Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Nobiembre 2013

 MANGIN SUOD SA DIOS

“Ginapadyaan Niya ang mga Nagapangita sa Iya sing Hanuot”

“Ginapadyaan Niya ang mga Nagapangita sa Iya sing Hanuot”

Ginapabaloran bala ni Jehova ang pagpaninguha sang iya mga sumilimba nga mapahamut-an sia? Mahimo magsiling ang iban nga indi sia interesado sa aton. Sayop gid ina nga pagtamod. Ginatadlong ini sang iya Pulong, ang Biblia. Ginapasalig kita sini nga ginapabaloran ni Jehova ang pagpaninguha sang iya matutom nga mga sumilimba. Binagbinaga ang ginsiling ni apostol Pablo sa Hebreo 11:6.

Ano ang makapahamuot kay Jehova? “Kon wala sing pagtuo imposible nga mapahamut-an gid [ang Dios],” sulat ni Pablo. Talupangda nga wala nagsiling si Pablo nga mabudlay pahamut-an ang Dios kon wala sing pagtuo. Kundi, nagsiling sia nga imposible nga himuon ini. Kon sa aton pa, importante ang pagtuo para mapahamut-an ang Dios.

Ano nga sahi sang pagtuo ang makapahamuot kay Jehova? May duha ini ka bahin. Una, “dapat magpati [kita] nga nagaluntad sia.” Ang iban nga translation nagasiling nga “magpati nga matuod sia.” Paano naton mapahamut-an ang Dios kon nagaduhaduha kita nga matuod gid sia? Pero indi lamang amo sini ang nalakip sa matuod nga pagtuo, kay bisan ang mga demonyo nagapati nga matuod si Jehova. (Santiago 2:19) Ang aton pagtuo nga matuod ang Dios dapat magpahulag sa aton nga pamatud-an ini paagi sa pagkabuhi nga nagapahamuot sa iya.—Santiago 2:20, 26.

Ikaduha, “dapat [kita] magpati nga” ang Dios ‘nagapadya.’ Ang tawo nga may matuod nga pagtuo kumbinsido gid nga ang iya pagpaninguha nga magkabuhi nga nagapahamuot sa Dios indi wala sing pulos. (1 Corinto 15:58) Paano naton mapahamut-an si Jehova kon nagaduhaduha kita sa iya ikasarang ukon handum nga padyaan kita? (Santiago 1:17; 1 Pedro 5:7) Ang tawo nga nagasiling nga ang Dios wala nagaulikid, nagapabalor, kag nagakaawa wala nakakilala sa Dios nga ginasambit sang Biblia.

Sin-o ang padyaan ni Jehova? “Ang mga nagapangita sa iya sing hanuot,” siling ni Pablo. Ang isa ka reperensia para sa mga naga-translate sang Biblia nagsiling nga ang Griego nga tinaga para sa “nagapangita sa iya sing hanuot” wala nagakahulugan sing “maggua para magpangita” kundi nagapahangop ini sang pagdangop sa Dios agod “magsimba.” Ang isa pa ka reperensia nagapaathag nga ining Griego nga tinaga nagapanugda sang mabaskog ukon bug-os nga pagpanikasog. Huo, ginapadyaan ni Jehova ang mga nagasimba sa iya sing bug-os tagipusuon kag kakugi bangod sang ila pagtuo.—Mateo 22:37.

Paano naton mapahamut-an si Jehova kon nagaduhaduha kita sa iya ikasarang ukon handum nga padyaan kita?

Paano ginapadyaan ni Jehova ang iya matutom nga mga sumilimba? Nagasaad sia sang indi matupungan nga mga padya nga nagapakita sang iya kaalwan kag gugma—wala katapusan nga kabuhi sa Paraiso nga duta. (Bugna 21:3, 4) Bisan subong, ang mga hanuot nga nagapangita kay Jehova ginapakamaayo na sing bugana. Nagakabuhi sila nga malipayon kag kontento bangod sang bulig sang balaan nga espiritu kag sang kaalam nga makita sa iya Pulong.—Salmo 144:15; Mateo 5:3.

Matuod, ginapabaloran ni Jehova ang matutom nga pag-alagad sang iya mga sumilimba. Nakabulig bala ini sa imo agod mangin mas suod pa gid sa iya? Kon amo, tun-i sing dugang pa kon paano mapalambo kag mapakita ang sahi sang pagtuo nga pakamaayuhon gid ni Jehova.

Bahin sang Biblia nga mahimo basahon sa Nobiembre

Tito 1-3; Filemon 1-25; Hebreo 1-13Santiago 1-5