Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ABRIL 2013

Si Jesus, ang Yabi sang May Kahulugan nga Kabuhi

Si Jesus, ang Yabi sang May Kahulugan nga Kabuhi

MAY kahulugan gid bala ang kabuhi ni Jesus? Nagdaku sia sa pigado nga pamilya, kag diutay lang ang iya pagkabutang sa iya bilog nga kabuhi. Ang matuod, “wala gid [sia] sing maunlan sang iya ulo.” (Lucas 9:57, 58) Isa pa, gindumtan sia, ginpasipalahan, kag sang ulihi ginpatay sang iya mga kaaway.

Mahimo magsiling ka, ‘Ina nga kabuhi indi gid makabig nga may kahulugan!’ Pero may dapat pa kita binagbinagon sa kabuhi ni Jesus. Usisaon naton ang apat ka aspekto sang iya kabuhi.

1. MAY KATUYUAN ANG KABUHI NI JESUS —ANG PAGHIMO SANG KABUBUT-ON SANG DIOS.

“Ang akon kalan-on amo ang paghimo sa kabubut-on sang nagpadala sa akon.”—Juan 4:34.

Paagi sa iya pulong kag buhat, ginpanikasugan ni Jesus nga tumanon ang kabubut-on sang iya Amay sa langit, si Jehova. * Nalipay gid sia sa paghimo sang kabubut-on sang Dios. Ginpaanggid pa gani niya ini sa pagkaon, suno sa teksto nga ginsambit. Binagbinaga ang mga kahimtangan sang ginpaanggid niya ini.

^ par. 6 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”

Ginsiling ini ni Jesus sang mga udtong adlaw. (Juan 4:6) Bilog nga aga sia nga nagtaklad sa bakulod sang Samaria, gani sigurado gid nga gutom sia. Ang matuod, ang iya mga disipulo nagsiling sa iya: “Rabbi, magkaon ka na.” (Juan 4:31) Paagi sa iya sabat, ginpakita niya nga ang paghimo sang kabubut-on sang Dios nagasakdag kag nagapabaskog sa iya. Indi bala nga amo sina nga sahi sang tawo nga ang kabuhi may kahulugan?

2. GINAHIGUGMA GID NI JESUS ANG IYA AMAY.

“Ginahigugma ko ang Amay.”—Juan 14:31.

Suod gid si Jesus sa iya Amay sa langit. Ang mabaskog niya nga gugma sa Dios amo ang nagpahulag sa iya nga ipakilala ang iya Amay—ang Iya ngalan, mga katuyuan, kag mga kinaiya. Paagi sa iya mga pulong, mga ginhimo, kag mga panimuot, gin-ilog gid niya ang iya Amay—amo nga makita naton sa iya ang mga kinaiya sang iya Amay. Gani, sang nangabay si Felipe sa iya: “Ipakita sa amon ang Amay,” sia nagsabat: “Sia nga nakakita sa akon nakakita man sa Amay.”—Juan 14:8, 9.

Ginahigugma gid ni Jesus ang iya Amay amo nga handa sia nga magtuman tubtob sa iya kamatayon. (Filipos 2:7, 8; 1 Juan 5:3) Ina nga gugma niya sa Dios amo ang naghatag sing kahulugan sa iya kabuhi.

 3. GINAHIGUGMA NI JESUS ANG MGA TAWO.

“Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.”—Juan 15:13.

Ang aton palaabuton bilang indi perpekto nga mga tawo madulom. Ang Biblia nagapaathag: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Kon sa aton lang, indi naton mapalagyuhan ang resulta sang sala—ang kamatayon.—Roma 6:23.

Maayo lang kay mahigugmaon nga nag-aman si Jehova sang solusyon sa kahimtangan sang katawhan. Gintugutan niya nga mag-antos kag mapatay ang iya perpekto kag wala sing sala nga Anak nga si Jesus, para gawaron ang mga tawo sa pagkaulipon sa sala kag kamatayon. Bangod sa gugma ni Jesus sa iya Amay kag sa katawhan, handa sia nga nagtuman kag naghatag sang iya perpekto nga kabuhi para sa aton. (Roma 5:6-8) Ining indi maiyaiyahon nga gugma naghatag sing kahulugan sa iya kabuhi. *

4. NAHIBALUAN NI JESUS NGA GINAHIGUGMA KAG GINAKAHAMUT-AN SIA SANG IYA AMAY.

“Ini ang akon Anak, ang hinigugma, nga ginakahamut-an ko.”—Mateo 3:17.

Ginhambal ni Jehova ini nga mga pulong halin sa langit sang ginbawtismuhan si Jesus. Gani, hayag nga ginpabutyag ni Jehova ang iya pagpalangga kag kahamuot sa iya Anak. Amo nga si Jesus makasiling gid: “Ginahigugma ako sang Amay”! (Juan 10:17) Bangod nahibaluan niya nga ginahigugma kag ginakahamut-an sia sang iya Amay, maisog niya nga gin-atubang ang mga pagpamatok kag pagyaguta. Nakabulig man ini sa iya nga atubangon bisan ang kamatayon. (Juan 10:18) Ang pagkahibalo niya nga ginahigugma kag ginakahamut-an sia sang iya Amay naghatag sing dugang pa nga kahulugan sa iya kabuhi.

May kahulugan gid ang kabuhi ni Jesus. Maathag nga madamo kita sing matun-an sa iya kon paano magkabuhi nga may kahulugan. Ang masunod nga artikulo magabinagbinag sang pila ka maathag nga laygay nga ginhatag niya sa iya mga sumulunod kon paano magkabuhi.

^ par. 16 Para mahibaluan ang dugang pa parte sa balor sang kamatayon ni Jesus bilang halad, tan-awa ang kapitulo 5 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.