Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Nobiembre 2013

 TOPIKO SA KOBER | NGAA NABUDLAYAN ANG IBAN NGA HIGUGMAON ANG DIOS?

Kabutigan 3: Ang Dios Mapintas

Kabutigan 3: Ang Dios Mapintas

ANG GINAPATIHAN SANG MADAMO

“Pagkatapos mismo sang kamatayon, ang kalag sang mga napatay nga may mortal nga sala nagakadto sa impierno, diin magaantos sila sang silot sang impierno, nga ‘wala sing katapusan nga kalayo.’” (Catechism of the Catholic Church) Ang pila ka lider sa relihion nagasiling nga ang impierno amo ang kahimtangan sang bug-os nga pagpahilayo kag pagkanapain sa Dios.

ANG KAMATUORAN SA BIBLIA

“Ang kalag nga nagapakasala mapatay.” (Ezequiel 18:4) Ang mga patay “wala makahibalo sang bisan ano.” (Manugwali 9:5) Kon ang kalag mapatay kag wala sing pangalibutan, paano ini magaantos sa “wala sing katapusan nga kalayo” ukon sa kasakit sang pagpalayo sa Dios wala sing katapusan?

Sa Biblia, ang Hebreo kag Griego nga mga tinaga nga masami gina-translate nga “impierno” nagapatuhoy sa kabilugan nga lulubngan sang katawhan. Halimbawa, sang nagaantos si Job sang puerte kasakit nga balatian, nagpangamuyo sia: “Luyag ko nga taguon mo ako sa akon lulubngan [“sa impierno,” Douay-Rheims Version].” (Job 14:13, Holy Bible—Easy-to-Read Version) Luyag na magpahuway ni Job, indi sa lugar sang pagpaantos ukon ipahilayo sia sa Dios, kundi sa lulubngan.

KON NGAA IMPORTANTE INI

Ang kapintas wala nagapasuod sa aton sa Dios kundi nagapahilayo sa aton. “Halin sang pagkabata, gintudluan na ako sang doktrina sang impierno,” siling ni Rocío nga taga-Mexico. “Nahadlok gid ako amo nga ginhunahuna ko nga wala sing maayo nga mga kinaiya ang Dios. Sa pensar ko akig sia kag indi mapinasensiahon.”

Ang maathag nga ginasiling sang Biblia parte sa paghukom sang Dios kag kahimtangan sang mga patay nagpabag-o sang pagtamod ni Rocío sa Dios. “Nahilway na ako, yadto nga kabug-atan ginkuha sa akon,” siling niya. “Nagasalig na ako sa Dios nga luyag niya ang pinakamaayo para sa aton, nga ginahigugma niya kita, kag puede ko sia mahigugma. Pareho sia sang amay nga nagakapyot sang kamot sang iya kabataan kag luyag gid sang pinakamaayo para sa ila.”—Isaias 41:13.

Madamo ang nagasimba sa Dios bangod nakulbaan sila sa impierno, pero indi luyag sang Dios ina nga sahi sang pagsimba. Kundi si Jesus nagsiling: “Higugmaon mo si Jehova nga imo Dios.” (Marcos 12:29, 30) Dugang pa, kon nagapati kita nga imposible nga mangin indi makatarunganon ang Dios subong, saligan man naton ang iya himuon sa palaabuton. Pareho sa abyan ni Job nga si Elihu, makasalig kita: “Malayo sa Dios nga maghimo sia sing pagkamalaut, kag sa Makaako nga maghimo sia sing kalautan.”Job 34:10.