Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Enero 2014

 TOPIKO SA KOBER | KAMATAYON BALA ANG KATAPUSAN SANG TANAN?

Indi ang Kamatayon ang Katapusan sang Tanan!

Indi ang Kamatayon ang Katapusan sang Tanan!

Ang Betania isa ka gamay nga minuro nga tatlo ka kilometro halin sa Jerusalem. (Juan 11:18) May trahedya nga natabo didto pila ka semana antes napatay si Jesus. Ang isa sang iya suod nga mga abyan nga si Lazaro nagbalatian sing malubha kag napatay.

Sang nabatian ini ni Jesus, ginsilingan niya ang iya mga disipulo nga nagtulog si Lazaro kag pukawon niya sia. (Juan 11:11) Pero wala naintiendihan sang iya mga disipulo ang iya buot silingon amo nga naghambal sia: “Si Lazaro napatay.”—Juan 11:14.

Apat ka adlaw pagkatapos sang lubong, nag-abot si Jesus sa Betania kag ginlugpayan si Marta nga utod ni Lazaro. “Kon yari ka lang diri, wala kuntani mapatay ang akon utod,” siling ni Marta. (Juan 11:17, 21) “Ako ang pagkabanhaw kag ang kabuhi,” sabat ni Jesus. “Sia nga nagatuo sa akon, bisan pa mapatay sia, mabuhi sia.”—Juan 11:25.

“Lazaro, gua ka!”

Para ipakita nga matuod gid ang iya saad, nagpalapit si Jesus sa lulubngan kag nagsinggit: “Lazaro, gua ka!” (Juan 11:43) Natingala gid ang mga nakakita kay naggua si Lazaro.

Duha na sadto ang nabanhaw ni Jesus. Ang una amo ang dalagita nga bata ni Jairo. Sang wala pa sia mabanhaw, nagsiling man si Jesus nga nagtulog sia.—Lucas 8:52.

Talupangda nga ginpaanggid ni Jesus ang kamatayon ni Lazaro kag sang bata ni Jairo sa pagtulog. Husto gid ini nga pagpaanggid. Ngaa? Kay ang pagtulog isa ka kahimtangan nga wala sing pangalibutan kag nagapahangop nga wala sing mabatyagan nga kasakit kag pag-antos. (Manugwali 9:5; tan-awa man ang kahon nga  “Ang Kamatayon Pareho sang Mahamuok nga Pagtulog.”) Nahangpan gid sang mga disipulo sadto ni Jesus ang matuod nga kahimtangan sang mga patay. “Para sa mga sumulunod ni Jesus ang kamatayon pagtulog lang, kag ang lulubngan isa ka palahuwayan . . . sang mga napatay  nga may pagtuo,” * siling sang Encyclopedia of Religion and Ethics.

Makalulugpay mahibaluan nga ang mga patay nagakatulog sa lulubngan kag wala nagaantos. Gani, nahibaluan naton kon ano ang nagakatabo kon mapatay kita kag indi na kita dapat magkahadlok.

“KON ANG TAWO MAPATAY, MABUHI PA BALA SIA?”

Bisan pa nanamian kita nga mahamuok ang aton pagtulog kon gab-i, sin-o ang nanamian magtulog sing wala katapusan? Paano naton mapat-od nga ang mga napatay nga nagakatulog sa lulubngan mabuhi liwat pareho kay Lazaro kag sa dalagita ni Jairo?

Si Job sadto namangkot sini sang nabatyagan niya nga daw mapatay na sia. “Kon ang tawo mapatay, mabuhi pa bala sia?”—Job 14:14.

Ginsabat mismo ni Job ang iya pamangkot samtang ginapatuhuyan niya ang Labing Gamhanan nga Dios: “Magapanawag ka, kag ako magasabat sa imo; magahandum ka sa binuhatan sang imo mga kamut.” (Job 14:15) Sigurado gid si Job nga nalangkag si Jehova nga banhawon ang Iya matutom nga mga alagad. Imposible bala ang ginahandum ni Job? Indi gid.

Ang pagbanhaw nga ginhimo ni Jesus nagpakita nga ginhatagan sia sang Dios sang gahom sa pagdula sang kamatayon. Nagsiling pa gani ang Biblia nga ara sa iya ang “mga yabi sang kamatayon.” (Bugna 1:18) Gani buksan ni Jesus ang ganhaan sang lulubngan, pareho sa pagsugo niya nga paligiron ang bato sa lulubngan ni Lazaro.

Sulitsulit nga ginasambit sang Biblia ang saad nga pagkabanhaw. Ginpasalig sang anghel ang propeta nga si Daniel: “Mapatay ka, pero pagabanhawon ka sa katapusan nga mga inadlaw.” (Daniel 12:13, Ang Pulong sang Dios) Ginsilingan ni Jesus ang mga Saduceo, ang mga lider sang mga Judiyo nga wala nagapati sa saad nga pagkabanhaw: “Sayop kamo, bangod wala kamo makahibalo sang Kasulatan ukon sang gahom sang Dios.” (Mateo 22:23, 29) Si apostol Pablo nagsiling: “May paglaum ako sa Dios . . . nga may pagkabanhaw sang mga matarong kag mga di-matarong.”—Binuhatan 24:15.

SAN-O BANHAWON ANG MGA PATAY?

San-o banhawon ang mga matarong kag indi matarong? Ginsilingan sang anghel ang matarong nga si Daniel nga banhawon sia “sa katapusan nga mga inadlaw.” Nagpati man si Marta nga ang iya utod nga si Lazaro “mabanhaw . . . sa pagkabanhaw sa katapusan nga adlaw.”—Juan 11:24.

Ginaangot sang Biblia ang “katapusan nga adlaw” sa paggahom sang Ginharian sang Cristo. Si Pablo nagsulat: “Kay kinahanglan sia [Cristo] maggahom subong hari tubtob mabutang sang Dios ang tanan nga kaaway sa idalom sang iya mga tiil. Subong katapusan nga kaaway, ang kamatayon dulaon.” (1 Corinto 15:25, 26) Amo ini ang rason kon ngaa dapat kita mangamuyo nga mag-abot ang Ginharian sang Dios kag matuman ang iya kabubut-on sa duta. *

Subong sang nahibaluan ni Job, kabubut-on sang Dios nga banhawon ang mga patay. Kon mag-abot ina nga tion, madula na ang kamatayon. Kag wala na sing mamangkot pa, ‘Kamatayon bala ang katapusan sang tanan?’

^ par. 8 Ang Ingles nga tinaga para sa “sementeryo” naghalin sa Griego nga tinaga nga nagakahulugan nga “tululugan.”

^ par. 18 Para mahibaluan ang dugang pa parte sa Ginharian sang Dios, basaha ang kapitulo 8 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova.