Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN PEBRERO 2013

 MANGIN SUOD SA DIOS

“Sia ang Dios . . . sang mga Buhi”

“Sia ang Dios . . . sang mga Buhi”

Mas gamhanan bala ang kamatayon sangsa Dios? Siempre indi! Paano ang kamatayon ukon ang iban pa nga “kaaway” mas gamhanan sangsa “Makagagahom nga Dios”? (1 Corinto 15:26; Exodo 6:3, APD) May gahom ang Dios nga dulaon ang kamatayon paagi sa pagkabanhaw, kag nagapromisa sia nga himuon ina sa bag-o nga kalibutan. * Masaligan bala ina nga promisa? Ang Anak mismo sang Dios nga si Jesus nagasugid sa aton sang mga pulong nga makahatag sa aton sing paglaum.—Basaha ang Mateo 22:31, 32.

Sang nakighambal sia sa mga Saduceo, nga wala nagapati sa pagkabanhaw, si Jesus nagsiling: “Nahanungod sa pagkabanhaw sang mga patay, wala bala ninyo mabasahi ang pinamulong sang Dios sa inyo, nga nagasiling, ‘Ako ang Dios ni Abraham kag ang Dios ni Isaac kag ang Dios ni Jacob’? Sia ang Dios, indi sang mga patay, kundi sang mga buhi.” Ginapatuhuyan diri ni Jesus ang pagpakigsugilanon sang Dios kay Moises sa atubang sang nagadabdab nga sapinit mga 3,500 ka tuig na ang nagligad. (Exodo 3:1-6) Suno kay Jesus, ang ginsiling ni Jehova kay Moises—“Ako ang Dios ni Abraham kag ang Dios ni Isaac kag ang Dios ni Jacob”—nagapakita nga matuman gid ang promisa nga pagkabanhaw. Paano?

Binagbinaga anay ang kahimtangan. Sang nakigsugilanon si Jehova kay Moises, madugay na nga napatay ang mga patriarka nga sanday Abraham, Isaac, kag Jacob. Si Abraham 329 na ka tuig nga napatay, si Isaac 224, kag si Jacob 197. Pero si Jehova nagsiling nga daw subong bala nga buhi gihapon ining tatlo ka patriarka. Ngaa?

Si Jesus nagpaathag: “Sia [Jehova] ang Dios, indi sang mga patay, kundi sang mga buhi.” Hunahunaa sing makadali ang ginapahangop sina nga pinamulong. Kon wala sing pagkabanhaw, indi na mabuhi liwat sanday Abraham, Isaac, kag Jacob. Kon amo, si Jehova mangin isa ka Dios sang mga patay. Gani, magakahulugan ini nga mas gamhanan ang kamatayon sangsa kay Jehova—nga daw subong bala nga wala sia sing mahimo para hilwayon ang iya matutom nga mga alagad sa gapos sang kamatayon.

Gani, ano ang masiling naton parte kanday Abraham, Isaac, Jacob, kag sa tanan nga matutom nga alagad ni Jehova nga napatay na? Si Jesus nagsiling: “Para sa iya buhi sila tanan.” (Lucas 20:38) Ang katuyuan ni Jehova sa pagbanhaw sa iya matutom nga mga alagad nga napatay sigurado gid nga matuman kay ginahunahuna niya nga daw subong bala nga buhi sila. (Roma 4:16, 17) Dumdumon sila ni Jehova asta nga banhawon niya sila liwat suno sa iya gintalana nga tion.

Mas gamhanan si Jehova sangsa kamatayon

Nalipay ka bala nga makita liwat ang napatay mo nga mga pinalangga? Kon amo, dumduma nga mas gamhanan si Jehova sangsa kamatayon. Wala sing makapugong sa iya sa pagtuman sang iya promisa nga banhawon ang mga patay. Ngaa indi mo pagtun-an ang parte sa promisa nga pagkabanhaw kag ang Dios nga magatuman sini? Sa paghimo sini, sigurado nga mangin suod ka kay Jehova, “ang Dios . . . sang mga buhi.”

Bahin sang Biblia nga mahimo basahon sa Pebrero

Mateo 22-28Marcos 1-8

^ par. 3 Para mahibaluan mo ang dugang pa parte sa mga promisa sang Dios nga pagkabanhaw sa matarong nga bag-o nga kalibutan, basaha ang kapitulo 7 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.