Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ENERO 2013

 MANGIN SUOD SA DIOS

‘Ginpahayag Mo Ini sa mga Bata’

‘Ginpahayag Mo Ini sa mga Bata’

Gusto mo bala mahibaluan ang kamatuoran parte sa Dios—kon sin-o sia, kon ano ang iya ginahigugma kag ginadumtan, kag kon ano ang iya kabubut-on? Sa iya Pulong, ang Biblia, ginpahayag ni Jehova ang kamatuoran parte sa iya. Pero indi tanan nga nagabasa sang Biblia makahangop sa sini nga kamatuoran. Ngaa? Bangod ang paghangop sina nga kamatuoran isa ka pribilehiyo; kag indi tanan makabaton sini. Binagbinagon naton ang ginsiling ni Jesus parte sa sini.—Basaha ang Mateo 11:25.

Ini nga bersikulo nagasugod: “Sadto nga tion si Jesus nagsiling.” Gani ang inughambal ni Jesus mahimo sabat sa bag-o lang natabo. Bag-o lang niya ginpakamalaut ang mga tawo nga indi gusto mangin iya disipulo sa tatlo ka siudad sang Galilea diin naghimo sia sang mga milagro. (Mateo 11:20-24) Mahimo mamangkot ka, ‘Paano nga wala nagbaton ang mga tawo sang kamatuoran nga gintudlo ni Jesus bisan pa nakita nila ang iya mga milagro?’ Bangod ini sang katig-a sang ila tagipusuon.—Mateo 13:10-15.

Nahibaluan ni Jesus nga para mahangpan ang kamatuoran parte sa Dios nga makita sa Biblia, kinahanglan ang duha ka butang: Ang bulig sang Dios kag ang mabinatunon nga tagipusuon. Si Jesus nagpaathag: “Nagadayaw ako sing dayag sa imo, Amay, Ginuo sang langit kag duta, bangod gintago mo ini nga mga butang gikan sa mga maalam kag mga intelihente kag ginpahayag ini sa mga bata.” Naintiendihan mo na bala kon ngaa ang paghangop sa kamatuoran sa Biblia isa ka pribilehiyo? Si Jehova, subong ang “Ginuo sang langit kag duta,” may kinamatarong nga magtago ukon magpahayag sang kamatuoran. Pero ang Dios wala sing ginapasulabi. Ano ang iya basihan kon ngaa wala niya ginapahayag sa tanan ang kamatuoran sa Biblia?

Ginakahamut-an ni Jehova ang mapainubuson, indi ang matinaastaason. (Santiago 4:6) Ginatago niya ang kamatuoran sa “mga maalam kag mga intelihente”—mga tawo nga tama ka bugalon nga indi magbaton sang iya bulig. (1 Corinto 1:19-21) Pero ginapahibalo niya ang kamatuoran sa “mga bata”—mga tawo nga may sinsero nga tagipusuon nga nagapakita sing pagkamapainubuson pareho sang mga bata. (Mateo 18:1-4; 1 Corinto 1:26-28) Si Jesus nga Anak sang Dios nakakilala sini nga sahi sang mga tawo. Madamo sang bugalon kag edukado nga relihioso nga mga lider ang wala nakahangop sang mensahe niya, pero ang mapainubuson nga mga mangingisda nakahangop sini. (Mateo 4:18-22; 23:1-5; Binuhatan 4:13) Subong man, ang pila ka manggaranon kag edukado nga nagpakita sing matuod nga pagkamapainubuson nangin mga sumulunod ni Jesus.—Lucas 19:1, 2, 8; Binuhatan 22:1-3.

Balikan naton ang pamangkot sa umpisa: Gusto mo bala mahibaluan ang kamatuoran parte sa Dios? Kon amo, malipay ka sa paghibalo nga wala nahamuot ang Dios sa mga tawo nga maalam sa sini nga kalibutan. Sa baylo, ginakahamut-an niya ang mga ginapakanubo sini nga mga tawo. Kon tun-an mo ang Pulong sang Dios nga may husto nga motibo, mahimo ka malakip sa hatagan ni Jehova sing hamili nga regalo, ang paghangop sang kamatuoran parte sa iya. Ang paghangop sa sina nga kamatuoran magapahalipay sa imo subong kag makahatag sang “matuod nga kabuhi”—wala sing katapusan nga kabuhi sa ginpromisa sang Dios nga bag-o nga kalibutan nga malapit na. *1 Timoteo 6:12, 19; 2 Pedro 3:13.

Bahin sang Biblia nga mahimo basahon sa Enero

Mateo 1-21

^ par. 7 Nalipay ang mga Saksi ni Jehova nga buligan ka sa paghibalo sang kamatuoran parte sa Dios kag sa iya mga katuyuan. Nagatanyag sila sing wala bayad nga pagtuon sa Biblia paagi sa libro nga Ano Gid ang Ginatudlo Sang Biblia?