Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN PEBRERO 2013

Moises—Tawo nga Mapainubuson

Moises—Tawo nga Mapainubuson

ANO ANG PAGKAMAPAINUBUSON?

Kabaliskaran ini sang pagkabugalon ukon pagkamatinaastaason. Ginabaton sang tawo nga mapainubuson nga ang iban mas labaw sa iya. Ginabaton man niya nga indi sia perpekto kag nahibaluan niya ang iya mga limitasyon.

PAANO SI MOISES NAGPAKITA SING PAGKAMAPAINUBUSON?

Wala nagpabugal si Moises sang ginhatagan sia sing awtoridad. Sa masami, maathag dayon sa isa ka tawo nga mapainubuson sia ukon indi kon hatagan sia sing diutay nga awtoridad. Ang awtor sang ika-19 nga siglo nga si Robert G. Ingersoll nagsiling: “Kon luyag mo makilala kon sin-o gid ang isa ka tawo, hatagi sia sing gahom.” Sa sini nga kahimtangan, isa gid ka maayo nga halimbawa si Moises. Paano?

Ginhatagan ni Jehova si Moises sang daku nga awtoridad sang ginpangunahan niya ang Israel. Pero wala nagpabugal si Moises bangod sini. Halimbawa, binagbinaga kon paano niya mapainubuson nga ginsolbar ang mabudlay nga problema parte sa mga kinamatarong sa palanublion. (Numeros 27:1-11) Mabudlay ini desisyunan kay mahimo amo ini ang mangin basihan sang masunod nga mga henerasyon.

Ano ang iya ginhimo? Magarason bala sia nga bilang lider sang Israel, kalipikado sia nga magdesisyon sa sini? Masalig bala sia sa iya abilidad, madamo nga eksperiensia, ukon sa iya mga nahibaluan sa panghunahuna ni Jehova?

Mahimo nga amo sini ang himuon sang isa nga bugalon. Pero tuhay si Moises. Ang Biblia nagasugid sa aton: “Gindala ni Moises kay Jehova ang ila kaso.” (Numeros 27:5, New World Translation of the Holy Scriptures) Hunahunaa ini! Bisan pagligad sang mga 40 ka tuig nga pagpanguna ni Moises sa pungsod sang Israel, wala sia magsalig sa iya kaugalingon kundi kay Jehova. Maathag nga mapainubuson gid si Moises.

Wala maghunahuna si Moises nga sia lang dapat ang may awtoridad. Nalipay sia sang gintangdo ni Jehova ang iban nga Israelinhon nga mangin propeta. (Numeros 11:24-29) Sang nagpanugda ang iya ugangan nga lalaki nga dapat niya itugyan sa iban ang pila niya ka responsibilidad, mapainubuson niya ini nga gintuman. (Exodo 18:13-24) Kag sang tigulang na sia, bisan mapagsik pa, nangabay sia kay Jehova nga magtangdo sang magabulos sa iya. Sang gintangdo ni Jehova si Josue, ginsakdag niya sing hanuot ang bataon nga lalaki, nga nagapalig-on sa katawhan nga sakdagon ang pagpanguna ni Josue pakadto sa Ginsaad nga Duta. (Numeros 27:15-18; Deuteronomio 31:3-6; 34:7) Sigurado gid nga ginkabig ni Moises nga isa ka pribilehiyo nga pangunahan ang mga Israelinhon sa pagsimba. Pero ginpasulabi niya ang kaayuhan sang iban sangsa iya awtoridad.

ANO ANG MATUN-AN NATON?

Indi naton gusto nga mangin bugalon bangod sang gahom, awtoridad, ukon abilidad. Dumduma: Para mangin mapuslanon kay Jehova, dapat mas labaw ang aton pagkamapainubuson sangsa aton ikasarang. (1 Samuel 15:17) Kon mapainubuson gid kita, panikasugan naton nga iaplikar ang maalamon nga laygay sang Biblia: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup.”—Hulubaton 3:5, 6.

Ang halimbawa ni Moises nagatudlo man sa aton nga indi naton pag-ipabugal ang aton tindog ukon awtoridad.

Makabenepisyo bala kita sa pag-ilog sa pagkamapainubuson ni Moises? Huo! Kon ginapalambo naton ang matuod nga pagkamapainubuson, ginapahapos naton ang pagkabuhi sang mga tawo sa palibot naton, kag nagasuod pa gid kita sa ila. Labaw sa tanan, mangin suod kita kay Jehova nga Dios, nga nagapakita man sining matahom nga kinaiya. (Salmo 18:35) “Ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.” (1 Pedro 5:5) May rason gid kita nga ilugon ang pagkamapainubuson ni Moises!