Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Hulyo 2013

 MGA SEKRETO SANG KALIPAY SA PAMILYA

Kon Paano Mangin Malipayon ang Ikaduha nga Pag-asawahay

Kon Paano Mangin Malipayon ang Ikaduha nga Pag-asawahay

HERMAN: * “Pagkatapos sang 34 ka tuig nga pag-asawahay, napatay sa kanser ang akon una nga asawa. Sang nangasawa ako kay Linda, ginapamensar niya nga pirme ko sia ginakomparar sa akon una nga asawa. Nagalain pa gid ang kahimtangan kon ang amon mga abyan mag-istorya parte sa maayo nga mga kinaiya sang akon una nga asawa. Nasubuan gid si Linda.”

LINDA: “Sang nag-asawahay kami ni Herman, daw pirme ako ginapaanggid sa iya una nga asawa. Mapinalanggaon gid sia, malulo, kag mahinhin. Kon kaisa nagapalibog ako kon bala matupungan ko sia.”

Nagdiborsio si Linda sa iya una nga bana. Malipayon sila ni Herman nga nakilala nila ang isa kag isa. Pero, ginaako nila nga ang ikaduha nga pag-asawahay may mga kabudlayan nga wala gid nila maeksperiensiahan sa ila una nga pag-asawahay. *

Kon nagminyo ka liwat, ano ang imo nabatyagan sa imo ikaduha nga pag-asawahay? Si Tamara nga diborsiada, nga namana liwat pagligad sang tatlo ka tuig, nagsiling: “Sa imo una nga pagpamana, pamatyag mo magaupdanay kamo tubtob san-o. Pero kon namana ka liwat, daw indi mo na ina mabatyagan, kay naeksperiensiahan mo na nga natapos ang imo una nga pag-asawahay.”

Pero, madamo nga mag-asawa ang nangin malipayon sa ila ikaduha nga pag-asawahay. Nangin madinalag-on ini—kag mahimo man ini matabo sa imo! Paano? Binagbinaga ang tatlo ka kabudlayan kag kon  paano ang mga prinsipio sa Biblia makabulig sa imo nga maatubang ini. *

KABUDLAYAN 1: NAGAPANINGUHA KA NGA INDI MAAPEKTUHAN SANG IMO UNA NGA PAG-ASAWAHAY ANG INYO PAG-ASAWAHAY SUBONG.

“Indi ko malimtan ang akon una nga pag-asawahay, ilabi na kon nagabakasyon kami sa mga lugar nga ginkadtuan man namon anay sang akon una nga bana,” siling ni Ellen, nga taga-South Africa. “Kon kaisa ginakomparar ko ang akon bana subong sa akon bana sang una.” Sa pihak nga bahin, kon ang imo tiayon kasal sang una, mahimo mangakig ka kon pirme niya ginasugilanon ang parte sa iya una nga pag-asawahay.

Maghimo sang mga butang nga mas makapasuod sa inyo nga mag-asawa

SUHESTYON: Batuna ang kamatuoran nga indi ka puede magpaabot nga malipatan mo ukon sang imo tiayon subong ang inyo una nga pag-asawahay, ilabi na kon nagdugay ini. Ang matuod, ginaako sang iban nga di-hungod nga matawag nila ang ila tiayon sa ngalan sang ila una nga tiayon! Paano mo atubangon ang amo sini nga mga kahimtangan? “Tinguhai nga hangpon ang isa kag isa,” laygay sang Biblia.—1 Pedro 3:8, New Century Version.

Indi pagdumilii ang tanan nga pagsambit parte sa una nga pag-asawahay. Kon gusto sang imo tiayon nga mag-istorya parte sa ila kabuhi sang una niya nga tiayon, magpamati sing maayo. Indi man maghinakop dayon nga ginakomparar ka niya. “Wala nalainan ang akon asawa nga si Kaitlyn nga istoryahan ang akon una nga asawa,” siling ni Ian, nga nangasawa liwat pagkatapos sang napulo ka tuig. “Kundi, ginatamod niya ini nga isa ka paagi nga mas makilala pa gid niya ako.” Mahimo makabulig pa gani ini sa imo nga magsuod pa gid kamo sang imo bag-o nga tiayon.

