Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2013

 TOPIKO SA KOBER: MAPINTAS BALA ANG DIOS?

Ngaa Ginasiling sang mga Tawo nga Mapintas ang Dios?

Ngaa Ginasiling sang mga Tawo nga Mapintas ang Dios?

NAKIBOT ka bala sa pamangkot nga “Mapintas Bala ang Dios?” Ang pila nakibot, pero madamo ang nagapalibog kon bala mapintas ang Dios—ukon ginhaumhaum nila nga amo sia sini. Ngaa?

Ang pila nga nakalampuwas sa mga kalamidad nagapamangkot: “Ngaa ginatugutan ini sang Dios? Wala bala sia sing balatyagon? Ukon mapintas bala sia?”

Amo man sini ang ginapamangkot sang iban kon nagabasa sila sang Biblia. Nabasahan nila ang parte kay Noe kag ang Anaw, kag nagapalibog sila, ‘Ngaa ginpatay sang mahigugmaon nga Dios yadto nga mga tawo? Mapintas bala sia?’

Ginapamangkot mo man bala ini kon kaisa? Ukon nabudlayan ka bala sabton ang pamangkot kon bala mapintas ang Dios? Bisan diin man sini, binagbinaga ang tuhay nga pamangkot nga mahimo makabulig sa imo.

NGAA GINADUMTAN NATON ANG KAPINTAS?

Ang simple nga sabat amo nga nahibaluan naton ang husto kag sala. Tuhay gid kita sa mga sapat. Gintuga kita sang aton Manunuga “sa iya kaugalingon nga dagway.” (Genesis 1:27) Ano ang buot silingon sini? Ginhatagan niya kita sing ikasarang nga mailog ang iya mga kinaiya kag mga talaksan kon ano ang husto kag sala. Binagbinaga ini: Kon nabaton naton sa Dios ang ikasarang sa paghibalo sang husto kag sala kag ginadumtan naton ang kapintas, indi bala nga nagapamatuod ina nga ginadumtan man ini sang Dios?

Ginasakdag sang Biblia ini nga pangatarungan, kay ang Dios nagapasalig sa aton: “Ang akon mga dalanon mataas pa sa inyo mga dalanon kag ang akon mga painoino sa inyo mga painoino.” (Isaias 55:9) Kon tamdon naton nga mapintas ang Dios, indi bala nga nagapakita lang ini nga wala kita nagaugyon sa Biblia—nga daw pareho lang nga mas mataas ang aton dalanon sangsa iya? Gani mas maayo nga magtuon pa gid kita antes maghimo sini nga konklusion. Mahimo mamangkot kita, indi kon bala mapintas ang Dios, kundi kon ngaa ang pila niya nga ginahimo daw mapintas. Para mabuligan kita, binagbinagon naton kon ano gid ang buot silingon sang “mapintas.”

Kon ginatawag naton nga mapintas ang isa, ginahukman naton ang iya mga motibo. Ang isa nga mapintas nalipay nga makita ang iban nga nagaantos ukon daw wala lang sa iya ang kabudlayan nila. Gani, mapintas ang isa ka amay nga nagadisiplina sa iya bata bangod lang nanamian sia magsakit sa balatyagon sini. Pero, maayo ang isa ka amay nga nagadisiplina sa iya bata para tudluan ini ukon amligan. Bangod indi naton mahibaluan pirme kon ngaa amo sina ang ginahimo sang iban, madali lang kita magsayop sa paghukom sa ila.

Binagbinagon naton ang duha ka rason kon ngaa ginatamod sang pila nga mapintas ang Dios—ang mga kalamidad subong kag ang paghukom sang Dios nga mabasa naton sa Biblia. Ginapakita gid bala sang kamatuoran nga mapintas ang Dios?