Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Marso 2013

Ang Pagkabanhaw ni Jesus Nagakahulugan sing Kabuhi!

Ang Pagkabanhaw ni Jesus Nagakahulugan sing Kabuhi!

ANG pagkabanhaw ni Jesus indi lamang sugilanon sadto nga wala sing kahulugan sa aton subong. Ginpadaku ni apostol Pablo ang importansia sini sang nagsulat sia: “Ginbanhaw gid si Cristo gikan sa mga patay, ang una nga bunga sa mga nagtulog sa kamatayon. Kay sanglit ang kamatayon paagi sa isa ka tawo, ang pagkabanhaw sang mga patay paagi man sa isa ka tawo. Kay subong nga kay Adan ang tanan nagakapatay, amo man kay Cristo ang tanan buhion.”—1 Corinto 15:20-22.

Ginbanhaw si Jesus sang Nisan 16, 33 C.E., ang adlaw sang tuig nga ginahalad sang mga Judiyo ang una nga bunga sang ila ani kay Jehova nga Dios sa templo sa Jerusalem. Paagi sa pagtawag kay Jesus nga una nga bunga, ginpahangop ni Pablo nga may iban pa nga pagabanhawon.

Ang masunod nga pinamulong ni Pablo nagapaathag sang nangin resulta sang pagkabanhaw ni Jesus. “Sanglit ang kamatayon paagi sa isa ka tawo,” siling ni Pablo, “ang pagkabanhaw sang mga patay paagi man sa isa ka tawo.” Bangod napanubli naton ang sala kag pagkadiperpekto kay Adan, tanan kita nagakapatay. Pero paagi sa paghatag ni Jesus sang iya perpekto nga kabuhi bilang gawad, may kahigayunan ang mga tawo nga mahilway sa pagkaulipon sa sala kag kamatayon paagi sa pagkabanhaw. Sa pagsumaryo sini, si Pablo nagsulat sa Roma 6:23: “Ang bayad nga ginabayad sang sala amo ang kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.”

Ginpaathag mismo ni Jesus ang kahulugan para sa aton sang iya kamatayon kag pagkabanhaw. Nagapatuhoy sa iya kaugalingon, sia nagsiling: “Dapat man bayawon ang Anak sang tawo, agod ang tagsatagsa nga nagapati sa iya makatigayon sang kabuhi nga walay katapusan. Kay ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:14-16.

Imadyina nga mabuhi ka sing wala katapusan nga wala na sing kasakit, pag-antos, ukon kasubo! (Bugna 21:3, 4) Malipayon gid ini nga palaabuton! Ang isa ka iskolar nagsiling parte sa sini: “Kon ang lulubngan nagapahanumdom sa isa kon daw ano kalip-ot sang kabuhi, ang pagkabanhaw nagapahanumdom nga malapit na madula ang kamatayon.” Huo, ang pagkabanhaw ni Jesus nagakahulugan sing kabuhi!