Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2013

 ANG BIBLIA NAGAPABAG-O SANG KABUHI

“Handum Ko nga Mangin Pari”

“Handum Ko nga Mangin Pari”
  • NATAWO: 1957

  • PUNGSOD: MEXICO

  • KABUHI SANG UNA: SEMINARISTA; MASINGKI

ANG AKON NAGLIGAD:

Natawo ako sa gamay nga banwa sang Texcoco. Ang kalabanan nga dalan sadto batsihon kag yab-ukon. Kinaandan nga makita ang mga tawo sa malapit nga baryo nga nagakarga sang ila inugbaligya sa mga asno pakadto sa banwa. Imol kami katama. Ikapito ako sa siam ka kabataan. Si Tatay nagapangay-o sang guaraches (mga sandal) para buhion kami. Pero napatay sia sang pito pa lang ako ka tuig. Sugod sadto, si Nanay na ang nagabakabaka para saguron kami.

Nagatokar sing byolin si Lolo kag konduktor sia sang orkestra para sa mga musika sa simbahan. Halos tanan kami makahibalo magtokar sang instrumento. Miembro sang choir sa simbahan si Nanay, kag ang akon tiyo nagakanta sa opera kag pianista. Relihioso kami—sakristan ako, kag handum ko nga mangin misyonero sang Katoliko. Pero mahilig ako sa mga pelikula parte sa karate. Samtang pirme ako nga nagalantaw sini, nangin masingki ako.

Sa Puebla, nagsulod ako sa seminaryo. Handum ko nga mangin pari. Pero sang manugtapos na ako, nadisgusto ako sa Iglesia Katolika. Ginsulay ako sang bataon nga madre. Ginbatuan ko ini, pero nagpukaw ini sang akon handum nga mangasawa. Dugang pa, nakita ko nga mga ipokrito ang pila ka pari. Sang ulihi, nadulaan ako sing gana nga magpari.

Bilang sakristan, handum ko nga mangin misyonero sang Katoliko, pero mahilig man ako sa mga pelikula parte sa karate amo nga nangin masingki ako

Namat-od ako nga magtuon sang musika sa National Conservatory of Music sa Mexico City. Nangasawa ako  pagkagradweyt ko, kag sang ulihi nangin apat na ang amon bata. Ginasagod ko ang akon pamilya paagi sa pagkanta sa Misa sa simbahan.

Halin pa sang primero, miserable na ang amon pag-asawahay. Pirme kami nagaaway kay pareho kami nga maimon. Sang primero, sa hambal lang, pero sang ulihi sakitanay na. Pagligad sang 13 ka tuig, nagbulagay kami.

KON PAANO GINBAG-O SANG BIBLIA ANG AKON KABUHI:

Una ko nga nakilala ang mga Saksi ni Jehova antes kami magbulagay sang akon asawa. Duha ka Saksi ang nagkadto sa amon kag nagtanyag nga binagbinagon ang Biblia. Abi ko madamo na ako sing nabal-an parte sa relihion, gani gusto ko pamatud-an nga sala sila. Nagpautwas ako sang mabudlay nga mga pamangkot nga abi ko indi nila masabat. Pero nakibot ako kay ginasabat nila ini paagi sa Biblia. Narealisar ko nga halos wala ako sing nahibaluan. Pero nainit gid ang akon asawa sa mga saksi, kag bangod masako ako, nauntat ang ila pagbisita.

Pagligad sang lima ka tuig, samtang nagapuyo ako sa isa naman ka babayi, nga si Elvira, nagbisita liwat ang mga Saksi ni Jehova. Wala sia nagapamatok sa mga Saksi, gani nangin regular ang akon pagtuon sa Biblia. Pero tinuig pa antes ko mabag-o ang akon pagkabuhi.

Narealisar ko nga kon luyag ko simbahon sing bug-os si Jehova, dapat magbag-o gid ako. Una, dapat mag-untat ako sa pagkanta sa Misa, nga nagakahulugan nga dapat mangita ako sang iban nga palangabuhian. (Bugna 18:4) Dapat man kami magpakasal ni Elvira.

Pero ang isa sa pinakamabudlay nga pagbag-o nga dapat ko himuon amo ang pagkontrol sang akon kaakig. Duha ka teksto sa Biblia ang nakabulig gid sa akon: Salmo 11:5, nga nagapakita nga ginadumtan ni Jehova ang kasingki, kag 1 Pedro 3:7, nga nagtudlo sa akon nga kon luyag ko nga pamatian ni Jehova ang akon pangamuyo, dapat ko padunggan ang akon asawa. Samtang ginapamensar ko ini nga mga teksto kag nagapangayo sang bulig ni Jehova, amat-amat ko nga nakontrol ang akon kaakig.

Gintudluan ako sang Biblia nga kon luyag ko nga pamatian ni Jehova ang akon pangamuyo, dapat ko padunggan ang akon asawa

MGA BENEPISYO:

Malipayon na subong ang akon pamilya. Ginapasag-uli ko ang akon kaangtanan sa akon mga bata nga lalaki sa una ko nga asawa kag ginabuligan ko ang akon pamilya subong nga mangin malig-on sa pagtuo.

Sang bata pa ako, handum ko nga mangin pari kag buligan ang mga tawo. Subong, nabatyagan ko nga may matuod na nga kahulugan ang akon kabuhi. Ginasagod ko ang akon pamilya paagi sa pagtudlo sang musika. Nagapasalamat gid ako nga mapailubon si Jehova sa akon, kag ginhatagan ako sing kahigayunan nga magbag-o kag mangin maayo nga tawo!