Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2013

 TUDLUI ANG INYO KABATAAN

Ano ang Matun-an Naton sa Kriminal?

Ano ang Matun-an Naton sa Kriminal?

May matun-an kita sa kriminal nga ginaistorya ni Jesus sa piktyur. Naghinulsol sia sa iya mga sala. Ginpangabay niya si Jesus: “Dumduma ako kon magsulod ka sa imo ginharian.” Pareho sang makita mo sa piktyur, ginaistorya sia ni Jesus. Nakahibalo ka bala kon ano ang ginahambal ni Jesus sa iya? * Ginpromisahan sia ni Jesus: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.”

Ano sa banta mo ang hitsura sang Paraiso?— Para mahibaluan naton ang husto nga sabat, istoryahan naton ang Paraiso nga ginhimo sang Dios para sa una nga lalaki kag babayi, sanday Adan kag Eva. Diin ina nga Paraiso? Sa langit bala, ukon sa duta?

Husto ka kon sa duta ang sabat mo. Gani kon pensaron naton nga ang kriminal ara “sa Paraiso,” diri sia mismo sa duta magaistar kon himuon na ini nga paraiso. Ano ang hitsura sini nga Paraiso?— Hibaluon naton.

Pagkatapos nga natuga ni Jehova nga Dios ang una nga mag-asawa nga sanday Adan kag Eva, ang Biblia nagasiling nga ginbutang niya sila sa paraiso diri sa duta. Gintawag ini nga ‘katamnan sa Eden.’ Maimadyin mo bala kon daw ano katahom ang ‘katamnan sang Eden’?— Sigurado nga mas maayo kag matahom ini istaran sangsa bisan diin nga lugar!

Ano sa banta mo? Mangin kaupod bala sang mahinulsulon nga kriminal si Jesus diri sa duta?— Indi, kay si Jesus ang mangin Hari sa langit nga magagahom sa Paraiso sa duta. Gani mangin kaupod ni Jesus ang kriminal, sa kahulugan nga, banhawon sia ni Jesus kag siguraduhon nga maatipan  sia sa Paraiso sa duta. Pero ngaa paistaron ni Jesus ini nga kriminal sa Paraiso?— Istoryahan naton ini.

Matuod, ini nga kriminal nakahimo sing malain gid nga mga butang. Amo man sini ang ginhimo sang binilyon nga nagkabuhi sa duta. Pero nahimo ini sang kalabanan sa ila bangod wala sila natudluan parte kay Jehova kag kon ano ang luyag niya nga himuon nila.

Gani ang mga tawo pareho nila, lakip ang kriminal nga gin-istorya ni Jesus sa usok, pagabanhawon sa Paraiso diri sa duta. Tudluan sila kon ano ang kabubut-on sang Dios. Dayon, pamatud-an nila nga ginahigugma nila si Jehova.

Nahibaluan mo bala kon paano nila ina mapamatud-an?— Paagi sa paghimo sang ginapatuman sang Dios sa ila. Masadya gid mag-istar sa Paraiso kag makaupod ang mga tawo nga nagahigugma kay Jehova kag sa isa kag isa!

^ par. 3 Kon ginabasa mo ini sa bata, magdulog ka kon makita mo ang dash (—) kag pasabta sia.