Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2013

Saligan Mo Bala ang Dios?

Saligan Mo Bala ang Dios?

IBUTANG ta nga may abyan ka nga ginasaligan mo gid, pero may ginhimo sia nga indi mo maintiendihan. Ginapakalain sang iban ang iya ginahimo, nga nagasiling nga mapintas sia. Magaugyon ka bala dayon sa ila, ukon pamatian mo anay ang imo abyan? Kon wala sia para magpaathag, magahulat ka bala, nga indi magpadasudaso sa paghukom sa iya?

Antes magsabat, mahimo luyag mo makahibalo sing dugang pa nga detalye. Mahimo mamangkot ka, ‘Daw ano ko kakilala ang akon abyan, kag ngaa ginasaligan ko sia?’ Maayo ini binagbinagon. Pero pamensara: Puede bala naton maaplikar ang amo man nga mga prinsipio parte sa kon bala mapintas ang Dios?

Mahimo mabudlayan ka sa paghangop sang pila ka ginhimo sang Dios, ukon mahimo nagapalibog ka kon ngaa gintugutan niya ini nga matabo. Madamo ang magasiling sa imo nga mapintas ang Dios kag hayluhon ka nga hukman man sia. Indi bala mas maayo nga indi mo sia anay paghukman asta mahibaluan mo ang dugang pa nga detalye? Ang sabat nagadepende kon daw ano mo kakilala ang Dios. Pamangkuta ang imo kaugalingon, ‘Ano nga sahi sang abyan ang Dios para sa akon?’

Kon mabudlay ang imo pagkabuhi, mahimo magsiling ka nga indi mo abyan ang Dios. Pero pamensara sing makadali. Ang Dios bala ang responsable sa imo mga kabudlayan—ukon sa mga pagpakamaayo? Subong sang nahibaluan naton, si Satanas amo “ang manuggahom sini nga kalibutan,” indi si Jehova. (Juan 12:31) Gani si Satanas amo ang kabangdanan sang kalabanan nga kasakit kag inhustisya sa sini nga kalibutan. Kag indi bala nga magaugyon ka nga ang aton mga problema resulta sang aton indi pagkaperpekto kag sang indi makontrol nga mga hitabo?

Ang Dios bala ang responsable sa imo mga kabudlayan—ukon sa mga pagpakamaayo?

Sa pihak nga bahin, ano ang mga ginhimo sang Dios? Binagbinaga ang ginasiling sang Biblia: ang Dios amo ang “naghimo sang langit kag duta”; ang iya mga binuhatan nagalakip sang aton lawas nga ginhimo sing “makahalangawa kag makatilingala”; kag si Jehova “ang Dios nga sa iya kamut yara ang imo ginhawa.” (Salmo 124:8; 139:14; Daniel 5:23) Ano ang buot silingon sini tanan?

Nagakahulugan ini nga utang naton sa aton Manunuga ang aton kabuhi. (Binuhatan 17:28) Buot silingon nga ang aton kabuhi, ang katahom sang aton palibot, ang kalipay sang gugma kag pag-abyanay, kag ang kalipay sa pagpanabor, pagbatyag, pagpamati, kag pagpanimaho—tanan ini regalo halin sa Dios. (Santiago 1:17) Indi bala nga ini nga mga pagpakamaayo nagahimo sa iya nga isa ka Abyan nga dapat pabaloran kag saligan?

Pero mahimo nga mabudlayan ka nga saligan ang Dios. Mahimo nagabatyag ka nga indi mo pa gid sia kilala. Natural lang ina. Sa sining malip-ot nga mga artikulo, indi naton mabinagbinag ang tanan nga rason kon ngaa ginahukman sang iban nga mapintas sia. Pero mas maayo kon kilalahon pa gid naton ang Dios. * Nagasalig kami nga samtang ginahimo mo ina, mahibaluan mo ang kamatuoran parte sa iya. Mapintas bala sia? Indi, kundi: “Ang Dios gugma.”—1 Juan 4:8.

^ par. 8 Halimbawa, hibalua ang dugang nga impormasyon kon ngaa ginatugutan sang Dios ang kalautan sa kapitulo 11 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

 

 

Magtuon sing Dugang Pa

Ngaa Ginatugutan sang Dios ang Kalautan kag Pag-antos?

Paano nagsugod ang kalautan, kag ngaa gintugutan ini sang Dios nga magpadayon? Madula pa bala ang pag-antos?