Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2013

 MANGIN SUOD SA DIOS

“Ginahigugma sang Dios ang Nagahatag sing Malipayon”

“Ginahigugma sang Dios ang Nagahatag sing Malipayon”

Ano nga regalo ang nanamian mo gid? Mas nanamian ka gid siguro kon ang naghatag sini nagapalangga sa imo sangsa napilitan ukon naobligar lang. Kon parte sa paghatag, importante ang motibo. Importante ini sa aton, kag ilabi na sa Dios. Binagbinaga ang inspirado nga mga pinamulong ni apostol Pablo sa 2 Corinto 9:7.

Ngaa ginsulat ini ni Pablo? Luyag niya nga palig-unon ang mga Cristiano sa Corinto nga suportahan ang ila pigado nga mga masigkasumilimba sa Judea. Ginpilit bala niya ang mga taga-Corinto nga maghatag? Sa kabaliskaran, sia nagsulat: “Maghimo ang kada isa suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang nagahatag sing malipayon.” Binagbinagon naton ini nga laygay.

“Suno sa ginpamat-od niya sa iya tagipusuon.” Ang matuod nga Cristiano nagahatag bangod namat-od sia “sa iya tagipusuon” nga himuon ini, siling ni Pablo. Ginahunahuna man sang isa ka Cristiano ang kinahanglanon sang iya mga masigkatumuluo. Ang orihinal nga tinaga nga “ginpamat-od” “may ideya sang paghunahuna sing abanse,” siling sang isa ka iskolar. Gani ginahunahuna sang isa ka Cristiano ang kinahanglan sang iya mga masigkatumuluo kag kon ano ang iya mahimo para mabuligan sila.—1 Juan 3:17.

“Indi sing paganot ukon ginapilit.” Ginpatalupangod ni Pablo ang duha ka sahi sang paghatag nga wala ginahimo sang matuod nga mga Cristiano—nagapangalag-ag kag napilitan. Ang Griego nga tinaga para sa “paganot” literal nga nagakahulugan sing “nasubuan (ukon, nagabakho).” Ang nagapaganot, ukon nagapangalag-ag “nagahatag nga nasubuan kay madula ang iya kuwarta,” paathag sang isa ka reperensia. Ang iban nagahatag kay napilitan sila. Sin-o sa aton ang luyag magbaton sang regalo halin sa nagapangalag-ag ukon napilitan nga manughatag?

“Ginahigugma sang Dios ang nagahatag sing malipayon.” Kon mamat-od ang isa ka Cristiano nga maghatag, dapat himuon niya ini sing malipayon, siling ni Pablo. Ang matuod, ang kalipay epekto sang paghatag nga husto ang motibo. (Binuhatan 20:35) Ang malipayon nga manughatag indi makatago sang iya kalipay. Ang matuod, ang tinaga nga “malipayon” mahimo nagalaragway sa ginabatyag kag ginapakita sang manughatag. Ang malipayon nga manughatag nagatandog sang aton tagipusuon. Ginapahalipay man niya ang Dios. Ang isa pa ka translation nagasiling: “Ginahigugma sang Dios ang mga tawo nga nanamian maghatag.”—Contemporary English Version.

“Ginahigugma sang Dios ang mga tawo nga nanamian maghatag”

Ang inspirado nga mga pinamulong ni apostol Pablo amo ang prinsipio nga nagagiya sa mga Cristiano kon nagahatag. Nagahatag man kita sang aton tion, kusog, ukon mga materyal, himuon naton ini sing kinabubut-on kag bangod nanamian gid kita nga mangin maalwan sa iban, ilabi na sa mga imol. Indi lang nga mangin malipayon kita sa sini kundi mahamuot pa gid ang Dios sa aton, kay “ginahigugma sang Dios ang nagahatag sing malipayon.”

Bahin sang Biblia nga mahimo basahon sa Septiembre

1 kag 2 Corinto