Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Disiembre 2012

Pagbulig sa mga Imol

Pagbulig sa mga Imol

“Ang may mata nga maalwan pakamaayohon, kay nagahatag sia sang iya kalan-on sa imol.”—HULUBATON 22:9.

Ang rason sang iban sa pagsaulog sang Krismas.

Ginbuligan ni Jesus ang mga imol, balatianon, kag makaluluoy. Gusto ilugon sang iban ang iya halimbawa. Para sa ila, pinakamaayo nga himuon ini sa tion sang Krismas, kay masami nga may mga institusyon nga nagapangolekta sang donasyon.

Ngaa mabudlay ini himuon?

Kon Krismas, masako ang kalabanan sa pagpamalaklon, paglingawlingaw, kag pagbisita sa ila mga abyan kag pamilya. Bangod sini, wala na sila sing tion, kusog, ukon kuarta sa pagbulig sa mga imol, kundi maghatag na lang sang donasyon sa mga institusyon nga nagabulig sa mga nagakinahanglan.

Ano nga mga prinsipio sa Biblia ang makabulig?

“Dili pagpunggi ang maayo gikan sa ila sa diin naigo ini, kon ini yara sa gahum sang imo mga kamut sa paghimo sini.” (Hulubaton 3:27) Ang mga imol, ginagutom, kag mga makaluluoy indi lang kon Krismas nagaantos. Kon nahibaluan mo nga may isa nga nagakinahanglan sang bulig kag ara “sa gahum sang imo mga kamut” ang pagbulig, ngaa hulaton mo pa ang Krismas? Ang imo kaayo kag pagkamaluluy-on pakamaayuhon.

“Sa kada una nga adlaw sang semana ang kada isa sa inyo sa iya balay magpain sang bisan pila nga matipon suno sa iya kabuganaan.” (1 Corinto 16:2) Ini nga laygay ginhatag ni apostol Pablo sa mga Cristiano sang una nga gusto magbulig sa mga imol. Puede ka bala “magpain,” ukon magbadyet para ihatag sa mga indibiduwal ukon organisasyon nga nagagamit sang ila pundo sa husto nga paagi? Kon himuon mo ini, makabulig ka sa mga nagakinahanglan suno sa imo masarangan.

“Indi pagkalimti ang paghimo sing maayo kag ang pagpaambit sing mga butang sa iban, kay nahamuot gid ang Dios sa sini nga mga halad.” (Hebreo 13:16) Talupangda nga luwas sa “pagpaambit sing mga butang sa iban,” dapat man naton dumdumon “ang paghimo sing maayo,” ukon pagbulig sa iban. Halimbawa, ginahanas sang maayo nga mga ginikanan ang ila kabataan nga buligan ang mga tigulang; palig-unon ang mga nagamasakit paagi sa paghatag sang card, pagbisita, ukon pagtawag sa ila; kag pagpakita sing kaayo sa imol ukon dis-ebol nga mga kabataan. Bilang resulta, makapakita sila pirme sing kaayo kag kaalwan.

Ginatudluan sang maayo nga mga ginikanan ang ila kabataan nga buligan ang mga tigulang, masakiton, kag dis-ebol nga mga kabataan. Bangod sini, ang mga kabataan makapakita pirme sing kaayo kag pagkamahinatagon