Magpokus sa pinasahi kag maayo nga mga kinaiya sang imo tiayon subong. Matuod, mahimo nga wala sa imo tiayon ang iban nga kinaiya ukon abilidad sang imo una nga tiayon. Pero mahimo nga may kinaiya man ang imo tiayon subong nga wala sa imo una nga tiayon. Gani pabakura ang imo relasyon sa imo tiayon subong, “indi sa pagpaanggid sa iban nga tawo,” kundi paagi sa pagpamensar kag pag-apresyar sang nanamian mo sa imo tiayon. (Galacia 6:4) Si Edmond, nga kaduha nangasawa, nagsiling, “Kon wala sing magkapareho nga pag-abyanay, wala man sing magkapareho nga pag-asawahay.”

Paano mo mabalanse ang maayo nga mga eksperiensia ninyo sang una mo nga tiayon sa kabuhi ninyo sang imo tiayon subong? “Isa ka bes, ginpaathag ko sa akon asawa nga ang akon una nga pag-asawahay daw pareho sa isa ka matahom nga libro nga ginsulat namon sang akon una nga asawa,” siling ni Jared. “Kon kaisa mahimo nga mabuksan kag mabasa ko ini kag madumduman ko ang amon maayo nga mga eksperiensia. Pero wala na ako nagakabuhi sa sina nga libro. Kundi, kami sang akon asawa nagsulat sang amon kaugalingon nga libro, kag diri na ako nagakabuhi subong nga malipayon.”

TILAWI INI: Pamangkuta ang imo tiayon kon bala nasaw-ahan sia nga istoryahan ang parte sa imo una nga pag-asawahay. Hibalua kon san-o indi dapat istoryahan ang parte sa una nga pag-asawahay.

KABUDLAYAN 2: NABUDLAYAN KA MAKIG-ANGOT SA IMO MGA ABYAN NGA INDI KILALA SANG IMO BAG-O NGA TIAYON.

“Wala madugay sa tapos kami mag-asawahay, pamatyagan sang akon asawa daw ginatilawan sia sang akon mga abyan,” siling ni Javier, nga nangasawa liwat anom ka tuig pagkatapos sang iya diborsio. Tuhay naman ang natabo kay Leo. Nagsiling sia, “Ginasilingan sang iban nga tawo ang akon asawa nga palangga kag nahidlaw gid sila sa iya una nga bana—sa atubangan ko mismo!”

SUHESTYON: Tilawi nga hangpon ang imo mga abyan. “Kon kaisa, ginapamensar ko nga nasakitan ukon nasaw-ahan ang akon mga abyan nga makaupod kami nga mag-asawa kay ako lang ang ila kilala,” siling ni Ian, nga ginsambit kaina. Gani, ‘mangin makatarunganon, kag magpakita sang bug-os nga kalulo sa tanan nga tawo.’ (Tito 3:2) Hatagi sing tion ang imo mga abyan kag pamilya nga maka-adjust. Bangod nagbag-o ang imo pag-asawahay, mahimo man magbag-o ang imo mga pagpakig-abyan. Si Javier nga ginsambit kaina nagsiling nga samtang nagadugay, nagapakig-angot sila liwat sa ila mga abyan sang una.  “Pero ginatinguhaan man namon nga makig-abyan sa iban,” dugang niya, “kag nakabulig ini sa amon.”

Pamensara ang balatyagon sang imo tiayon kon nagapakig-upod ka sa imo mga abyan sang una. Halimbawa, kon maistoryahan ang parte sa imo una nga pag-asawahay, maghalong nga basi mabatyagan sang imo asawa subong nga indi sia bahin sang grupo. “Ang mga pulong nga wala ginhunahuna sing maayo antes ihambal,” siling sang isa ka hulubaton sa Biblia, “makasakit pareho sa espada, pero ang mga pulong nga ginhunahuna sing maayo antes ihambal makapaayo.”—Hulubaton 12:18, Ang Pulong sang Dios, APD.

