Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ENERO 2013

Sa Amon mga Bumalasa

Sa Amon mga Bumalasa

Ang magasin nga imo ginabasa subong, una nga ginbalhag sang Hulyo 1879. Sugod sadto madamo sang mga pagbag-o, pati na sa sini nga magasin. Sugod sa sini nga isyu, matalupangdan mo ang dugang nga pagbag-o sa porma sang Ang Lalantawan. Ano ini nga mga pagbag-o?

Sa madamo nga pungsod, mas gusto sang madamo nga magkuha sing impormasyon sa Internet. Sa isa lang ka klik sang mouse, mabasa nila dayon ang impormasyon. Madamo nga libro, magasin, kag pamantalaan ang mabasa sa Internet.

Bangod sini, ginbag-o namon liwat ang desinyo sang amon Web site nga www.jw.org, para mangin mas makagalanyat ini kag mahapos gamiton. Mabasa sang mga nagakadto sa sini nga site ang mga publikasyon nga ginabalhag sa masobra 430 ka lenguahe. Pero sugod subong nga bulan, ang mga nagakadto sa amon Web site makabasa man sang pinili nga mga artikulo nga regular nga makita sadto sa naimprinta namon nga magasin pero sa Web site na lang subong mabasa. *

Bangod madamo nga artikulo nga ipagua lamang sa Internet, sugod sini nga isyu, ang pangpubliko nga edisyon sang Ang Lalantawan 16 ka pahina na lang sa baylo nga 32 ka pahina. Ginabalhag na ang Lalantawan sa 204 ka lenguahe. Bangod sini, posible na nga ma-translate ini nga magasin sa mas madamo pa nga lenguahe.

Ginalauman namon nga ini nga mga pagbag-o makabulig para malab-ot ang mas madamo pa nga tawo sing nagaluwas-kabuhi nga mensahe sang Biblia. Determinado kami nga padayunon ang pag-aman sing maathag kag makagalanyat nga mga impormasyon, naimprinta man ukon sa Internet, para makabenepisyo ang amon madamo nga bumalasa nga nagarespeto sa Biblia kag gusto makahibalo kon ano gid ang ginatudlo sini.

Mga Manugbalhag

^ par. 5 Lakip sa mga artikulo nga mabasa lang sa Internet amo ang masunod: “Para sa mga Pamatan-on,” nga gindesinyo para matun-an nila ang Biblia, kag ang “Akon mga Leksion sa Biblia,” isa ka serye nga gindesinyo para gamiton sang mga ginikanan sa pagtudlo sa ila kabataan nga nagaedad tatlo ka tuig paubos.