Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN DISIEMBRE 2012

 Mangin Suod sa Dios

Ara Ka Bala sa “Tolon-an nga Handumanan” sang Dios?

Ara Ka Bala sa “Tolon-an nga Handumanan” sang Dios?

GINAAPRESYAR bala ni Jehova ang mga panikasog sang iya mga sumilimba nga pahamut-an sia? Huo! Pero indi lang ang ila ginahimo nga maayo kag pagdayaw ang Iya ginaapresyar. Ginapabaloran man niya kon ginahunahuna sia sang iya mga sumilimba. Indi gid pagkalimtan ni Jehova ang iya katawhan kag ang ila mga hinimuan. Paano naton masiguro ini? Ang sabat makita naton sa ginsulat ni propeta Malaquias.—Basaha ang Malaquias 3:16.

Tuman kalain sang moral kag espirituwal nga kahimtangan sang Israel sang nagpanagna si Malaquias sang ikalima nga siglo B.C.E. Ginpatumbayaan sang mga saserdote ang ila mga obligasyon, kag ang kalabanan nga tawo naghimo sing mga buhat nga nagapakahuya sa Dios pareho sang pagbinabaylan, pagpakighilahi, kag pagpangdaya. (Malaquias 2:8; 3:5) Bisan pa lapnag ang kalautan, may matutom gihapon nga mga Israelinhon. Ano ang ila ginhimo?

“Ang mga nagakahadluk sa GINOO nagsinilingay,” paathag ni Malaquias. Ang kahadlok sa Dios isa ka maayo nga kinaiya. Ginapatuhuyan diri ni Malaquias ang mga Israelinhon nga nagatahod gid sa Dios kag may kahadlok nga indi Sia mapahamut-an. Talupangda nga ang mga may kahadlok sa Dios “nagsinilingay.” Buot silingon, nagtipon sila para dayawon si Jehova kag palig-unon ang isa kag isa, para indi sila maluyahan sing buot kag maimpluwensiahan sang kalautan sa ila palibot.

Ginpakita man sining matutom nga mga Israelinhon ang ila pagtahod kay Jehova sa isa pa ka importante nga paagi: “Nagpainoino [sila] sa iya ngalan.” Ang isa pa ka translation nagasiling: “Nagatahod kag nagapadungog sa iya Ngalan.” Ining mga may kahadlok sa Dios nagapadungog kay Jehova bisan sa ila hunahuna. Sa ila tagipusuon, ginahunahuna nila ukon ginapamalandungan ang parte kay Jehova kag sa iya dungganon nga ngalan. Nahibaluan bala ni Jehova ang ila ginahimo?

Nagsiling si Malaquias: “Ang GINOO nagdungug kag nagpamati.” Daw subong bala nga halin sa iya mahimayaon nga trono sa langit, nagapamati si Jehova kon ang iya mga sumilimba nagahambal sing pagdayaw sa isa kag isa. Nagapamati man sia kon nagapamalandong sila sa ila kaugalingon. (Salmo 94:11) Pero indi lamang ang ila maayo nga ginahambal kag ginahunahuna ang ginatalupangod ni Jehova.

“Ang tolon-an nga handumanan ginsulat sa atubangan niya,” siling ni Malaquias. Narekord diri ang tanan nga matutom nga nag-alagad kay Jehova. Talupangda nga gintawag ini nga “tolon-an nga handumanan.” * Buot silingon, indi gid pagkalimtan ni Jehova ang iya matutom nga mga sumilimba kag ang tanan nga ila ginahimo, ginahambal, kag ginahunahuna sa pagdayaw sa iya. Pero may rason ang Dios kon ngaa dumdumon niya sila. Nagpromisa sia nga padyaan sing kabuhi nga wala sing katapusan ang tanan nga ang ila ngalan nasulat sa iya tulun-an nga handumanan. *Salmo 37:29.

Makalilipay gid mahibaluan nga ginapabaloran ni Jehova ang tanan nga ginahimo naton para batunon niya ang aton pagsimba! Ang ginasiling sa Malaquias 3:16 dapat magpahulag sa aton nga pamensaran sing maayo ang aton kaangtanan kay Jehova. Maayo nga pamangkuton naton ang aton kaugalingon, ‘Nasulat ayhan ang akon ngalan sa “tolon-an nga handumanan” sang Dios?’ Sigurado nga masulat ini kon ang tanan naton nga ginahimo, ginahambal, kag ginahunahuna adlaw-adlaw amo ang mga butang nga luyag dumdumon ni Jehova.

Bahin sang Biblia nga mahimo basahon sa Disiembre:

Nahum 1Malaquias 4

^ par. 8 Indi lang pagdumdom sa isa ka butang ang buot silingon sang Hebreo nga tinaga para sa “handumanan.” Nagapahangop man ini nga may himuon para sa sina nga butang.

^ par. 8 Para sa dugang nga impormasyon parte sa promisa sang Dios nga kabuhi nga wala sing katapusan, basaha ang kapitulo 3 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.