga naguba. Nalipay gid ako nga gamiton sing maayo ang akon abilidad nga natun-an ko sang bata pa ako! Nagapangbungkag kag nagapangay-o gihapon ako sang mga butang.

Ginapabaloran gid namon sang akon pamilya ang pribilehiyo nga isugid sa iban ang parte sa matuod nga Dios, kag bangod ini sa akon natun-an sa Biblia. Matuod gid nga ang saad nga paraiso nga duta nagpabag-o sang akon kabuhi!