Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Abril 2013

 MANGIN SUOD SA DIOS

“Padayon sa Pagpangayo, kag Hatagan Kamo”

“Padayon sa Pagpangayo, kag Hatagan Kamo”

“Ginuo, tudlui kami kon paano magpangamuyo.” (Lucas 11:1) Ginpangabay ini sang isa sang mga disipulo ni Jesus. Bilang sabat, nagsugid si Jesus sang duha ka ilustrasyon nga nagatudlo sa aton kon paano mangamuyo kag pamatian sang Dios. Kon nagaduhaduha ka kon bala ginapamatian sang Dios ang imo mga pangamuyo, mahimo nga luyag mo mahibaluan ang sabat ni Jesus.Basaha ang Lucas 11:5-13.

Ang una nga ilustrasyon parte sa isa nga nagapangamuyo. (Lucas 11:5-8) Sa sugilanon, may nagbisita sa isa ka tawo sang tungang-gab-i pero wala sia sing ipakaon. Kinahanglan sang tagbalay nga magdalidali. Bisan gab-i na, nagkadto sia sa balay sang iya abyan para manghulam sang tinapay. Sang primero, nangalag-ag magbangon ang iya abyan kay mahamuok na ang tulog sang iya pamilya. Pero bangod sang iya pagpamilit, nagbangon ini kag ginhatag ang iya kinahanglan. *

Ano ang ginatudlo sang ilustrasyon parte sa pagpangamuyo? Ginatudlo sa aton ni Jesus nga kinahanglan kita mangin mapinadayunon—padayon sa pagpangayo, pagpangita, kag pagpanuktok. (Lucas 11:9, 10) Ngaa? Buot bala niya silingon nga kon nagapangamuyo kita, daw pareho lang nga nagapanuktok kita sa puertahan sang nagapabungolbungol nga Dios? Indi. Luyag niya ipadaku nga indi pareho sa nagapangalag-ag nga abyan, ang Dios handa nga ihatag ang mga ginapangayo sang mga nagapangamuyo sa iya nga may pagtuo. Ginapakita naton ina nga pagtuo paagi sa aton pagkamapinadayunon. Paagi sa sulitsulit nga pagpangayo, ginapakita naton nga kinahanglan gid naton ang aton ginapangayo kag nagapati kita nga ihatag ini sang Dios—kon suno ini sa iya kabubut-on.Marcos 11:24; 1 Juan 5:14.

Ang ikaduha nga ilustrasyon nagasugid parte sa “nagapamati sang pangamuyo,” si Jehova. (Salmo 65:2) Namangkot si Jesus: “Sin-o nga amay sa inyo nga kon pangayuan sang iya anak sang isda, hatagan niya sia sang man-ug sa baylo sang isda? Ukon kon mangayo sia sang itlog, hatagan niya sia sang iwiiwi?” Maathag ang sabat—wala sing mahigugmaon nga amay nga nagahatag sing makahalalit nga butang sa iya bata. Dayon, ginpaathag ni Jesus ang kahulugan sang ilustrasyon: Kon ang indi perpekto nga mga amay kahibalo “maghatag sang maayo nga mga dulot” sa ila kabataan, “labi pa gid nga ang Amay sa langit magahatag sang balaan nga espiritu”—ang pinakamaayo nga dulot—sa mga tawo nga nagapangayo sa iya! *Lucas 11:11-13; Mateo 7:11.

Ang Dios handa nga ihatag ang mga ginapangayo sang mga nagapangamuyo sa iya nga may pagtuo

Ano ang ginatudlo sa aton sini nga ilustrasyon parte kay Jehova, ang “nagapamati sang pangamuyo”? Ginaagda kita ni Jesus nga tamdon si Jehova bilang mahigugmaon nga Amay nga handa maghatag sang kinahanglanon sang iya kabataan. Gani, ang mga sumilimba ni Jehova hilway sa pagpangabay sa iya. Kag bangod nahibaluan nila nga luyag niya ang pinakamaayo para sa ila, mangin handa sila nga batunon ang iya sabat, bisan pa indi ini suno sa ila ginapaabot. *

Bahin sang Biblia nga Mahimo Basahon sa Abril

Lucas 7-21

^ par. 4 Ginapakita sang ilustrasyon ni Jesus ang matuod nga kustombre kag kinabatasan. Ginakabig sang mga Judiyo ang pagkamaabiabihon bilang importante katama nga obligasyon. Nagaluto ang pamilya sing tinapay nga bastante lang para sa isa ka adlaw, gani kinaandan na ang paghulmanay kon kulang ang ila suplay. Subong man, kon pigado sila, ululupod sila nga nagatulog sa salog sa isa ka kuarto.

^ par. 6 Masami nga ginagamit ni Jesus ang ekspresyon nga “labi pa gid”—para ipakita ang mas importante nga butang.

^ par. 7 Para mahibaluan ang dugang pa parte sa kon paano mangamuyo kag pamatian sang Dios, basaha ang kapitulo 17 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.