Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Disiembre 2012

“Paghidait sa mga Tawo nga Iya Nahamut-an”

“Paghidait sa mga Tawo nga Iya Nahamut-an”

“Himaya sa Dios sa kahitaasan, kag sa duta paghidait sa mga tawo nga iya nahamut-an.”—LUCAS 2:14.

Ang rason sang iban sa pagsaulog sang Krismas.

Kada tuig, ang papa sang Roma kag ang iban nga lider sang simbahan nagawali parte sa paghidait kag nagalaum sila nga matuman sa tion sang Krismas ang ginsiling sang anghel: ‘Paghidait sa duta sa mga tawo nga iya nahamut-an.’ Nagakadto pa gani ang iban sa sagrado nga mga lugar para saulugon ang Krismas.

Ngaa mabudlay ini himuon?

Ang paghidait sa tion sang Krismas wala nagalawig. Halimbawa, sang Disiembre 1914, sa tion nga ang Europa nadalahig sa Bug-os Kalibutan nga Inaway I, nag-untat anay sa pagpakig-away ang mga soldado sang Britanya kag sang Germany kag tingob nga nagsaulog sang Krismas. Naghinatagay sila sang pagkaon, ilimnon, kag sigarilyo. Naghampang pa gani sila sang soccer. Pero wala maglawig ini nga paghidait. Sa sulat sang isa ka soldado sang Britanya, nagsiling sia nga ginhambalan sia sang isa ka soldado sang Germany: “May paghidait kita subong. Pero buas magapakig-away kita para sa tagsa naton ka pungsod.”

Ano nga mga prinsipio sa Biblia ang makabulig?

“Sa aton natawo ang isa ka bata . . . Tawgon ang iya ngalan . . . Principe sang Paghidait. Nahanungud sang pagdugang sang iya pagbulut-an kag sang paghidait walay katapusan.” (Isaias 9:6, 7) Makapalig-on gid nga tagna parte kay Jesucristo, indi bala? Wala ginbun-ag si Jesus sa duta agod magpaluntad sang isa lang ka adlaw nga paghidait kada tuig. Kundi bilang Manuggahom sa langit, paluntaron niya ang paghidait sing wala katapusan.

“Paagi sa akon [Jesus] may paghidait kamo. Sa kalibutan may kapipit-an kamo, apang magpakabakod kamo! Nadaug ko ang kalibutan.” (Juan 16:33) Bisan subong, ginabuligan ni Jesus ang iya mga sumulunod nga magpakighidait sa isa kag isa. Matuod, nagaatubang ang mga Cristiano sang mga kabudlayan. Pero sa bulig sang Biblia, nahangpan nila kon ngaa nagaantos sila kag nahibaluan nila kon paano paluntaron ni Jesus ang wala katapusan nga paghidait. Gani nagabatyag sila sang kalinong kag may paghidait sa tunga nila.

Paagi sa pagtuman sa mga sugo ni Jesus, may paghidait sa tunga sang mga Saksi ni Jehova bisan ano man ang ila pungsod, rasa, ukon lenguahe. Ginaagda ka nga magtambong sa ila pagtilipon sa Kingdom Hall para makita mo ini mismo. Ayhan magaugyon ka man, pareho sang iban, nga ini nga paghidait mas maayo sangsa paghidait sa tion sang Krismas.

May paghidait sa tunga sang mga Saksi ni Jehova bisan ano man ang ila rasa ukon lenguahe. Magtambong sa ila pagtilipon sa Kingdom Hall para makita mo ini mismo