Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Hunyo 2013

 MANGIN SUOD SA DIOS

Si Jehova “Wala sing Ginapasulabi”

Si Jehova “Wala sing Ginapasulabi”

Nabiktima ka na bala sang diskriminasyon? Gindis-ayrihan ka na bala sing pangabay, serbisyo, ukon ginhikayan bangod sang imo pamanit, ginhalinan, ukon tindog sa komunidad? Kon huo, wala ka nagaisahanon. Pero may maayo nga balita: Ining lapnag nga diskriminasyon sa duta wala nagaluntad sa langit. “Ang Dios wala sing ginapasulabi,” malig-on nga siling sang Cristiano nga si apostol Pedro.—Basaha ang Binuhatan 10:34, 35.

Ginhambal ini ni Pedro sa wala gid ginapaabot nga lugar—sa balay sang Gentil nga si Cornelio. Si Pedro, nga isa ka Judiyo, nagkabuhi sa tion nga ginakabig sang mga Judiyo ang mga Gentil nga mahigko kag indi gid dapat pakig-angutan. Pero ngaa ara si Pedro sa balay ni Cornelio? Ina bangod nga gin-areglar ni Jehova nga Dios ini nga pagkit-anay. Nakabaton si Pedro sang palanan-awon halin sa Dios nga nagsugo sa iya: “Indi na pagtawga nga nadagtaan ang mga butang nga natinluan na sang Dios.” Wala nahibaluan ni Pedro nga isa ka adlaw antes sini, nakabaton man si Cornelio sang palanan-awon nga nagasugo sa iya nga ipatawag si Pedro. (Binuhatan 10:1-15) Sang narealisar ni Pedro nga si Jehova ang sa likod sini, indi niya mapunggan nga maghambal.

“Matuod gid,” siling ni Pedro, “nahantop ko nga ang Dios wala sing ginapasulabi.” (Binuhatan 10:34) Ang Griego nga tinaga nga gin-translate “ginapasulabi” literal nga nagakahulugan sing “nagapanguha sang mga nawong.” (The Kingdom Interlinear Translation of the Greek Scriptures) Parte sa sini nga tinaga, ang isa ka iskolar nagapaathag: “Nagapatuhoy ini sa hukom nga nagatulok sa nawong sang isa ka tawo kag nagahukom, indi base sa mga ebidensia, kundi base sa iya nagustuhan ukon indi nagustuhan sa tawo.” Ang Dios wala nagatulok sa nawong nga nagabase sa iya rasa, nasyonalidad, tindog sa komunidad, ukon iban pa nga pisikal nga butang.

Sa baylo, si Jehova nagatulok sa tagipusuon. (1 Samuel 16:7; Hulubaton 21:2) Masunod, si Pedro nagsiling: “Sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binuhatan 10:35) Ang pagkahadlok sa Dios nagakahulugan nga tahuron naton sia, padunggan, kag saligan, nga ginalikawan ang bisan ano nga makapasubo sa iya. Ang paghimo sang pagkamatarong nagalakip sang kahanda sa paghimo sing maayo sa atubangan sang Dios. Nagakalipay si Jehova sa tawo nga ang tagipusuon puno sang matinahuron nga pagkahadlok nga nagapahulag sa iya nga himuon ang maayo.—Deuteronomio 10:12, 13.

Kon nagatulok si Jehova sa duta, isa lang ka rasa ang iya makita—ang tawhanon nga rasa

Kon nakaeksperiensia ka sing diskriminasyon ukon pagpasulabi, mapalig-on ka sa ginsiling ni Pedro parte sa Dios. Ginabuyok ni Jehova ang mga tawo sa tanan nga pungsod sa matuod nga pagsimba. (Juan 6:44; Binuhatan 17:26, 27) Ginapamatian niya kag ginasabat ang pangamuyo sang iya mga sumilimba bisan ano man ang ila rasa, nasyonalidad, ukon tindog sa komunidad. (1 Hari 8:41-43) Makasalig kita nga kon nagatulok si Jehova sa duta, isa lang ka rasa ang iya makita—ang tawhanon nga rasa. Napahulag ka bala nga magtuon sing dugang pa parte sa sining wala sing ginapasulabi nga Dios?

Bahin sang Biblia nga mahimo basahon sa Hunyo

Juan 17-21Binuhatan 1-10