TILAWI INI: Hunahunaa ang mga kahimtangan nga mahimo masaw-ahan ka ukon ang imo tiayon. Istoryahi ninyo sing abanse kon paano sabton ang mga pamangkot kag komento sang inyo mga abyan parte sa inyo una nga tiayon.

KABUDLAYAN 3: NABUDLAYAN KA MAGSALIG SA IMO BAG-O NGA TIAYON BANGOD GINLUIBAN KA SANG UNA.

“Nakulbaan ako nga basi luiban ako liwat,” siling ni Andrew, nga ginbiyaan sang iya una nga asawa. Sang ulihi, napangasawa niya si Riley. “Nagakabalaka ako nga basi indi ko matupungan ang una nga bana ni Riley. Nahadlok man ako nga basi magbatyag sia nga indi ako ang husto nga bana para sa iya kag biyaan niya ako.”

SUHESTYON: Ipautwas ang imo mga kabalaka sa imo tiayon. “Mapaslawan ang mga plano kon wala sing paghambalanay,” siling sang Biblia. (Hulubaton 15:22, New World Translation of the Holy Scriptures, NW) Ang paghambalanay nakabulig kay Andrew kag Riley nga saligan ang isa kag isa. “Ginsilingan ko si Riley nga indi ko gid paghunahunaon nga kon may problema, madiborsio na lang kami,” siling ni Andrew, “kag amo man sini ang pasalig sa akon ni Riley. Amat-amat nga naglig-on ang akon pagsalig sa iya.”

Kon ginluiban anay ang imo tiayon subong, himua ang tanan para saligan ka niya. Halimbawa, sanday Michel kag Sabine, nga pareho nga nagdiborsio sa ila una nga mga tiayon, nagpasalig nga pahibal-on nila ang isa kag isa kon makakomunikar sila sa ila una nga tiayon. “Bangod sini, nakabatyag kami sing kasiguruhan,” siling ni Sabine.—Efeso 4:25.

TILAWI INI: Limitahi ang pagpakigsugilanon sa indi mo kasekso, sa personal man, sa telepono, ukon sa Internet.

Madamo sang ikaduha nga pag-asawahay ang nangin madinalag-on, kag mahimo mo man ini. Kon ikomparar sa imo una nga pag-asawahay, mas kilala mo na subong ang imo kaugalingon. “Nalipay gid ako sa amon pag-asawahay ni Riley,” siling ni Andrew, nga ginsambit kaina. “Pagligad sang 13 ka tuig nga pag-asawahay, suod na gid ang amon kaangtanan—kag indi gid namon luyag nga madula ini.”

^ par. 3 Gin-islan ang mga ngalan.

^ par. 5 Tuhay gid ang kahimtangan kon napatay ang imo tiayon sangsa nagdiborsio kamo. Ini nga artikulo gindesinyo para buligan ang isa kon nagaatubang sang bisan diin sini nga sitwasyon nga mangin malipayon ang ikaduha nga pag-asawahay.

^ par. 7 Para sa dugang nga impormasyon parte sa mga kabudlayan sa pagpadaku sang mga manak, basaha ang mga artikulo nga “Paano Mangin Madinalag-on ang Ikaduha nga Pamilya?” sa Abril 2012 nga isyu sang Magmata! nga ginhimo sang mga Saksi ni Jehova.

PAMANGKUTA ANG IMO KAUGALINGON . . .

  • Ano ang pila ka pinasahi nga kinaiya sang akon tiayon ang nanamian ko gid?

  • Kon maistoryahan ang parte sa akon una nga pag-asawahay, paano ko mapasalig kag mapadunggan ang akon tiayon subong?

Magtuon sing Dugang Pa

PAANO MANGIN MALIPAYON ANG IMO PAMILYA?

Magmatutom sa Isa kag Isa

Mapakita lang bala ang katutom sa pag-asawahay paagi sa paglikaw sa pagpanghilahi?