Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2013

 MANGIN SUOD SA DIOS

“Si Jehova Nagpatawad sing Kinabubut-on sa Inyo”

“Si Jehova Nagpatawad sing Kinabubut-on sa Inyo”

“Ang wala nagapatawad sa iban nagautod sang taytay nga iya ginaagyan.” Amo ini ang ginpadaku sang istoryador sa Britanya sang ika-17 nga siglo nga si Edward Herbert kon ngaa dapat naton patawaron ang iban: Maabot gid ang tion nga kinahanglan man naton magpangayo sing patawad sa iban. (Mateo 7:12) Pero, may mas importante pa nga rason kon ngaa dapat kita magpatawad. Talupangda ang ginsiling ni apostol Pablo sa Colosas 3:13.—Basaha.

Bangod tanan kita indi himpit, mahimo naton mapaakig ukon mapalain ang buot sang iban, kag amo man sini ang mahimo nila sa aton. (Roma 3:23) Paano naton mahuptan ang paghidait sa aton indi himpit nga isigkatawo? Paagi sa paggiya sang Dios, ginlaygayan kita ni Pablo nga mangin mapinasensiahon kag mapinatawaron. Ina nga laygay epektibo gihapon bisan pa ginsambit ini duha ka libo ka tuig na ang nagligad. Usisaon naton ining ginsiling ni Pablo.

“Padayon nga batasa ninyo ang isa kag isa.” Ang “padayon nga batasa” naghalin sa Griegong tinaga nga nagapanugda nga mangin mapinasensiahon ukon mapinatawaron. Ang isa ka reperensia nagsiling nga ginapakita ini nga kinaiya sang mga Cristiano paagi sa “kahanda nga batason ang mga sala ukon indi maayo nga kinaiya nga nagapaakig sa ila.” Ang “isa kag isa” nagapakita nga dapat ini ipakita sang tanan. Buot silingon, kon dumdumon naton nga may mga kinaiya kita nga mahimo makapaakig sa iban, makabulig ini sa aton nga indi pagsapakon ang ila mga kinaiya nga wala naton maluyagan para mahuptan ang kalinong sa tunga naton. Pero ano abi kon makasala ang iban sa aton?

Padayon nga . . . patawaron sing kinabubut-on ang isa kag isa.” Suno sa isa ka iskolar, ang Griego nga tinaga para sa “patawaron sing kinabubut-on” “indi ang kinaandan nga tinaga para sa pagpatawad . . . kundi mas labaw pa ini nga nagapadaku sang mainayuhon nga paagi sang pagpatawad.” Ang isa pa ka reperensia nagsiling nga ini nga tinaga mahimo nagakahulugan nga “paghatag sang regalo, pabor, ukon benepisyo.” Ginapakita naton nga mainayuhon kita paagi sa kinabubut-on nga pagpatawad bisan pa “may reklamo ang isa batok sa isa.” Pero, ngaa dapat handa kita nga maghatag sina nga pabor? Ang isa ka rason amo nga sa masunod nga mga higayon sia naman ang magapatawad sa aton.

“Subong nga si Jehova nagpatawad sing kinabubut-on sa inyo, amo man ang himuon ninyo.” Amo ini ang panguna nga rason kon ngaa dapat patawaron naton sing kinabubut-on ang iban: Ginpatawad kita sing kinabubut-on ni Jehova nga Dios. (Miqueas 7:18) Pamensari sing makadali ang dalagku nga mga pabor nga ginhatag Niya sa mahinulsulon nga mga makasasala. Indi pareho sa aton, wala sia sing sala. Pero, kinabubut-on kag bug-os niya nga ginapatawad ang mahinulsulon nga mga makasasala bisan pa nakahibalo sia nga indi na niya kinahanglan magpangayo sing patawad sa ila. Si Jehova ang pinakamaayo nga halimbawa sang kinabubut-on nga pagpatawad sa mahinulsulon nga mga makasasala!

Si Jehova ang pinakamaayo nga halimbawa sang kinabubut-on nga pagpatawad sa mahinulsulon nga mga makasasala!

Nagasuod kita kay Jehova bangod sang iya kaluoy kag nagapahulag ini sa aton nga ilugon sia. (Efeso 4:32–5:1) Gani mas maayo nga pamangkuton naton ang aton kaugalingon, ‘Bangod mainayuhon nga ginapatawad ako ni Jehova, ngaa indi ako magpatawad sa pareho ko nga indi himpit nga tawo nga matuod nga nagahinulsol sang nakasala sia sa akon?’—Lucas 17:3, 4.

Bahin sang Biblia nga mahimo basahon sa Oktubre

Galatians 1-6; Ephesians 1-6; Philippians 1-4; Colossians 1-4; 1 Thessalonians 1-5; 2 Thessalonians 1-3; 1 Timothy 1-6–2 Timothy 1-4