Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ABRIL 2013

 ANG BIBLIA NAGAPABAG-O SANG KABUHI

Ang Biblia Nagapabag-o sang Kabuhi

Ang Biblia Nagapabag-o sang Kabuhi
  • NATAWO: 1960
  • PUNGSOD: FINLAND
  • KABUHI SANG UNA: NAGAKANTA SANG HEAVY METAL

ANG AKON NAGLIGAD:

Nagdaku ako sa pigado nga lugar sa pantalan nga siudad sang Turku. Kampeon sa boksing si Tatay, kag kami sang akon manghod nga lalaki nagaboksing man. Sa eskwelahan, ginahangkat ako pirme nga magtapungulay; kag wala gid ako nagaatras. Sang tin-edyer ako, nag-entra ako sa bantog nga gang amo nga nadalahig pa gid ako sa mas madamo nga gamo. Nakatuon man ako sing heavy metal nga musika, kag naghandum nga mangin bantog.

Nagbakal ako sang mga dram, nagporma sang banda, kag nangin lead singer sang banda. Pagusto lang ako sang himuon ko sa entablado. Bangod agresibo ang amon banda kag indi kinaandan ang amon mga hitsura, amat-amat kami nga nagbantog. Nagatokar kami sa atubang sang madamo nga tawo. Nakahimo man kami sang pila ka rekording, kag madamo ang nanamian sa pinakaulihi namon nga ginhimo. Sang ulihi nga bahin sang katuigan 1980, nagkadto kami sa Estados Unidos para ipakilala ang amon banda. Nagtokar kami sa New York kag Los Angeles, kag nakilala namon ang pila ka propesyonal sa industriya sang musika antes kami magbalik sa Finland.

Bisan pa nalipay ako nga mangin bahin sang banda, may kulang gihapon sa akon kabuhi. Indi ako komporme sa kabaris sang mga tawo sa industriya sang musika. Indi man ako malipayon sa akon kabuhi nga wala sing kahulugan. Pamatyag ko malain ako nga tawo kag nahadlok ako masunog sa impierno. Gintilawan ko nga mangita sing sabat sa tanan nga sahi sang libro parte sa relihion. Hanuot man ako nga nangamuyo sa Dios nga buligan niya ako bisan pa nga nahibaluan ko nga indi ko sia mapahalipay.

KON PAANO GINBAG-O SANG BIBLIA ANG AKON KABUHI:

Nag-obra ako sa lokal nga post office para masuportahan ang akon kaugalingon. Isa ka adlaw, nabal-an ko nga Saksi ni Jehova ang isa ko ka upod sa ulubrahan. Ginpaarakan ko sia sing pamangkot. Ang iya lohiko kag base sa Biblia nga mga sabat nagpainteres sa akon, gani nagtuon ako sa Biblia upod sa iya. Pagligad sang pila ka semana nga pagtuon, gintanyagan sing daku nga kontrata ang amon banda kag mahimo ipagua sa Estados Unidos ang amon album. Kahigayunan ko na ini nga mangin bantog.

Ginsugiran ko ang Saksi nga nagatuon sa akon nga gusto ko gid makahimo sang isa pa ka album kag pagkatapos sina, serioso ko na nga sundon ang mga prinsipio sa Biblia. Wala sia magsabat kundi ginpangabay lang niya ako nga basahon ang ginsiling ni Jesus sa Mateo 6:24. Ini nga teksto nagasiling: “Wala sing makapaulipon sa duha ka agalon.” Nakibot gid ako sang narealisar ko ang kahulugan sang ginsiling ni Jesus. Pero pagligad sang pila ka adlaw, ang nagatudlo sa akon sa Biblia amo naman ang nakibot! Ginsugiran ko sia nga bangod gusto ko sundon si Jesus, ginbiyaan ko ang banda!

Ang Biblia daw espiho nga nagpakita sang akon mga kaluyahon. (Santiago 1:22-25) Narealisar ko nga kalain gid sang akon batasan bangod katikalon sa akon kag tuman ka ambisyuso. Nagapamuyayaw ako, palaaway, nagapanigarilyo, kag palahubog. Sang narealisar ko nga ang akon pagkabuhi indi nahisuno sa mga prinsipio sang Biblia, nalugaw-an gid ako. Pero, handa ako magbag-o bisan pa mabudlay.—Efeso 4:22-24.

“Maluluy-on ang aton Amay sa langit, kag gusto niya nga ayuhon ang mga pilas sang mga nagahinulsol”

Sang primero, ginakonsiensia gid ako sang akon mga sala sadto. Pero ginbuligan gid ako sang Saksi nga nagatuon sa akon. Ginpakita niya sa akon ang ginasiling sang Biblia sa Isaias 1:18: “Bisan ang inyo mga sala subong sang escarlata, manginmaputi sila subong sang nieve.” Nakumbinsi ako sini kag sang iban pa nga teksto nga maluluy-on ang aton Amay sa langit kag gusto niya nga ayuhon ang mga pilas sang mga nagahinulsol.

Sang nakilala kag ginhigugma ko si Jehova, gusto ko nga idedikar ang akon kabuhi sa iya. (Salmo 40:8) Ginbawtismuhan ako sang 1992 sa isa ka internasyonal nga kombension sang mga Saksi ni Jehova sa St. Petersburg, Rusya.

MGA BENEPISYO:

Madamo ako sang nangin abyan nga sumilimba ni Jehova. Pirme kami nagatipon para magtokar sang matahom nga musika kag magkalipay sa sining regalo sang Dios. (Santiago 1:17) Ang pinasahi ko nga pagpakamaayo amo ang akon asawa nga si Kristina. Madamo ako sang ginasugid sa iya—mga kalipay kag kabudlayan sang kabuhi, pati ang akon balatyagon.

Kon wala ako nangin Saksi ni Jehova, basi patay na ako subong. Sang una, madamo ako sang problema kag kabudlayan nga ginaatubang. Pero subong, may matuod na nga katuyuan ang akon kabuhi, kag kontento na ako sa sini.